Крезьгур ваньмызлы уг сётӥськы

Удмурт Дунне
By Удмурт Дунне Май 31, 2013 12:54
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
В. Шоркин

В. Шоркин

Кылем арнянуналэ кема висьыса улэмез бере югыт дуннеен весяклы люкиськиз самодеятельной крезьгурчи Виталий Шоркин. Виталий Алексеевичлы туэ 7-тӥ декабре 59 арес тырмысал.

Улонэз, инкуазез, адямиосты яратӥсь Виталий Шоркин куатьтонлэсь уно кырӟанъёс гожтӥз. Туж тодмоесь луизы: «Мае курид, ваньзэ кузьмай» (кылъёссэ гожтӥз Алексей Ельцов), «Зинӥ» (Пётр Поздеев), «Нылашлы кузьмай сяська» (Владислав Кириллов), «Мемиен люкиськон» (кылъёсыз аслаз), «Саша, Маша, тамаша» (Андрей Самсонов), «Катя, Катерина» (Семён Перевощиков), «Арганчилы» (Гильман Касимов), «Италмас сяська» (Галина Романова) но трос мукет. В. Шоркин удмурт эстрадаын нырысьсэ альбом-диск кылдытӥз.

Алигес гинэ Виталий Алексеевичен вераським вал со сярысь бадӟым материал гожтон пумысен. Мон со доры мыныса ӧй вутты, мар ке но ӝегатӥз.

Виталий Шоркин вордӥськиз Пичи Пурга ёросысь Пуро (Байситово) гуртын. Вордскем гуртаз покчи классъёсты пырпотыса, бадӟым классъёсы вамыштӥз 10 иськеме интыяськем Аксакшурысь 8 классъем школае. Отын пияш, эшъёсыз сямен ик, интернатын улӥз. Пичи муртлэн сюлэмыз мӧзмонэн позырскылӥз, луоз. Но чидаз, арганзэ кутыса, мӧзмон гурзэ кисьтылӥз, эшъёссэ котыраз люкалляз. Виталий пичиысен песянайёсыз вӧзын будӥз. Анаез Анна Алексеевна, кыкетӥзэ бызьыса, улыны сьӧрло кошкиз. Соин но, дыр, Виталийлэн пичи дырысеныз сюлэмаз мӧзмон каръяськыса улӥз.

— Куать арес дыръям киям кутӥ пичи полухромка арганме, — покчи дырзэ тодаз вайылоз вал Виталий Алексеевич. — Со ик луиз шудыны дышеме. Собере арганме воштӥ баянлы, баянме — гитаралы, трубалы но фортепианолы.

Тямыс классэ йылпумъяса, Виталий ДОСААФ пыр шофёре дышетске, собере сое армие басьто. Нырысь ик Челябинске шеде, отӥяз — Германие. Службазэ нуыкуз но, пияш арганэзлэсь уг люкиськы, ваньмон дыръяз эшъёссэ шулдыртэ. Армиысь бертыса, Виталий тодон-валанзэ будэтэ Ижысь культпросветучилищеысь оркестровой отделениын. Отын солы туж кельше, котькыӵе крезьгур инструментэн шудыны луэ угось.

Практикае дор палъёсаз ик бертэ. Училищезэ йылпумъяса, ужаны лыктэ аслаз вордскем ёросаз ик Кечолэ. Ӵапак отын ужакуз, крезьгуръёс кылдытъяны кутскиз. Нырысь ик Виталий Алексеевичлэн ки улаз Алевтина Аникиналэн «Чагыр инмын пишто кизилиос» кылбурез шедиз. Чебересь чуръёс вырӟытӥзы пияшлэсь сюлэмзэ, гур гожтӥз.

Кечолын ик Виталий Тамара нимо яратонзэ пумита. Егитъёс улыны выжо Аксакшуре. Ӵапак отын со вие культура юртын ужась кулэ вылэм. Виталий татын ини воксё аслаз ӧраз пыриз, сюлэмыз лычсузьымон ужаз, егитъёслэсь хор кылдытӥз. Нунал потэм репетициос… Школаын пионервожатойын ужась кузпалзэ но со бордаз кыскыны быгатӥз. Выль гожтэм кырӟанзэ со котьку ик нырысь Тамараезлы возьматъяз. Соиз дунъет сётъялляз.

