Ыбысь этнопарк но Лудорвайысь музей

Удмурт Дунне
By Удмурт Дунне 21 мая, 2013 10:54

Ыбысь этнопарк но Лудорвайысь музей

Тангыра вӧзын

Тангыра вӧзын

Сыктывкарлэсь ог витьтон иськемын Ыб черкогурт сылэ. Солэн ортчем сюресэз кузь.

Дас ньылетӥ дауре отчы шур кузя тодмо миссионер-просветитель Стефан Пермский вуэм. Гуртысь пиосмуртъёс, Стефанлэсь ма муген лыктэмзэ тодыса, солы пыжысьтыз васькыны ик сётӥллямтэ, шораз изъёсын лэзьяллям. «Тӥ ӟеч улонэз уд адӟе», — шуэм, пе, миссионер кошкон азяз ярдуре люкаськем калыклы.

Трос ик дыр ортчымтэ, Ыбысь пиос кулылыны кутскиллям. Ма муген, туночиос но уг тодо, пе. Тӥни соку гуртоос Стефанлэсь кылъёссэ тодазы вайиллям, сое ассэ утчаны кутскиллям. Стефан выльысь вуэм Ыб гуртэ. Отчы со черк пуктытэм, калыкез чукиндырытэм. Тазаесь пиосмуртъёс кулэмысь дугдӥллям…

Ыб черкогурт вӧзы интыяськем фин-угор этнокультурая паркын ужасьёс та сярысь одно ик мадё. Этнопарке лыктэмъёслэн син шоразы нырысь ик йӧто дуннеысь но Россиысь фин-угор кунъёслэн но элькунъёслэн куншетъёссы (флагъёссы), соос ӝужыт юбоосын тӧлало. Куноосты пумитаны нимысьтыз юрт пуктэмын, отын пӧртэм адӟытонъёс возьматон залэз но, «Финноугория» кафеез но, кузьымъёс вузан лавкаез но, нылпиослы комнатаез но, эм юрттэт сётонъя кабинетэз но вань. Со юртысь потыса, Чупаськон выж вылтӥ ортчиськод но паськыт азбаре вуиськод. Пыд улын — пу питранъёс. Сӥзьыл, тулыс куазен но татӥ капчиен ветлод, дэри уг луы.

Комиослэн чумзы

Комиослэн чумзы

Комиослэн чумзы но пу корказы мукет юртъёслэсь висъясько, соос сокем бадӟымесь ӧвӧл угось. Мылкыд карисьёс отын кӧлыны но быгато. Чумын корт гурез но вань, толалтэ сое эстыны луэ.

Конгресс-холзы туала куронъёсъя ӝутэмын, пӧртэм ужрадъёс ортчытъяны чакламын. Солы кыдёкын ик ӧвӧл «Финноугория» кунокуа (гостиница). Куд-ог номеръёсаз быдэс семьяен шутэтскыны луоно.

Нылпиослы «Выжыкыл сюрес» малпамын, нюлэс пушкытӥ со ортче. Пиналъёс, отӥ мыныкузы, Ӟичыен но Драконэн пумисько, собере соос Баба Ягаез дэмен утчало. Пересь Яга нырысь гинэ кӧшкемыт адӟиське, бӧрысь со пиналъёсын ӵош шулдыръяське.
Толалтэ пиналъёс но мӧйыос пужейёсын ворттылыны быгато…

— Таиз сьӧд кужымъёсты уллян инты, — бадӟым питранлы укшась арбери шоры возьматыса, вераз кышномурт-экскурсовод. — Удмуртъёслэн со. Шальыен та арберие шуккылыса-йыгаса, адями ас пушкысьтыз сьӧд кужымзэ улля, паркмес но чылкытатэ.

— Тангыра со нимаське, — шара вази мон, шумпотэмме ватытэк.

— Азьланьын ми татчы мукет фин-угор калыкъёслэсь но тунсыко арбериоссэс, киужъёссэс вайылыны тыршом. Котькуд калыклы сӥзем сэрегмы луоз, — валэктӥз экскурсиез нуись.

Этнопарке ветлӥсьёс трос. Уноез адямиос нырысь Ыб черкогуртэ лыкто, отысь черке, нылкышно монастыре пырало, ошмесъёсысь тазалыкез юнматӥсь ву басьто, собере этнопаркен тодматско.

Этнопарктӥ ортчыса, мон амалтэк тодам вайи «Лудорвай» музеймес. Соослэн котькудӥзлэн аслаз сюресэз, азязы сылӥсь ужпумъёссы. Валамон, этнопаркез кылдытыны но ӝутыны трос коньдон быдтэмын. Озьы уд шуы инбам улысь музеймы сярысь. Асьмелэн но медло вылэм туала куронъёслы тупась кунокуаез, тунсыко киужъёс, кузьымъёс вузан лавкаосыз, ужрадъёс ортчытъян бадӟым залэз…

«Лудорвай» музее ветлӥсьёс пӧлысь тросэзлы тӧл вуко кельше. Со вӧзын туспуктэмъёс лэсьтыло, пушсэ рос-прос учкыло. Вуко нуналлы быдэ сямен ужасал ке! Соку музее ветлӥсьёс уката трос луысалзы. Мынам но тӧл вуколэсь ӟукыртыса ужамзэ адӟеме потэ.

Туэ инбам улысь музейын Гербер шулдыръяськон уз ортчы. Со понна мон шумпотӥ. Отын сыӵе бадӟым шулдыръяськон радъяськыны кулэ ӧвӧл. Музейлэн аслаз ужрадъёсыз тырмыт.

Коми Элькунысь этнопарк но «Лудорвай» музей. Соос ог-огенызы адӟиськисьтэм сиосын герӟаськемын. Кыказ ик калык культураез, йылолъёсты, анай кылэз утён но азинтон сярысь сюлмасько. Музеймылы но этнопарклы матысь кусыпъёс возьыны, эшъяськыны иськемъёс медаз люкетэ вылэм.

Ульфат Бадретдинов
Туспуктӥз автор

Удмурт Дунне
By Удмурт Дунне 21 мая, 2013 10:54
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<