«Война сярысь пал кыл но ӧм поттылэ»

Удмурт Дунне
By Удмурт Дунне 11 мая, 2013 23:20

«Война сярысь пал кыл но ӧм поттылэ»

М. Морякова

М. Морякова

Кылем толэзе 89 арес тырмонзэ пусйиз Якшур-Бӧдья черкогуртын улӥсь Мария Ильинична Морякова. Ужысь но ожысь ветеран трос секыт аръёс пыр потӥз. Война вылтӥ эвакогоспитальын эмъяз. Пусъемын Отечественной войналэн II степенё орденэныз.

Секыт сӥзьыл
Вордскемын мон Якшур-Бӧдья ёросысь Кионгоп гуртын. 1-тӥ классын Ванькагуртысь школаын дышетски, нош собере Кыква гуртэ ветлӥмы. Удалтӥз 7 классэз йылпумъяны. Анай-атае колхозын ужазы, атаймылэн 4 класс дышетскемез вал. Туж синмаськылӥ 12 ареслы бадӟым Даниил агаелы. Визьмызъя атаймы выжые мынэм, лэся. Средней образованиен агае Сюмси черкогуртын судьяын ужаз. Ижысь мединститут усьтӥськем бере отчы дышетскыны пыриз.

Оло солэсь адӟем карыса, оло анаймы ӵем висьылэмысь (со ревмокардитэн курадӟиз), мон 7-тӥ класс бере Ижысь фельдшерской школае пыри. Огвакытэ агаеным ӵошеннамы медицина удысын тодон-валан люкамы. Ваньмыз каллен радъяськиз ни вал. Но берпуметӥ курсъёсын, 1940-тӥ-1941-тӥ аръёсы, дышетсконэз дунэн каризы. Со сӥзьыл кыкнамылы ик коньдон утчано луиз: агаелы 150 манет, мыным 75 манет. Вераны луонтэм дуно вал со. Чаклалэ асьтэос: медсестра толэзьскын 3 манет уждун басьтылӥз.

Сӥзьылаз агае дорам лыктӥз но шуиз: тыныд юрттыны уг быгаты, нош аслым кызьы ке коньдон утчало. Быдэс сӥзьылзэ уен-нуналэн станциын тыршиз. Со сӥзьылаз ик мукет сюлмаськон семьяямы йыгаськиз. Октябрь толэзе атаймес Илья Михайлович Русановез куать арлы тюрьмае келязы, «без права переписки», пе. Семьямес огназ сюдӥсь муртэ калык тушмон радэ пуктӥзы. Атаймы котькыӵе ужлы усточи вал: сӥзьыл-тулысъёсы лэсьтӥськон удысын тыршиз, толалтэзэ — тэльын, гужемзэ жнейкаен араз. Ваньмон дыръяз лыдӟиськыны яратӥз, со ик умойтэме вуттӥз. Гуртамы атаймы гинэ «Удмуртская правда» газетлы гожтӥськылӥз, вань статьяосты сак лыдӟиз, тунсыкъяськиз политикаен. Со вакытэ Совето Союз Германиен тупаса улон вылысь огкыл гожтӥз, нош атаймы эшъёсыз пӧлын вераны шедьтэм, Германилы оскон пичи шуыса. Чагиськисьёс шедиллям, калык пӧлын агитация нуэ шуыса, сое тюрьмае келязы.

Таӵе иворез тодэме бере фельдшерской школаын дышетскон сярысь малпанъёсме пыдло ватӥ. Гуртэ бертон сюресмы 60 иськем пала люкаськылӥз, пыдын ветлӥмы. Якшур-Бӧдьяез ортчыса, кутъёс пӧсьтылӥзы. Дорам жуммыса вуи, анаелы бертон мугме верай. Таӵе ивор анайме эшшо но ӟигартэм кельтӥз кадь. Атаедлэн туж дышетэмез потэ вал тонэ, оло, гурт калык маин ке юрттыны быгатоз?

Вань ыжъёсмес вузаса, коркась корка кураськыса ветлыса, кӧня ке нунал куспын анае тырмыт коньдон люказ. Озьы мон нош ик дышетсконме азьланьтыны быгатӥ.

Гудыръясь гужем
1941-тӥ арын июнь толэзе куинь предметэн госэкзамен сётӥмы, 22-тӥ июне берпуметӥез — хирургиен — луыны кулэ вал. Вазь ӵукна султӥ, радиоез кысӥ, экзаменлы дасяськыса, пукисько. Час пала лыдӟиськеме бере бускель нылаш дорам бызьыса пыриз: «Включай радио! Война!» Левитанлэсь куаразэ кылыса, быдэс мугоры юзыр-кезьыр луиз, лыдӟиськыны ӧй быгаты ни. Ожмаськон кутскиз ке но, милесьтым экзаменмес кутӥзы на. Удалтӥз, умой отметка басьтӥ.