Мылкыдыз пуромемын, угось сцена вылэ тэрыны луонтэм трос калык люкаське хорын кырӟаны. Со гурт калыкез олокызьы гинэ культура юртэ кыскыны быгатылӥз, эшъёсыныз ӵош пӧртэм ужрадъёс ортчытъялляз. Хоренызы аксакшуръёс кытчы гинэ ӧз поталэ. Котькытын но Виталий Шоркинлэсь кырӟанъёссэ быдэстылӥзы. Виталий Алексеевич Аксак гуртын ужаку ик, «Аксакшур кадриль» эктон вуиз «Италмас» ансамблен кивалтӥсь Анатолий Мамонтов доры. Собере та эктонэн дано коллектив быдэс дуннеетӥ ветлӥз.

Сяськаян вакытаз Виталий Шоркинлэсь тусбуйзэ Пичи Пурга черкогуртысь Данъян пул вылын возизы.

* * *
Одӥг нуналэ егит пияшез Ижысь механикая заводлэн «Октябрь» культура дворецаз ужась Виталий Ворончихин пумитам. Тырмоз, пе, гурт калыкен гинэ ужаны, удмуртъёс туж трос городын но уло, соосты ӝуткано, кырӟанэз яратӥсьёсын хор яке ансамбль кылдытоно. Виталий Алексеевичлы жаль ке но потӥз гурт калыкез, со городэ улыны мыныны соглаш луиз, отын но кужымез эскероно, шуиз. Озьы Шоркинъёс шӧдтэк шорысь улыны выжо Иже. Бабушкин нимо ульчае корка басьто. Кузпалыз Тамара Анатольевна 79-тӥ школае интыяське, географилы дышетэ. Та школаын со кема аръёс ӵоже ини завуч луыса тырше. Виталий Алексеевич «Октябрь» двореце ужаны интыяське, «Бӧляк» ансамбль кылдытэ.

Баянэн шудыны Пичи Пурга ёросысь Пугачёво каргуртысь Дамир Шайхутдиновез дораз ӧте. Усто коллектив кылдытэ. Заводын ужась калык шумпотыса кыстӥськиз двореце. 20-30 кузя соос люкаськылӥзы. Татын но Виталийлэсь кырӟанъёссэ сцена вылын быдэстылӥзы. Та коллективез соку ик ваньмыз синйылтӥзы. Угось соос пӧртэм интыосы, ӵемысь гуртъёсы но поталлязы, концертъёс возьматъяллязы. Ансамбльлы калык ним сётӥзы. «Бӧляке» ветлӥсьёс, одӥг семья кадь, тупаса улӥзы. Гужемзэ, ваньмон дыръязы, Волга шур кузя пароходэн Астраханёзь но вуылӥзы.

Завод соослы уксёен юрттылӥз, ёросъёсы концертъёсын поталляны автобус висъялляз. Перестройка вакытэ завод куашказ. Собере ик «Бӧляк» ансамбль но быриз. Виталий Алексеевич, вандыса куштэм кадь, культура удысысь пыраклы кошкиз, базаре вуз карисе интыяськиз, озьы ке но сюлэмыз солэн ялан кырӟаз. Виталий выль крезьгуръёс малпалляз, шуэ кузпалыз…

* * *
Виталий Шоркинлэсь чебересь крезьгуръёссэ Удмуртиысь дано композитор Геннадий Корепанов-Камский но синйылтэм вылэм, Казаньысь консерваторие дышетскыны пырыны ӵектэм. Но Виталий Алексеевичлэн мылкыдыз сузьымтэ, марлы но кинлы со кулэ шуылэм.

