Эмъясьлэн данэз

Удмурт Дунне
By Удмурт Дунне 13 июня, 2013 16:48

Эмъясьлэн данэз

2

Тазалыкез утён удысын шоро-куспо уждун туэ 24,6 процентлы йылоз. Таӵе ӟеч иворен пумитазы шаерысьтымы эмъясьёс удыс праздниксэс.

Президент Александр Волков пыриськиз удыс праздниклы сӥзем сӥё-дано ужрадэ. Соку ик вераз:

— Тазалыкез утён удысысь вань тыршисьёслэсь уждунзэс будэтонлы республикамылэн бюджетысьтыз ватсаса 1 миллиард 600 сюрс манет висъяськоз. Окладъёс 15 процентлы будозы. Эшшо чакламын на ватсаса тыронъёс — ужазинлыкез лыдэ басьтыса.

Нош азязы пуктэм ужпумъёсты элькунысьтымы йӧнатӥсьёс быдэсъяло. Кылем ар понна лыдпусъёсты учконо ке, вордскись нылпиослэн лыдзы йылӥз, улонысь кошкисьёс ичигес луизы. Озьы калык арлы быдэ йылэ, туэ 5 толэзь куспын гинэ 600-лы уногес луим ни.

Тазалыкез утёнъя министр Владимир Музлов верамъя, эмъян удыслы берло дыре нимысьтыз саклык висъяське. Кылем арын 17 миллиард манет кошкиз больницаосты тупатъялы-выльдонлы, эмъян тӥрлык басьтонлы. Озьы 9 элькун эмъян учреждениосысь поликлиникаос но стационаръёс тодмантэм воштӥськизы. Тупатъян ужъёс ортчытэмын городъёсысь но ёросъёсысь 53 больницаосын.

Эшшо: шаерысьтымы 122 эмъян организациосын ужало 6 сюрс 898 врачъёс но 16 сюрс 257 эмъясь сузэръёс. Соос пӧлысь ог 740-эз — Россиысь но Удмуртиысь тазалыкез утён удысын сӥё-дано ужасьёс. Удыс праздниксы азьын таослэн радъёссы эшшо йылӥзы.

Элина Кумачёва
Туспуктэмез: infuture.ru

Удмурт Дунне
By Удмурт Дунне 13 июня, 2013 16:48