Ижысь фельдшер школаын дышетскись. 1941-тӥ ар

Ижысь фельдшер школаын дышетскись. 1941-тӥ ар

Со нуналысен ик мобилизация кутскиз. Калык дугдӥз серекъямысь, зол куараен вераськемысь. Радио кылзӥмы дэмен — Советской ульчаысь огаз юбоын громкоговоритель юнматэмын вал. Ожын сӧсырмемъёсты август толэзе Иже вайылыны кутскизы. Городысь троссэ школаосты госпитальлы пӧрмытӥзы.

Дышетсконме йылпумъяме бере монэ Дэриысь больницае ужаны ыстӥзы. Улон чутрак воштӥськиз, нянь сётъязы нормаен: ужасьёслы — 800 грамм, служащийёслы — 600 грамм, нош пиналъёслы но арлыдоослы — 400 грамм. Сое котькуд корка нуллӥзы, вурем кошельёс бордын фамилия гожтэмын вал. Куд-ог дыръя магазинысь маке со басьтыны быгатылӥмы, толэзяз огпол 200 грамм мында ливерной колбасалы вераны луонтэм лӧптылӥмы. Дэриын ар ужай но, егит, бызьымтэ но нылпитэм кышномуртъёсты Кезысь госпитале ужаны ыстӥзы. Ярано коть, отчы келямзылэсь азьло одӥг уйлы анае доры бертылыны луонлык сётӥзы.

Кезын ар сяна ужаны ӧз кылды. 3778-тӥ эвакогоспитальмес 2-тӥ Украинской фронтэ келязы. Быдэс эшелон тыр койкаос, тумбочкаос, шкафъёс Москвае нуимы, собере Харькове келязы. Мынон сямен мукет городъёсысь врачъёс бордамы итӥськизы. Поездэн мынытозямы, Харьков городэз асьмелэнъёс куинь пол басьтыны выризы. Котыр кӧшкемыт суред: улон коркаос но станциосысь вокзалъёс ваньмыз пуштытъямын.

Милемды интыязы Харьков город котыре — Зянки станциысь шутэтскон юрт бервылэ: юртлэн укноосыз, ӧсэз ӧвӧл, ма веранэз ини шуныт, ву но тыл сярысь. Со юртын немецъёс валъёссэс возиллям. Приказ сётӥзы: лэсьтӥськон ужъёсты куинь нунал куспын быдэстоно. Укнооссэ кирпичен пытсамы, воксё пеймыт медаз луы шуыса, кӧня ке укно синъёс тыримы, тыл кыскизы, ву пыртӥзы. Сӧсырмем солдатъёсты ньылетӥ нуналаз йӧнатӥмы ни. Тол вылтӥ коркамес пичи гурен шунтӥмы, муръёзэ укно пасетӥ поттыса.

Милям госпитальмы фронт мышкын возиськиз. Аптекамы, радиостанцимы, санпропускникмы асьмелэн вал. Сӧсырмем солдатъёсты куд-ог дыръя валъёсын нуллӥмы, кык полуторка машина возимы на. Соосты заводьыны ӧм быгатылэ. Наступление дыръя трос калыкез вуттылӥзы. Лыоссы чигем муртъёслы гипсъёс тыримы. Сӧсырмем интыосты, миськыса, стрептоцидэн чылкытатыса, вурылӥмы. Арня куспын солдатъёсмы бурмылӥзы.

Госпитальын. 1945-тӥ ар. Румыния

Госпитальын. 1945-тӥ ар. Румыния

Эмъясьёслы но секыт йӧтӥз. Куинь нунал госпитальысь ӧм поталлялэ, ньылетӥ нуналаз вить час шутэтскыны дыр сётылӥзы. Киноосын гинэ эмъясь сузэръёсты солдатъёс яратыса «сестричка» шуо, нош улонын мае но ӧз кылӥськы.

Раненойёс матькето, костыльёссэс шоре зӥръяло.

Вӧсь луыны шедем солдатъёсты быгатэммыя либатыны выримы. Выль висисьёс вуыку, киосмы воксё коскало вал, носилкаос нуллыса.

Шудэ вылэм на
Украинаын дыръя пӧртэм вакытъёсты чидамы. Днепр шур вирен сураськиз. Винницкой областьысь Черкассы городын кыкетӥзэ вордскем кадь потӥ.

