Быдэс гуртэн — Гершыдэ

Удмурт Дунне
By Удмурт Дунне 11 июня, 2013 13:46

Быдэс гуртэн — Гершыдэ

Вӧсяськонын

Вӧсяськонын

Тулыс гырон-кизёнэз быдтонлы сӥзьыса, 1992-тӥ арысен элькунамы ортче Гербер праздник. Шонерзэ вераса, та шулдыръяськонэз вашкалаос мукет дыре пусйылӥзы. Нош кизён ужъёсты йылпумъяса, ортчытъязы Гырон быдтон яке Гершыд — таосыз бӧрысь огазе луылӥзы Трочинен. Со пумысен пыр-почгес мадемын «Удмурт оскон» книгаын Т. Перевозчикова-Владыкиналэн но В. Владыкинлэн «Ар ӵоже ортчись удмурт сям-нергеос» статьяязы. Сётӥськомы отысь оглюкетсэ.

Тулыс бусы ужъёсыз йылпумъямен валче но ю-нянь ӟеч мед удалтоз шуыса, тау карон-курон йылолъёс-нергеос ортчытыны кулэ луэ вал, дыр.

Самой тани та вакытэ, гужем шунды берыктӥськон азьынгес — инвожоез пусйыны кутскыку — огазе луизы языческой Гырон быдтон (Кизён быдтон, Акашка), Гершыд (Ю вӧсь, Бусы вӧсь) но Трочин(ь) (Куар басьтон, Куар вӧсян) праздникъёс.

Та пумысен уно примеръёс вераны быгатӥськомы:

«Кизёнэз быдтэм бере луэ Трочин… Со нуналэ Гершыд праздник кариськомы» (Гожня);
«Бусы вӧсез азьвыл Гершыд шуылӥзы. Сое ортчыто вал тулыс ю кизён бере» (Атасгурт);
«Ю вӧсез быдэс гуртэн ортчытъязы тулыс ю кизён бере» (Вылӥ Асангурт);
«Бусы вӧсез Трочинэн ӵошгес ортчытъяло вал» (Можга ёросысь Пичи Копка);
«Бусы вӧсез Трочинлэсь арнялы азьвылгес ортчытъяло вал» (Варни);
«Бусы вӧсез лымы бырем бере ортчытъязы. Быдэс гуртэн Гершыдэ мынылӥзы» (Выль Вамъя);
«Быдӟымнунал бере тямыс арня ортчыса, луэ вал Куар басьтон. Сое пусйылӥзы тулыс ужъёс бере. Али та нуналэ колхозамы Гырон быдтон ортчылэ» (Почешур).

Ваньзэ та верамъёсты огазеяса, тазьы шуыны луэ: Трочин(ь) — Троица — христиан праздниклэн пуштросэз гырон-кизёнэз йылпумъян языческой календарной праздникен герӟаськемын. Со гырыны потон праздник дыръя вал вылын ворттылыса шулдыръяськонэн матын луэ (Пытсам, Каӟес, Гожня, Лебедевка, Алганча-Игра). Та нуналэ, коркась корка ветлыса, нимысьтыз кудые курегпуз люкаллязы, ӵошатсконын вормисе потэмлы кузьман понна выль кенъёслэсь чалмазэс, тамак пуйызэс курылӥзы (Лебедевка, Пытсам, Баграш-Бигра). Нырысь вуэм валэз вӧсям ӝукен сюдылӥзы (Пытсам).

Праздникъёслэн туж кулэ люкетсы — семьяен гинэ (ас музъем вылад) яке быдэс гуртэн пудо вандыса вӧсяськон. Самой та вакытэ нимо-дано бадӟым вӧсяськонъёс ортчыло: Булда вӧсь (Ӵожес, Бадӟым Пудга, Кузёбай), Дэмен вӧсь (Мельниково). Та вӧсьёсы 10-12 гуртъёсысь улӥсьёс люкаськылӥзы.

Вӧсяськон нуналэ котькудӥз семья, ас музъем вылаз мыныса, пу лопаткаен гудӟем сюе мушник но буям курегпуз понэ (Вуж Салья); курегпуз гинэ (Баграш-Бигра); нянь кӧм, курегпуз кӧм но буям курегпуз (Гожня). Ваньмыз соос Мукылчинлы нимаса сётэмын луо: «Вить чиньы пыр пазьгем ю-нянь ӟеч мед потоз, выжыысеныз кутскыса йылозяз мед тысялоз!»

