Ветлӥ, ветлӥ колхоз садэ…

Удмурт Дунне
By Удмурт Дунне 31 мая, 2013 09:50

Ветлӥ, ветлӥ колхоз садэ…

Туала вакытэ улмопу садъёс кылемын на бакчаосын но питомникъёсын

Туала вакытэ улмопу садъёс кылемын на бакчаосын но питомникъёсын

Кылем даурлэн 60-тӥ аръёсаз котькуд гуртлэн аслаз садэз вал. Огречен, ӵужкушманэн но мукет бакча сиёнъёсын сяна, вуз каризы улмоен, сутэрен но мукет емышъёсын.

Сяськаян

Вавож ёросысь Эмезьгурт (Малиновка) вашкала дырысен ик сад пӧлын улӥз. УАССР-ысь дано дышетӥсь, Кузебай Герд нимо премилэн лауреатэз Анатолий Егоров верамъя, та гуртэз емышо писпуосын узырмытэм ачиз Кузебай Герд.

— Кузебай Герд кӧня ке пумо улмопуос ваем гуртамы. Солэн мерттэм писпуосыз али ке но сяськаясько на. 1930-тӥ аръёсы урамъёс яблок сяськаос пӧлы ышылӥзы. Но сюро ук укылтэмъёс: 1960-тӥ аръёс бере одӥгез колхоз кузё вань садъёсты кораны косэм. Но Кузебай Гердлэн гожтэмезъя ик, ӟеч киземез озьы гинэ уд быдты. Аръёс ортчыса, выльысь улӟиз гурт, отын табере йыг-йыгесь улон коркаос, емышъёсын узыресь садъёс, — шуэ Анатолий Максимович.

Сад будэтон асьме шаерын кутскиз ни 19-тӥ даурлэн пумаз. Соку та ужен тросгес выризы дышетӥсьёс но черкын служба нуисьёс. Берло со борды басьтӥськизы колхозъёс. Нош пӧртэм писпуосты но бакча-сиёнъёсты вӧлмытон бордын ужазы институтъёсысь тодосчиос. Со понна ик 1959-тӥ арын Ижевскысь гурт удысъя институтын усьтӥськиз емышъёсъя но бакча сиёнъёсъя кафедра. 10 ар куспын Удмуртие вайизы но эскеризы 113 пумо емыш будосъёсты. Быръем сортъёс будэтыны сётэмын вал «Ижевский», «Чайковский», «Сарапульский», «Ленинский» совхозъёслы, Удмуртиысь опытной станцилы, Вотка ёросысь «Двигатель» колхозлы но мукет хозяйствоослы. Улмоосты эскеронын сюлмо ужазы Дэри ёросысь «Правда» совхозысь специалистъёс Э. Лагова но И. Наговицына. Та вакытэ тросгес саклык висъяськиз улмолы, узылы, сутэрлы но эмезьлы.

Выль садъёс тросэн кылдылыны ӧдъязы 1964-тӥ-1965-тӥ аръёсы. Глаз ёросын 14 гурт хозяйстволэн садэз вылэм, ваньмыз 33,6 гектар. Балезиноос со вакытэ 12,5 гектарын емышъёс будэтӥллям, шарканъёс — 45 гектарын, эграос — 28 гектарын.

Тӧлӟон

Но колхоз садъёслэн улонзы кема ӧй вал. СССР-ын котькуд писпулэсь выт бичаны кутскемзы бере тросэз хозяйствоос садъёссэс коразы.
Гурт удысъя но сиён-юонъя министерствоысь будосъёсъя ёзысь валтӥсь специалист Алевтина Бурдина со вакытэ ужаз Вотка ёросысь «Чайковский» совхозын агроном луыса.

— Милям хозяйствомы сад будэтонъя республикаын одӥгез бадӟымез лыдъяськиз, — вера со. — Сӥзьылзэ писпу но емыш басьтыны километр кузьда черод кылдылӥз. Совхозмы пӧртэм удысъёсъя ужаз ке но, миллионерын улӥмы, садъёс воземенымы.

Уно садъёсты, тужгес но шунытэз яратӥсь писпуосты, быдтӥз куазь. 1979-тӥ арын январь толэзе 53-54 градус кезьыт возиськиз, шаерысьтымы 20 процентэз садъёс кынмизы. Кезьытъёс ӧз жалялэ Каракулино ёросысь Зуевы Ключи гуртлэсь бадӟым садзэ но.

— Милемлы татын Инмарен висъям сэрег кадь потылӥз. Война бӧрсьы ик ини татын виноград но, арбуз но, груша но будэтылӥзы, нош улмо садмы сокем бадӟым вал, сяськаяськон вакыт тӧдьы пилемъёс пӧлы ышиськод кадь, — тодаз вае та гуртын вордскем но будэм Людмила Мерзлякова. — Но со кезьыт аре ваньмыз сямен писпуос кынмизы. Выжыоссы али ке но со шимес дырез тодэ вайыто на.

Удмуртиын кылемын на питомникъёс гинэ. Отын, улмоос сяна, будэто груша, слива, виноград, актинидия, боярышник но мукетсэ.
Озьы ке но колхоз садъёс но сад будэтӥсьёс ӧз быре.

Улӟон

Табере гуртын но, городын но улӥсь сад-бакча возьыны тырше. Ай котькудӥз, ӵошатскыса сямен, выль сортъёс будэтэ.
Удмуртиын та дырлы 509 сад-бакча огазеяськонъёс. Соос интыяськемын 24 муниципал кылдытэтын. Республикаысь котькуд куинетӥез адями аслаз бакчаяз ас быгатэмезъя бакча сиён но емыш будэтэ.

Удмуртиысь сад возисьёслэн огазеяськонэнызы кивалтӥсь Ольга Залазаева лыдъя: сад-бакча возисьёс туж бадӟым юрттэт сёто сиён-юон поттонын. Сад-бакча возисьёс кышкатэк будэто ни дыня, абрикос, лимон. Тросэз ӟеч урожай басьтэ.

Каллен-каллен кутско ни садъёс будэтыны ужбергатӥсьёс но. Тани Кизнер ёросысь Вуж Бӧдья гуртысь Валентина Ветрова кылем арын вормиз «Начинающий фермер» проектын. 8 ар Италиын улыса, емышо писпуосты будэтыны дышиз, табере со асьме шаерын но сад мерттӥз.

Иван Аркашев
Туспуктэмез: udmfoto.ru

Удмурт Дунне
By Удмурт Дунне 31 мая, 2013 09:50
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<