Пичи, поглес, ваменэс

Удмурт Дунне
By Удмурт Дунне Май 31, 2013 10:42

Пичи, поглес, ваменэс

А. Эркишев

А. Эркишев

Удмурт эстрадаысь йӧно казакпи. Уй клубъёсын удмурт крезьгурлы улон кузьмась диджей. Нылпиослэн но егитъёслэн «Камали» студизылэн кивалтӥсез. Удмурт театрысь куарая режиссёр. Ваньмыз та Анатолий Эркишев сярысь.

— Шуо, Ижысь уй клубъёсын удмурт крезьгурез Эркишев бергатыны кутскиз. Кызьы усточиослэн школа-интернатазы дышетскем пияш, классической тодон-валанэн адями уй клубе вуиз?

— Отын маке уродэз вань шат? Усточиослэн интернатазы дышетскыкум, монэ крезьгур бордаз уг кыскы вал ни. Малы озьы луиз? Интернатын ӧз быгатэ-а мар-а синмаськытыны крезьгурлы. Косӥзы фортепианоен шудыны, вылаз ик — кырӟа на, пе. Нош мон пичи дыръям сцена вылын кырӟаса будэмын ни. Папа (Удмуртиысь культура удысысь дано ужась Виктор Эркишев — авт.) концертъёсы нуэ, мон балалайкаен, пичи арганэн шудӥсько, кызьпу туйлэсь шуланэн пеллясько, пу пуньыосын кокасько, кырӟасько-марасько — кичабонъёс!

Интернатэ вуи Пичи Пурга ёросысь Кабыста гуртысь. Туж шаян вал. Дышетскон кулэ ӧвӧл: не крезьгур, не мукет предметъёс бордазы уг кыско. 5-тӥысен 9-тӥ классозь монэ кызьы чидазы меда? Нотаос интые, мыным магнитофонъёс пушкысь усилительёс кельшо вал ни. Книгаосын но тетрадьёсын интые, койка вӧзысь тумбочкае пӧртэм силёен тырмылӥз. Дышетӥсьёс шорам киынызы но шонтӥзы — талэсь, пе, кырӟась уз пӧрмы.

Ачим но малпай, крезьгурлэсь палэнсконо. Нош папаелэн малпанэз мукет вылэм. Машинае пуктӥз но Воткинскысь педколледже нуиз. Мар карод, экзаменъёс сётӥ, кутӥзы.

Педколледжын соку ик синйылтӥ пичияк студизэс — татын фонограммаос но аранжировкаос лэсьтыны луоно. Всё, сюлэм отчы нуэ, нокыӵе баянэз кыскаме уг ни поты. Нош мыным шуо, урокъёстэ нырысь лэсьты, сэре студилэсь усьтонзэ сётом. Ярам, дорысь уждэ лэсьтӥськод, собере аппаратура сьӧрын пукиськод, тазэ-созэ выриськод — уг пӧрмы. Малы? Мын, пе, гармония предметъя педагогед доры, занятияз сакгес пук, отысь валэктон шедьтод. Озьы практикаын кулэ луэмъя мон теориысь визь-нод бичай.

— Шаян луэменыд тон «Шундыкар» лагерез но огаз гужем зуркатӥд, пе.

— Монэ отын адӟемпотостэм каризы соку. 1995-тӥ арын нырысьсэ мынӥ «Шундыкаре». Серем вал, малы гуртысь вуэм ослопъёс «гуртэ бертэме потэ» шуыса бӧрдо. Мынам опытэ бадӟым, малы ке шуоно усточиослэн школа-интернатсы соку нимаз юртын ӧй вал ай. Ми сиротаосын, анай-атайёссылэсь люкем нылпиосын, ӵош улӥм. Соин пичиысен ачид понна нюръяськоно луылӥз, кинлы ке чагиськон сярысь тодын ик ӧй вал.

«Шундыкарысь» бызгетӥсь нылпиос мынэсьтым серемме гинэ поттӥзы. Дышетскеме нош ик ӧз поты, со интые лагерьысь грузчикъёсын эшъяськи. Нош вожатойёс но специалистъёс тышкасько, «дедовщина», пе, кылдытӥд лагерьын.

«Шундыкарын»

«Шундыкарын»

Педколледжын 3-тӥ курс бере практика ортчоно. Кытчы мыноно? Туж возьыт ке но вал, жингыртӥ Надежда Уткиналы — озьы монэ «Шундыкаре» вожатойлы юрттӥсе кутӥзы. Таяз радэ ваньмыз туж кельшиз — оло мон визьмаськемын вал ни, оло лагерь тунсыкогес луиз. Смена йылпумъяськыку, кузьмазы Флор Васильевлэн кылбуръёсыныз зӧк сборник. Мон сое учки-учки но — син шорам кылбур сюриз. Солы гур кылдӥз. Табере мон гужемлэсь быремзэ возьмаса улӥ ни — дышетскыны мынон понна. Йырам бергась гурез озьы но, тазьы но шудыса утчай. Со ньыль пол вошъяськиз — витетӥяз кылдӥз «Тодыса-а, тодытэк-а» кырӟанлы крезьгур.

— 2001-тӥ арын потӥз кырӟанъёсын нырысетӥ альбомед. Удмурт гуръёсын кассета соку котькытын чузъяськиз кадь: городысь но райцентръёсысь базаръёсын, остановкаосын, гуртысь клубъёсын. Кӧня сюрс тиражез вал солэн?

— Уг тодскы ни. Мыным дась альбом сокем тунсыко ӧз поты. Сое шаплы адямиослы сётӥ, мыным уксё тыризы, 10 кассета кузьмазы. Тунсыкогес вал со кырӟанъёсты гожтыны, курадӟыны.

