Горд — соин мукет

Удмурт Дунне
By Удмурт Дунне 25 июня, 2013 15:56

Горд — соин мукет

Ӝужась кизили Иван Котельников

Ӝужась кизили Иван Котельников

Алигес ортчылэм крезьгур фестивальёсын ӵемысь кылӥськиз Иван Котельниковлэн нимыз. Вакчи дыр куспын ӝужась кизили тодмо луиз, уно фанатъёс люказ.

Ваня Котельников вордскиз Дэбес ёросысь Уйвай гуртын. Осконтэм кадь: крезьгурен герӟаськымтэ семьяысь пияш 5 аресын кырӟаны кутскиз, соку ик арганэн шудыны мылкыдыз бурдъяськиз. Атаез солы одӥг капчи гурез возьматӥз, собере Ваня ас понназ дышетскиз ни, пичиен-пичиен пӧртэм тодмо кырӟанъёсыз бичаны пӧрмытӥз.

— Уг тодӥськы, маиныз монэ крезьгур бордаз кыскиз. Та дырозь семьяямы одӥг но кырӟась, крезьгурчи ӧй вал. Йырсие горд, оло, соин висъяськисько? — серекъяса вера пияш.

Быгатонлыкъёссэ азин-тон вылысь анаез 4-тӥ классын дышетскись пизэ Дэбесысь крезьгуръя школае гожтӥз. 6 ар ӵоже пияш баянэн шудыны дышетскиз, шӧдӥз, аслэсьтыз удыссэ шедьтӥз шуыса но, школазэ йылпумъяса, Ижкарысь крезьгуръя колледже пыриз. Али со дышетске Пермьысь искусствоосъя но культурая академиын, сюлэмызъя луиз художественно-педагогической факуль-тетысь калык хор ёзэт. Эшъяське баянэн, арганэн, фортепианоен, балалайкаен, домраен, гитараен, трубаен, саксофонэн, аккордеонэн. Ваньмон дыръяз Ваня «Посадские ребята», «Уральский хоровод», «Музыка без границ», «Иван да Марья» ансамбльёсын но группаосын кырӟа.

Нош Удмуртиын улыкуз ай, со аслэсьтыз группазэ кылдытӥз: люказ гуртысьтыз крезьгур тӥрлыкъёсын шудӥсь эшъёссэ, ним понӥзы фамилиосысьтызы ныры-сетӥ букваосъя — «КПП» (Котельников Ваня, Перевощиков Дима, Пономарёв Слава). Ёросазы егитъёс вакчи дыр куспын тодмо луизы, концертъёсын бускель гуртъёсы но Шаркан палъёсы потазы, асьсэлэсь кылзӥсьёссэс шедьтӥзы. Бӧрысь группаязы Ванялэн Дима Галичанин выныз вуиз, но «КПП» нимзэс ӧз воштэ (калык дышиз ни вал бере), пумаз «+» гинэ ватсазы. Али «КПП+» гужемъёсы гинэ на люкаськылэ: пиос кин кытчы кошкизы, пӧртэм улосъёсын но каръёсын ужало яке дышетсконзэс азьланьто.

— Сцена вылэ ӵем ке но потасько, котькуд выступление азьын сюлмаськисько. Сюлмы шумпотэ, калык шуныт пумита ке, — шуэ егит кырӟась.
Нош учкисьёслы Ванялэн кырӟамез туж яра: со сярысь верало пӧртэм вожвылъяськонъёсын, фес-тивальёсын, концертъёсын вормонъёсыз, лауреат нимъёсыз. Кырӟан гожтыкуз (кылбурзэ но, гурзэ но, минусовказэ но ачиз лэсьтэ), дэбес пияш лыдэ басьтэ, мае кылзо туала егитъёс но, шоро-куспо арлыдъемъёс но. Ӵапак кылзӥсьёслэн яратэмзы ик юрттэ жадён сярысь вунэтыны (сюрес жадьытэ ук, тужгес но ачид руль сьӧрын ветлӥськод ке), кырӟанъёс гожтыны. Алигес Ваня шумпоттӥз выль кырӟанэныз. Азьвылъёсызлэсь таиз зол висъяське. Сӥземын со вордскем музъемлы, чуръёсыз мӧзмонэн пыӵамын.

Дышетсконзэ йыл-пумъяса, Ваня Удмуртие ик берытскыны чакла, но кытын-мар ужалоз — уг на тоды: ӵектонъёс трос. Валамон одӥгез: крезьгурен со уз люкиськы, азьланяз но тыршоз кылзӥсьёссэ шумпоттыны.

Лена Рябина

Удмурт Дунне
By Удмурт Дунне 25 июня, 2013 15:56
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<