Одӥг нуналэ трос висисьёсты вайизы, матрацъёс вайыны кык украин нылъёсын сюрес вылэ потӥмы, кытысь ке ӧвӧл сьӧрамы пуны калъяськиз. Кӧня улляны выримы, ӧз кошкы. Азьпаламы потӥз но мина улэ шедиз, нискетэмез гинэ кылӥськиз на. Туннэ ке но солы тау карисько — улэп кельтӥз милемыз.

Молдавиысь Яссы городысь станциын милям эшелонмы обстрел улэ шедиз. Милемды 3-тӥ линие дугдытӥзы, 2-тӥ линиын — военнойёслэн эшелонзы, нош 1-тӥез сюрес буш. Озьыен, отӥ эшелон ортчыны кулэ. Возьмаськон куспын вань калык станцие потӥз. Куинь пиос, аккордеонэн шудыса, «На позиции девушка провожала бойца» кырӟан мытӥзы. Кык куараен кырӟамзы туннэ но пель сьӧрам чузъяське. Милемлы кылъёссэс гожъяса кельтӥзы. Пиослэн эшелонзы вырӟиз, вӧзтӥмы «катюшаосын» эшелон ортчиз, нош ми вырӟыса ӧм вуттэ — поездмес пуштытъяны кутскизы.

Со нуналэ тросэз эшъёсмы сӧсырмизы. Монэ но контузить кариз, нош эмъяськыны маза ӧз сётэ. Быдэс ожмаськон вылтӥ эмъясьёс вал доноръёс, грузчикъёс, лэсьтӥськисьёс но артистъёс. Кырӟан дышетылӥмы, бордамы баянист возизы, концертъёс пуктылӥмы.

Румыниын. 1945-тӥ ар

Румыниын. 1945-тӥ ар

Лякыт улӥмы Румыниын. Шыпыт, ульчае потаны лэзё. Пичильтык уждун сёто. Егит нылъёслэн шоголляськемзы потэ, мон но пыдкук басьтӥ. Басма бырйи, отысь ик портнихаез дэрем вурытӥ.

Вормон тулыс
1945-тӥ арын май толэзе Братиславае вуимы. 6-тӥ мае дорамы вуттӥзы сукыр кылем егит пиосты. Асьме солдатъёсты куноятӥллям метиловой спиртэн, кӧня ке шапык ӟузьыса, солдатъёс пыраклы сукыр кылизы.

8-тӥ-9-тӥ мае мынам дежурствое вал. Уйин чал-чал. Малпамтэ шорысь югыт луиз. Госпитальысь висисьёс но эмъясьёс укно дуре султӥзы: ма луиз? Прожекторъёс инбаме кизили суредам бере гинэ валатскимы: ож йылпумъяськиз. Ваньмыз ӟыгыръясько, чупасько, зар-зар бӧрдо, коридорын ӵаш! вазе. Со нуналэ валерьянка ӧз окмы. Уд но оске, ӵапак Вормон Нуналэ нырысьсэ шӧмъяны кылдӥз спиртэз. Быдӟым нуналэ но ӧд юы ке, сьӧлык луоз шуыса, веръяно кариськи. Ымтыр ӟузьыса, воксё каньсырай, пыдъёсы кылзӥськемысь дугдӥзы, кӧня ӧски. Кин ке шумпотэменыз тэтчаз, нош мон валесын погылляськи.
9-тӥ май бере но ужмы лачак вал. Концлагерьысь мозмытэмъёсты дорамы вуттӥзы. Соосты адӟыны кулэ: лы вылын ку гинэ. Ветлыны быгатӥсьёсыз чиньыен лыдъямон, тросэзлэн пуньы кутыны катьсы ӧй вал.

Братиславаысь одӥгез эмъяськон юрт пленэ шедем нылкышноосын быдэсак тырмемын вал. Ваньзылэн — лек пыктос. Нылкышноос — наркоманъёс выллем, соослы юн эмъюмъёс сюдӥллям. Кышноосты фашистъёс нырысь сантэмаса возиллям, отӥяз, уколъёс пуктылыса, пӧртэм эскеронъёс ортчытъяллям. Нош юртлэн мукет палаз 3-15 аресъем пиналъёс кыллизы, соосты тушмонъёс доноръёс чот кутӥллям. Нылпиос но лы но ку кылемын. Одӥгез милемлы возьматӥз немец пӧзьыез, вуриллям сое адями кулэсь.

