Ӟеч сюлэм вуттэ Кремле

Удмурт Дунне
By Удмурт Дунне 10 июня, 2013 15:21

Ӟеч сюлэм вуттэ Кремле

11

6-тӥ июне Москваысь Кремльын данъязы калыкез улон-вылонын утёнъя ёзъёсын ужасьёсты. Удмуртиысь сыӵе бадӟым ужрадэ вуылӥз удмурт нылкышно Лидия Боброва.

Лидия Боброва 15-тӥ арзэ тырше ни Алнашысь калыкез улон-вылонын утёнъя центрын. Кинлы ке визь-кенешен ке но юрттӥсько, туж шумпотӥсько ни, шуэ со. Ма, гуртоос но дораз кыстӥсько. Огпол дораз кожем арлыдо нылкышно, коркаме вузалом я ум шуыса. Лидия Боброва визьмам: тазалыкед вань дыръя юртъередлэсь мозмытскыны эн дырты. Но нылкышнолэсь йырзэ нылпиосыз берыктӥллям ик. Корказэ вузам, дыды-экеосыз доры улыны кошкем. Но ар ортчыса, вордскем Алнаш палъёсаз ик берытскем, пиналъёсызлы кулэ луымтэысь. Юртъерен югдурез тупатскытозь, Боброва сое ас дораз возем.

Та выллем учыръёс улонын туж трос пумисько, шуэ Боброва. Адямиослэн пырон интызы но уг луы. Куддыръя огшоры кылӟись, тонэ валась но туж кулэ. Лидия Боброва сыӵе дыръя сюлэмзэ котькудӥзлы усьтыны дась. Удмуртиысь Калыкез улон-вылонын утёнъя министерствоын но ӟеч сюлэмо нылкышно сярысь кылытэк ӧз кыле. Мылкыдзэ ӝутказы Россиысь устоез соцужасьёс пӧлын ӵошатсконэ пыриськыны. Отын Лидия Боброва куинетӥ инты басьтӥз. Ачиз туннэ ке но уг оскы, Россиысь Правительстволэн Тӧроез Д. Медведев, киоссэ кутылыса ик, ӟечкылаз шуыса.

Елена Фёдорова

Удмурт Дунне
By Удмурт Дунне 10 июня, 2013 15:21