— Азьвыл ужам аръёссэ атай ӧз яратылы тодаз вайылыны, «ортчем этап» шуылӥз, — атаез сярысь вера Алексей пиез. — Табере, пе, егитъёс мед ужалозы ини, мон аслэсьтымзэ лэсьтӥ. Солэн вылтӥяськон сямыз ӧй вал, куд-огез сямен тэтчаса, «мон-мон» шуыса ӧз ветлылы. Паймисько, сомында кырӟан гожтэм адями ним-дан понна ӧз бызьылы, кизилияськон сямыз солэн чик ӧй вал. Аслэсьтыз ужзэ кыштыр гинэ лэсьтылӥз, милемыз но ачиз сямен ик улыны дышетӥз. Атаймылэн чурыт сямыз но поталляз, малпанзэ, котькин мед луоз со, пырак синмазы вераны дӥсьтылӥз. Жаль, кырӟанъёсыныз книгазэ поттыса ӧз вутты, малпаськом, ми солэсь малпам ужзэ йылаз-пумаз вуттыны быгатом.

— Чырткем вал со, нокытын чидасьтэм, — кузпалыз сярысь маде Тамара Анатольевна. — Ужлы керӟег адями. Котьку «уж трос» шуылӥз. Асьме коркан улӥмы бере, ялан мар но со лэсьтоно: я мунчоез выльдоно, я липетэз воштоно, бакча ужез ужано. Виталий туж кибашлы вал. Алёша, пичиысен атаез вӧзын будыса, со кадь усточи луиз, арганэн гинэ шудыны малы ке мылкыдыз ӧвӧл. Крезьгур ваньмызлы уг сётӥськы вылэм.

Виталий Алексеевич Тамара Анатольевнаен 32 ар но ӝыны улӥзы, кык пинал вордӥзы. Вика нылзы атаез выжые мынӥз, туж чебер шудэ аккордеонэн. Воткинскысь педколледжез йылпумъяса, дышетсконзэ азинтӥз Казаньысь культурая университетын. Та вакытэ ужа Кузебай Герд нимо гимназиын. Но Виталий Алексеевич Викаез шоры сюлэмшуген учкылӥз: мон выжые мынэмед, нылы, нош малпаськид-а, культура удысын кин трос уксё басьтӥз ини шуыса? Туала егитъёс музон улонэн уло. Нош Алёша пизы — ужбергатӥсь, пумен Ижысь гурт удысъя академиын тодон-валан люка.

Виталий Алексеевич туж яратӥз нылпиосты. Шоккетыны но маскаръяськыны яратэмысьтыз, ульчаысьтызы вань тэшкылиос шораз «дядяй» шуыса вазиськылӥзы. Пиезлэн Станислава нылыз туэ школае мыноз ини. Со песятайзэ «тяти» шуылӥз. Виталий Алексеевич пичи нылок понна улонзэ сётыны дась вал, сокем сое яратӥз.

— Алёша пимы вордскем бере Виталий «Алё, алё, Алёшик» кырӟанзэ гожтӥз, — тодаз вае Тамара Анатольевна. — Кылъёссэ но ачиз ик малпаз. Нылпиослы бӧрысь со трос гуръёс гожтӥз, Викалы сӥземез но вань. Герман Ходыревлэн кылъёсызъя «Школае мон мынӥсько» кырӟан калыке туж ӝог вӧлмиз. Озьы ик вордскем гуртысьтыз кылбурчилэн Анатолий Перевозчиковлэн кылъёсызъя «Тол бабай» но «Синучкон» тодмо кырӟанъёс луизы.

Виталий Шоркин крезьгурез мур валась адями вал. Солэсь куд-ог кырӟанъёссэ — «Вордӥськи мон Пуроын», «Ой, Инмаре, маин мон сьӧлыкай» — Владимир Высоцкийлэн кырӟанъёсыныз ӵошатыны луысал, шуо крезьгурез ӟеч валась адямиос. Ачиз крезьгурчи берло аръёссэ саюлынгес улӥз ини, но удмурт калык солэсь кырӟанъёссэ уз вунэты. Крезьгурчилэн тусбуйыз син азямы сыӵе ик яркыт но сайкыт кылёз.

Любовь Тихонова

Удмурт Дунне
By Удмурт Дунне Май 31, 2013 12:54
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<