Собере быдэс гурт вӧсяськыны юри быръем интые лыктэ. Бадӟым пуртыын ӝук но шыд пӧзьто, соосты вӧсяло, Инмарлэсь удалтэм ю-нянь но сое нымы-кибылэсь утьыны куро: «Ю-нянез нумыр медаз партма» (Вуж Салья). Куд-ог гуртъёсын праздник одӥг-кык нунал кыстӥськылӥз (Алганча-Игра), куд-огаз — куинь-ньыль нунал (Баграш-Бигра, Вуж Салья), мукетаз — арня (Казакгурт).

* * *
1985-тӥ арын инвожо толэзе Татарстанысь Агрыз ёросысь Варклет-Бӧдья гуртын милемлы гожтыны удалтӥз Гершыд йылоллэсь ортчемзэ.

Али та праздникез тулыс бусы ужъёс йылпумъяськем бере — шутэтскон нуналэ — кутско. Вӧсяськыны кутскемлэсь кык нунал азьло вӧсь нерге ортче, коркась корка ӧтчаськыса-юмшаса ветло. Мӧйыос та праздниклы сӥзем вӧсь гур кырӟало. Варклет-Бӧдьяын кык вӧсь гурзы вань: Бадӟым куа выжылэн но Луд выжылэн.

Ваньмыз вӧсяськонъёс вӧсь нерге бере кутскылӥзы.

Нырысетӥ нуналаз — ю вӧсь келян. Али сое муш бакчаын ортчыто, со самой чылкыт инты шуыса. Татын вӧсь шыд пӧзьто.

Кыкетӥ нуналаз — кулэмъёслы куяськон. Люкасько юромо быръем интые. Сьӧразы одӥг-кык курегпуз, нянь вандэт но аракы басьто. Быръем интыязы нянь юдэсъёс, курегпузъёс куяло, соос вылэ кӧня ке аракы кисьто. Собере, ыжез яке такаез вандыса, ӝук пӧзьто. Ваньзы ӵош сиськыны пуксемзылэсь азьло ньылпуос выжые одӥг-кык пуньы ӝук поно.

Куинетӥ нуналаз — Инмарез буре вайыса вӧйын нянен вӧсяськон. Инмарлы сӥзьыса, ошез яке ветылэз вандо. Ӝук пӧзьто. Вандэм пудолэсь лыоссэ суто, сиёнэз вӧсякузы тылало.

Ньылетӥ нуналаз Инмарлы вӧсяськон мынэ на. Таяз радэ азьвыл тылскем бервылысь палэнэгес тылско. Вандэм пудолэсь лыоссэ суто.

Витетӥ нуналаз Мукылчинлы вӧсясько. Таяз нуналэ вӧсям сиёнэз та гуртын улӥсьёс гинэ сиё. Палэнысь лыктэмъёслы татын пӧзьтэм сиёнэз сиыны уг яра: озьытэк музъемлэн дэлетэз, пе, палэнэ кошке. Вандэм сьӧд ошлэсь яке такалэсь лыоссэ тылскем вӧзы сюе сого.

Куатетӥ нуналаз — татчы пырись самой бадӟымез йылол-нерге — йыбырттон. Азьвыл аръёсы вандылӥзы чуньы но кык ӟазег — «чуньы сермет».

Вӧйын нянь, куарнянь, сӥль вӧсяло, вӧсям сиён юдэсъёсты тылало. Собере вылӥ инмаръёслы куясько: йӧногес кызлэсь улвайёссэ огинэ пуно но со вылэ вӧсям сиёнэз тыро. Та нергезэс «вылэ мычон» шуо. Вӧсясьёс, котькуд сиёнэз вӧсякузы, асьсэ понназы курисько. Одӥг яке кык пол йыбыртто. Соос бӧрсьы вань люкаськемъёс йыбыртъяло. Шыдэз но сӥлез лыктэмъёслэн тэркыосазы воргоронъёс — вӧсясьёслэн юрттӥсьёссы — тыро (кышномуртъёс та уже уг пырисько). Семьяос люкенак-люкенак нимазы пуксё но сиськыны кутско. Кылем сиёнэз пыд улэ уг куяло — тылэ кисьто яке гуртазы нуо. Вӧсям сиёнэз сиемзы бере нош ик тылскем доры люкасько. Вӧсясьёс кыз доры мыно но «вылэ мычемез» васькыто. Отысь ӝынызэ тылэ куяло, кылемзэ вӧсясьёслы но соос-лэн юрттӥсьёссылы сюдо.

Собере «люгезь вӧсян» кутске. Вӧсясь кутэ ӵушкон, со вылэ лыктэмъёс коньдон тыро, вӧсясь лымшор пала берыктӥське но вӧсяськыны кутске.

