«Вызываю огонь на себя!»

Удмурт Дунне
By Удмурт Дунне 6 мая, 2013 12:59

«Вызываю огонь на себя!»

Пичи Пурга ёросысь Вуж Мӧнья школаын пумиськон

Пичи Пурга ёросысь Вуж Мӧнья школаын пумиськон

Ӝыныез ӧз берытскы…

Пичи Пурга ёросысь Вуж Мӧнья школаын кемалась ик ӧвӧл тунсыко пумиськон ортчиӟ дорамы вуылӥз Россиысь Писательёслэн огазеяськонзылэн ёзчиез, Быдӟым Оте- чественной войналы сӥзем уно ужъёслэн авторзы Николай Спиридонович Кузнецов.

Со ми доры буш киын ӧз лыкты. Сьӧраз ваем гуртамы вордӥськемъёслэн Быдӟым ожын нюръяськемзылы, наградаос басьтэмзылы сӥзем материалъёс-документъёс. Гуртысь мӧйыезлы но, егитэзлы но та ужрад шуныт мылкыд кузьмаз.

Нырысь ик люкаськемъёс учкизы пиналъёсын дасям «Нокин ӧз вуны, номыр уз вуны» видеофильмез. Со сяна, дышетскисьёс тунсыко адӟытон но возьматӥзы: Вика Фёдорова ож лудысь пизэ возьмась анайлэсь рользэ быдэстӥз — тросэзлэн синъёссы нюромизы. Гуртысьтымы мӧйы калыклэн выльысь тодаз лыктӥз, вылды, со шимес вакыт. Кӧня адями кунмес утёнлы улонзэ сётӥз.

Пичи Пурга ёросысь войнае кошкиз 6 сюрс 460 адями, ӧз берытскы ни 3 сюрс 610-эз. Соос пӧлысь 1 сюрс 366-ез ож лудъёсын быризы. 1 сюрс 926 адями ивортэк ышемен лыдъяське, концлагерьёсын быриз 26 адями, госпитальёсын улонысь кошкиз 256 адями.

Тани басьтом Вуж Мӧнья гуртмес. Войнае кошкемын 110 адями. Соос пӧлысь быремын 75-ез. Поселениямы пырись Итэш гуртысь ож лудэ вамыштэмын 91 мурт, быремын 55-ез, Быстрово гуртысь оже кошкемын 43 адями, быремын 24-ез, Буро-Ӝикъя гуртысь 76 воргорон пӧлысь ӧз берытскы 56-ез, Иж-Бобья гуртысь 54 мурт пӧлысь дораз ӧз вуы 35-ез. Кытын, ку быризы? Таос пӧлысь уноез сярысь туннэ нуналэ но ум тодӥське на. Уен-нуналэн возьмаськыса ик, сопал дуннее кошкизы кузпалтэк кылем кышномуртъёс, пиоссэс ыштэм анайёс. Сюлэм вӧсь. Ортчемзэ тодыса но сое сӥс пыр поттыса гинэ, азьлане шонер сюрес бырйыны луэ.

Пичи Пурга ёросысь Вуж Мӧнья поселение пырись гуртъёсын орденэн пусъем адямиос туж трос. Николай Кузнецов сьӧраз архивысь туж тунсыко документъёс ваем. Кыӵе ожын но ма понна орденъёс басьтӥллям улосчиосмы? Угось соослэсь улэм-вылэмзэс тодыса, чылкак паймиськод: огшоры удмурт гуртын вордӥськем пияшъёс макем кышкасьтэм но визьмо вылӥллям.

Ефрейтор Пётр Тарасов

Вуж Мӧнья гуртысь потэмын гвардиысь ефрейтор Пётр Васильевич Тарасов. Солы оскемын вал сапёрлэн ужез. 1945-тӥ арын 21-тӥ январе, асьмелэнъёс Германиын ожмаськыку, Пётр Тарасов Гольдап городын самоходной пушкаез нуиз-валтӥз. Немецъёслэн ыбылэмзы, пуштылонъёс улсын со быгатӥз тушмонэн пуктылэм 61 противотанковой но 100 противопехотной минаосты, озьы ик одӥг фугасэз быдтыны, эшъёсызлэсь улонзэс утьыны. Таӵе кышкасьтэм луэмез понна Пётр Васильевич пусъемын III степенё Слава орденэн. Ожысь бертыса, Пётр Васильевич мӧйымытозяз школаын дышетӥз. Гурт калык сое туж гажаз. Лёгем сюрессэ азинтӥзы солэн нылпиосыз — нылъёсыз но пиез быдэс улонзэс сӥзизы пиналъёслы.

Сержант Устин Фёдоров

Гуртысьтымы мукетыз герой — Устин Фёдорович Фёдоров. Сержант, санитар-инструктор. Ож кутскем бере ик со фронтэ кошкиз. 1944-тӥ арын 26-тӥ июле Польшаысь Соколяны гурт дорын ортчись ожъёс дыръя Устин кулонлэсь утиз 32 муртэ — пельпумъёсыз вылэ ныпъяса, котькудзэ ож лудысь поттӥз, нырысетӥ юрттэт сётӥз. Таиз кышкасьтэм пияш пусъемын Быдӟым Отечественной войналэн II степенё орденэныз. Войнаысь Устин Фёдорович быдэскын берытскиз. Колхозэз ӝутӥз, семья кылдытӥз. Школаын дышетскисьёс сое арлы быдэ ӧтчаллязы кышкасьтэм луонлы, Быдӟым ожлы сӥзем урокъёсы.