Кыкетӥ фронт
Вордскем палъёсам декабрь толэзе гинэ бертӥ. Анае бӧрдэ, ӟыгыръя. Даниил агае оже кошкиз нырысетӥ призывен, ог-огмылы гожтэтъёс гожъямы, но бӧрысь иворез ӧз вуылы ни. Тодмо луиз, Украинаысен сӧсырмыны шедем. Со муген ик пыраклы Ялта городэ улыны кылиз. Бӧрысь ог-огенымы адскылӥмы, нош война сярысь пал кыл но ӧм поттылэ.

Анаймес сюлмаськытӥз атаймылэн улонэз. Ожысь бертэме бере Москвае, в контору исправительных трудовых лагерей шуыса, гожтэт ыстӥ. Кема ик витёно ӧз луы, ивор басьтӥмы. Шараяськиз: 1942-тӥ арын январь толэзе Свердловск улосын атаймы кулэм сюлмыз кутыса.

Гуртын соку туж секыт вал, со аръёсты кыкетӥ фронтэн ӵошатӥсько. Висись анаелы матэгес луон вылысь колхозэ ужаны кыли. Скал вордӥмы. Туж секытэн сётскиз ке но турын дасян, со понна асьмелэн йӧлмы вал. Туннэ ке но жалясько ожысь ваем шинельме, сое мон турынэн воштӥ. Бадӟым бусыосты сюрлоен арамы, музъем гырыны валъёс ӧз шеде, асьмеос геры кыскамы. Калык трудодень вылэ ужаз, одӥг гектар арам понна 6 пуд ю тысь сётӥзы.

Война бере Кионгопысь школаын дышетӥз Пётр Елисеевич Моряков. Быдэс войнаез танкист вал, пленэ шедьылэмын, ньӧрен жугем бервылъёсыз пыраклы кылемын. Сямыз умой шуыса, анае соин паръяськыны косӥз. Нырысь аръёсаз шудыса выллем улӥмы, собере пыраклы валче луимы. Моряковъёслэн доразы улӥсьёссы лачак вал: одӥг юртын куинь семья веказ. 1948-тӥ арын, анае улонысь кошкем бере, Пётр Елисеевич анаеныз ӵош дорамы улыны выжиз. Мыным удалтӥз, шуыны луоз, кузпал шедиз, нош куд-ог семьяосын воргоронъёссы ӧй вал.

Тодам возисько на анаеным люкиськон нуналэз. Гуртын воргоронъёс ӧвӧлэн коросын кыллись анайме кышноос берпуметӥ сюресаз келязы. Гу копаны мужике ветлӥз, аслад семьяедлы гу копаны уг яра шуо ке но.

Анае улонысь кошкем бере Мукшиысь участковой больницае ужаны интыяськи. Одӥг ар, Кионгопысь ветлыса, ужай, нош собере Мукшиысь эмъяськон юртмес пытсазы. Кутски Якшур-Бӧдья черкогуртысь больницае. Тямыс ар хирургической отделениын палаточной сестра вал. Сюрес вылын шуккиськыны шедемъёслы сяна, терапия но гинекология ёзъёсын кыллисьёслы операциос лэсьтыны юрттылӥ, трос вал нылпи куштӥсьёс. Палаточной сестралэн ужез вераса быдтонтэм: операциос дыръя юрттоно, дежурствоосы ветлоно, хирургиын кутӥськись инструментъёсты стерилизовать кароно.

Якшур-Бӧдья больницаысь медсестра. 1970-тӥ ар

Якшур-Бӧдья больницаысь медсестра. 1970-тӥ ар

Войнаын сямен ик, ужаны луонлыкъёс йӧнала ӧй вал, тылэз ӝытазе 12 часозь гинэ сётылӥзы. Секытлы чидатэк, инфекционной отделение куриськи, отын эшшо 22 ар ужай на.

Эшшо но ужасал на, дыр, Быдӟым ожын контузие шедеме ачиз сярысь тодаз вайытӥз. 45 арескам висьыны кутски, нош табере — тямысэтӥ арзэ — корка пушкын гинэ бергасько, сукыр кылемын. Пётр Елисеевич кузпалэным ӵош 50 ар пала валче улӥмы, кык пинал будэтӥмы, куинь внуке, 6 правнуке вань.

Семьяеныз. 1970-тӥ аръёс

Семьяеныз. 1970-тӥ аръёс

Егит дыръям киужлы усточи вал: керттӥськи, чильпаськи. Синмы уг адӟы ке но, нунокъёсылы али но ма но со керттыны вырисько.

Пеймыт дуннеын улыны туж секыт, ки вырыку, пыд вамышъяку, тэк пукем уг поты. Секыт улонэз тӥ медад адӟе ни.

Валентина Емельянова

Удмурт Дунне
By Удмурт Дунне 11 мая, 2013 23:20
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<