Вӧсь кылъёссэ верамез бере, тылскем доры лыктыса, люкаськемъёслы таӵе кылъёсын вазиське: «Сётэм уксёды сюэн-сюрсэн мед берыктӥськоз». Со пумитэ ваньзы вазё: «Вӧсям вӧсед кабыл мед луоз». Та люкам коньдонэз вӧсям пудолэн кузёезлы сёто. Пудоез вӧсяны сётон — бадӟым дан, соин ик котькудӥз семья, черодзэ возьмаса, улэ. «Люгезь вӧсян» бере ваньзы гуртазы берто. Но котькуд семьяысь кин ке кылем нянез яке куарнянез басьтыны ӝегатске на. Со нуналэ куиняз ик тылскем интыосын «пидсаса йыбыртто». Собере вӧсясьёс музъем вылэ вӧлдэм вайёсты (отчы вӧсяно сиён-юон пуктэмын) «вылэ мычонлы» матэгес ышыг интые поно: табере соос татын вуоно арозь — выль вӧсь дорозь — улозы. Мималаоссэ вайёсты суто. Лыосты сутӥзы ини.

Вӧсяськон интыысь кошкон азязы ваньзы шундылы нялтас берытско.

Сизьыметӥ нуналаз — акташлы вӧсяськон. Таиз толло «йыбырттэм» интыен артэгес ортче. Котькуд коркась куарнянь но кеньыр ваё. Азьвыл аръёсы чечылэсь мусур вайыло вылэм, нош али шербет лэсьто, така вандо, ӝук пӧзьто. Котькуд сиёнэз нимаз-нимаз вӧсяло. Толоназ сямен ик, «вылэ мычонлы» векчи улвайёсты пуно но, со вылэ сиён тырыса, кыз борды юнмато, сюсьтыл ӝуато. Вань лыктэмъёслы ӝыны куарняне бинялтэм сӥль люкыло, собере ӝук сётъяло. Сиськемзы бере ваньзы, ӝыны-ӝыны люкетэн кариськыса, вӧсяськыны пыдесъясько: азьпалазы — пиосмуртъёс, мышказы — кышномуртъёс. Выль кулэмъёслы вань семьяос сылыса вӧсясько. Йыбырттэмзы бере ваньмыз кошко, вӧсясьёс но соослэн юрттӥсьёссы гинэ кылё на — «вылэ мычонэз» утялтон но кылем арынзэ улвайёсты сутон понна.

Тямысэтӥ нуналаз — сьӧрлон кулэмъёслы куяськон. Таиз нерге вашкала интыысьтызы ӵыжы-выжыоссэс буре ваёнлы сӥземын вылэм (Варклет-Бӧдьяе лыктӥллям, пе, Пичи Пурга вӧзысь Бӧдья гуртысь вашкалаос).

Буре вайыны лыктэмъёс таяз нуналэ уг вӧсясько, соос азьвыл вӧсяськон интызылэсь шур улланегес васько но тупал ярдуре выжо. Сӥль лымын пӧзьтэм ӝукез, сьӧразы ваем няньзэс, курегпуззэс сиемзы бере, кылем сиён-юонэз кызъёс выжые тырыса, куясько — сьӧрлон кулэмъёссэс буре ваё. Котькудӥз семья ас выжыысьтыз кулэмъёсты буре вае.

Та йылолэн Гершыдлы вӧсяськон йылпумъяське.

* * *
Гербер (Гужем юон, Куарсур, Пинал мудор, Петрол, Петровка, Петров нунал) — гужем праздник, со нунал берытскон вакытэ ортчытӥське. Тройча но Петров нуналъёс вискы тупа. Со нуналъёсты вожо потон толэзь, инвожо яке вожодыр («воштӥськон вакыт»); ӵошатэ: толшор вожодыр — толалтэ нунал берытскон вакыт нимало.

Туала Герберез 12-тӥ пӧсьтолэзе ортчытъяло. Шуо: та нунал, пе, «музъемлэн берпуметӥ праздникеныз» герӟамын (Шаркан ёросысь Пашур-Вишур). Зэм но, та нуналозь ваньмыз гырон-кизён ужъёс йылпумъясько. Соин ик со Гербер нимаське (Дэдэ). Кудӥз тае Куарсур шуэ: та вакыт гужемлэн ӵыдонтэм шулдыр дырыз. Та праздник бере вань гуртоос турнаны пото (Дэдэ, Вылӥ Асангурт, Варни, Якшур, Пашур-Вишур).

Удмурт Дунне
By Удмурт Дунне 11 июня, 2013 13:46
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<