Лейтенант Семён Егоров

Александр Невский орденэн пусъемын Вуж Мӧньяын вордскем Семён Егорович Егоров. Со гвардиысь лейтенантлы оскемын вылэм взводэн кивалтыны. Та удмурт пияшлэн подвигез сярысь эшъёсыз гожтӥзы: «Восточной Пруссиын Гумбиннен город дорысь Грюнвайтшен гуртын ӟырдыт ожъёс мынӥзы. Тушмонъёс «Тигр» танкъёсын асьмелэнъёс шоры ыбылыны кутскизы. Егоров эш ӧз сётскы: взводысь солдатъёссэ весь бурдъяса возиз, вистэм-вожтэм ыбылыны косӥз. Озьы пуштытэмын вал тушмонлэн куинь «Тигрез», быдтэмын куинь пулемёт, 30 пала автоматчикъёс. Гитлеровецъёс кышказы, берлань чигнаны кутскизы». Войнаысь вуыса, Семён Егорович рос-прос басьтӥськиз гуртысьтымы колхозэз ӝутон борды. Та удысын но со ассэ котыр ласянь адӟем карымон возьматӥз.

Лейтенант Павел Яконаев

Вуж Мӧнья поселение (соку сельсоветэ) пырись пор гуртын — Иж-Бобьяын — вордскемын Павел Яконаевич Яконаев. Ож кутскыку, со Горд Армие кошкем вылэм ини. Лейтенант кивалтэм стрелковой взводэн. Тани ма гожъязы газетъёс Павел Яконаевичлэн подвигез сярысь: «1944-тӥ арын 30-тӥ июне Могилёв улосысь Свислочь инты дорын тушмонъёс контратакае ӝутскизы. Соос туртто вал Свислочь шур вамен выжез киултыны но Минске нуись шоссее потыны. Пётр Яконаев, стрелковой взводэн кивалтӥсь, солдатъёссэ лӧпкытъяӟ тушмонлы ум сётске! Взводэныз ӵош со ачиз но ӟырдыт мылкыдын ожмаськиз. Быдтӥз 13 тушмонэз. Огъя вераса, солэн взводэз ваньзэ-ӧвӧлзэ быдтӥз 200 немецез, 7 тушмон пленэ кутэмын вал».

Та подвигез понна со пусъемын Быдӟым Отечественной войналэн II степенё орденэныз. Ожысь бертыса, Пётр Яконаевич вордскем гуртаз тыршиз. Пиналъёсты пионере, комсомолэ пыртон та йӧно воргоронтэк ӧз ортчылы.

Генерал-лейтенант Михаил Мымрин

Быстрово гуртын вордӥськемын Михаил Григорьевич Мымрин. Война пыр потыса, йылпумъяз Ф. Дзержинский нимо военной академиез, СССР-ысь Обороная министерствоын противовоздушной войскоос понна кыл кутӥз. Со туж визьмо инженер вылэм. М. Г. Мымрин пусъемын Ленин, Горд Знамя, Александр Невский, Октябрь Революция, Ужысь Горд Знамя орденъёсын но Быдӟым Отечественной войналэн I степенё орденэныз.

Майор Александр Тепляков

Егит арлыдыз шоры учкытэк, Быдӟым ожез пырпотӥз. Быриз со Чехословакиез тушмонъёслэсь мозмытон вакытэ — 1945-тӥ арын 2-тӥ оштолэзе. Чехословакиысь одӥгез школа кема дыр ӵоже нуллӥз удмурт пияшлэсь нимзэ. Вуж Мӧнья школаын дышетскисьёслы, эсьмаса, чех огъёзъёссылэсь гожтэтъёс но вуылӥзы. Чехъёс вераллязы удмурт музъемлэн пиеныз данъяськон мылкыдзы сярысь. Вуж Мӧнья школа но кема дыр ӵоже ини А. Г. Тепляковлэсь нимзэ нуллэ.

Быстрово гуртлэн вырйылаз сылэ солы сӥзем синпелет. Со котырын радъясько Быдӟым Вормонлы сӥзем ужрадъёс. Солэн подвигез сярысь ӵош ожмаськем эшез тазьы гожъяӟ «Тодам вайисько 1943-тӥ арын Курской дугаысь Поныри чугун станция дорын ожмаськеммес. Милям батареямы вылэ лыкто 100 пала «Тигр» танкъёс. Ӧз куалекты Александр Тепляков. Визьмо валэктонъёс сётъяз. 60 пала танкъёс гомӟизы, нош кылемъёсыз кышкаса берлань чигназы. Нош кӧня ке улыса, омырын адӟиськизы немец бомбардировщикъёс. Саша ӝог зарядить кариз 76 миллиметръем пушкаез. Ӝоген самолёт, шимес вузыса но тылын гомаса, музъем вылэ усиз. Та подвигез понна кышкасьтэм ожгарчи Горд Знамя, Александр Невский орденъёсын пусъемын.

Тепляковлэн быремез но туж геройлыко. Тушмонъёслэсь котыртэмзэс адӟыса, эшъёсызлы со кеськиӟ «Вызываю огонь на себя!» Озьы быдтэмын вал уно тушмонъёс. Соосын ӵош быриз удмурт пияш но.
* * *
Та ужрадын ми, вуж мӧньяос, трос выльзэ тодӥмы на оже пыриськем укмыс улосчиосмы сярысь. Николай Спиридонович дэмлаз Вуж Мӧнья гуртысь урамъёслы сётъяны оже пыриськем батыръёслэсь нимъёссэс.

Мария Никитина,
Пичи Пурга ёросысь Вуж Мӧнья школаысь дышетӥсь

Удмурт Дунне
By Удмурт Дунне 6 мая, 2013 12:59
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<