Югдытӥсь

Удмурт Дунне
By Удмурт Дунне Май 31, 2013 11:44
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Югдытӥсь

А. Уваров (шорысез) удмурт писательёсын

А. Уваров (шорысез) удмурт писательёсын

Тямысэтӥ инвожое удмурт кылбурчилы, берыктӥсьлы, тодосчилы Анатолий Уваровлы 80 ар тырмоз. 23-тӥ куартолэзе Ижкарысь Н. Некрасов нимо библиотекаын солы сӥзем ӝыт ортчиз.

Пумиськонлы кичӧлтон сётӥзы писательлэн ӵыжы-выжыосыз, ӵош дышетскем но ужам эшъёсыз. Удмуртиысь Писательёслэн огазеяськонзылэн тӧроез Е. Загребин ӟеч ивор вайиз: оскон вань, Ижысь Удмуртской урамын А. Уваровлэн улэм коркаяз писательлэн нимыныз буре ваён пул юнматозы. Таӵе дэмланэн огазеяськон вазиськиз Ижкар администрацие.

Анатолий Николаевич Уваров вордскиз Алнаш ёросысь Куашкам гуртын. Улон сюресэз, пичи гуртысен кутскыса, вуттӥз Европаозь. Токарьын ужаз, басьтӥськиз кылэз, литератураез эскерон борды. Тыршиз Удмурт радиолэн пӧртэм редакциосаз, нырысь берыктӥсь вал, собере корреспондент но редактор. Заочно йылпумъяз Удмурт кун университетысь историяя но филологияя факультетэз но Ленинградысь вылӥ партийной школалэсь журналистикая люкетсэ. Берытскиз «Удмуртия» книгапоттонние.

1969-тӥ-1972-тӥ аръёсы А. Уваров Мускоын СССР-ысь Наукаосъя академилэн Дунне литература институтаз аспирантураын дышетскиз. Соин ӵош дышетскиз вуоно лингвист Р. Насибуллин. Риф Шакрисламович люкаськемъёслы мадиз, кызьы Анатолий Николаевич секыт висёнэн курадӟись анайзэ эмъяны выриз: куанер студент, мумызэ Муское вайыса, врачъёс дортӥ нуллӥз — но бер вал ини…

1976-тӥ арын А. Уваров «Художественное своеобразие удмуртской сатиры» диссертацизэ уте, филология наукаосъя кандидат луэ. УдНИИ-лэн литературая но фольклоръя сектораз ужаны кутске. Солэн ужъёсыз сӥземын удмурт литературалэн историезлы, уката ик удмурт сатиралы. Со тупатъяз венгер литературоведлэсь Петер Домокошлэсь ӟуч кылэ берыктэм «История удмуртской литературы» монографизэ. А. Шкляев литературоведлэн чакламезъя, ӵапак А. Уваров вайиз П. Домокошез Удмурт шаере. Анатолий Николаевич пичияк венгер кылын вераське вал.

1984-тӥ-1990-тӥ аръёсы А. Уваров «Молот» журналлэн редакторез вал. «Югдытӥсьёс» книгаяз удмурт литератураез кылдытӥсьёс сярысь очеркъёс люказ, асьмелы выльысен Кузебай Гердэз усьтӥз.

Пенсие потыса, писатель кунсьӧр литератураез удмурт кылэ берыктон борды басьтӥськиз. Паймоно кадь, со выжтӥз удмурт кылэ Вашкала Грециысь но Римысь драматургъёслэсь Еврипидлэсь но Сенекалэсь драмаоссэс: Удмурт театрын пуктэм «Медея» («Яратон но вожан») спектакльлы инъет кылдытӥз. 2001-тӥ арын пичи тиражен потэмын солэн удмурт кылэ берыктэм «Калевалаез». Фин «кырӟан-мадь» (тазьы нима сое автор) дуннеысь 51 кылэ берыктэмын. Писательлэсь лэсьтэм ужзэ ӝытын эскериз В. Шибанов. Ум янгышалэ, та уж — удмурт кылэ берыктэмъёс пӧлысь огез тужгес кужмоез шуимы ке.

Анатолий Николаевич туж яратӥз удмурт кылъёс пӧлын копаськыны, кыллюкамъёсын утчаськыны. Кылэз со ӟеч шӧдэ вал.
Шуныт кылъёс вераз классиклэн пиез но, Ижысь медициная академиын дышетӥсь, медицина наукаосъя доктор Иван Уваров. Огез жаль, вераськон ӟуч кылын ортчиз.

Дарали Лели

Удмурт Дунне
By Удмурт Дунне Май 31, 2013 11:44
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<