16-17 аресам луиз йырам тэронтэм учыр. Кырӟанме лушказы. Радиоысь удмурт диджей сое кырӟам, телевидениын ужасьёс клип лэсьтӥллям. Кыӵе кӧшкемыт гожтэмын вал со кырӟан! Мынамез вылэ ик артист нергелэсь куаразэ «лякиллям». Мон тае кылӥ-адӟи но — йырсиосы пежыр султӥзы. Жингыртӥсько кырӟасьлы: мар тон карид, эн возьматэ сое телевизор пыр. Нош со, нокыӵе ик кариськытэк, монэ клипез дасясьёсын герӟаз — соослы, пе, вера. Таосыз могӟытӥзы: ми клиплы 40 сюрс манет быдтӥм, со уксёез тыр но, ум ни возьматэ. Мон студент, быдэ вуымтэ мурт. Кытысь мынам уксёе? Сыӵе урод каризы. Кин тон сыӵе, тэшкыли? Али гинэ гуртысь потэмын, шуизы кадь. Аслым кыл сётӥ: мон сыӵе крезьгур гожъяло, сыӵе аранжировка лэсьто — тӥ вӧзаз но уд ни сылэ.

Альбом понна тау карыны кулэ Дима эшелы. Ми соин артэ туж тамаша адскиськом вал — со каланча кузьда, мон пичи, поглес. Воткинскын дышетсконме быдтон азьын Дима шуэ: ойдо альбом гожтом. Солэн бубиз — ужбергатӥсь, пиезлы дуно синтезатор но, компьютер но кузьмаз. Нош мынам аслам кырӟанъёсы вань. Али малпаськод ке со вакытъёсыз… Компьютер но мырдэм ужа вал. Кулэ куараос но соку ик уг шедё. Ӝыны куплетлы гур гожтӥськод но — тамак кыскиськод, кофе юиськод, нош компьютер весь гур! карыса крезьгурез пуктэ на. Нош альбом быдэсмем бере мон буйгай.

— Уй клубъёсын ужамед сярысь юанлэсь палэнэ кошкид. Витё ар талэсь азьло атаед Виктор Анатольевич сярысь «Удмурт кизилиос» рубрикае гожтӥ. Соку бубид сюлмаськемзэ шараяз тынад «кӧтвеськантэм» ужед сярысь.

— Ма, кыӵе атайлы кельшоз, пиез уйин кыӵе ке дискотекаосын крезьгур бергатэ ке? Мумы-бубы уродзэ уг сӥзё ук. Папалы валантэм вал мынам улонэ: уй клубъёс, олокин луыса ужась, оло официально, оло неофициально. Сэре адӟиз: пиезлэн машинаез но воштӥськиз, улон интыез но кылдӥз. Иське, сокем урод интыын ӧвӧл со.

Уй клубын

Уй клубын

Уй клубе ужаны тодмое ӧтиз. Со дырозь «Аксион» дворецын куарая режиссёр вал. Кӧня уксё, пе, тыро? 800 манет, шуисько. Тодмое бадӟым уксёен гочатӥз. Озьы уй клубе кошки. Нялтас вераса, соку Ижын таӵе шутэтскон интыос кык гинэ вал. Милямаз билет басьтыса пырыны но ӧз быгатылэ — клубной картая гинэ сюрес усьтэмын луэ вал. Кык толэзь ужаме бере мыным арт-директор луыны оскизы. Татын ачид ик сюлмаськиськод ӝытэз радъян сярысь, реклама нуиськод, крезьгур утчаськод. Дорам мукет диджейёс: кылсярысь, Электроники диджейёс пӧлысь Влад Горжак, мукет пиос — куриськыны ӧдъязы. Кызьы, пе, Толик ужа, кызьы эрекчаське. Нош монэ та удыслы нокин ӧз нодъя. Пачкаосын журналъёс басьтӥсько вал, бадӟым городъёсысь клубъёсы ворттылӥ. Трендъёсты шӧдыны кулэ, сотэк калык клубе уз лыкты. Нош городмы пичи, бере кылид ке, ивор соку ик вӧлмоз.

8 ар ортчыса, мукет клубе ӧтизы — выль сямен ужалод, пе. Озьы кошки. Таяз кык ар чидай на. Соку валай: уй клубъёсын ужаса, кӧты тыриз. Кошки дышетскыны трейдере — фондъёсъя биржаын дуно бумагаосын вуз карисе. Ар куспын ваньзэ валай, ачим калыкез дышетыны кутски. Мон дорын визьмаськемъёслэсь «емыш» басьтэмзэс но адӟисько вал ни.

— Иське, аслыд миллионъёс кулэ ӧз луэ?

— Со понна сю сюрсъёсын депозитъёс кулэ. Кытысь? Уксёе ӧй вал. Мыным татын но акыльтӥз — котькуд нунал дэрем дӥсяськод, галстук керттӥськод. Кошки. Эшъёсын удалтэ ке, удалтэ ни. Саша эшелэн бубиз шуэ: мар тӥ, пиос, олокытчы но мерскиськоды? Малпалэ йӧн-йӧн уж, мон коньдонэн юртто. Озьы малпамы светодиодъёсын югдытонъя проект. Пичи но бадӟым заказъёсты быдэсъямы. Табере лэсьтэм уж син азьын — уй тылъёсын ӝуась вуз карон центр, кафе но мукет интыос. Таяз ужын мон чидасал на, дыр. Но маке йырам шуккиз: кырӟанъёсы люкасько, соосты выль альбоме каллен бичано.

Воткинскысь педколледжын ӵош дышетскем Дима эше доры вуи — солэн аслаз студиез. Тани, пе, тыныд инты, малпаськы-конгыръяськы. О, мынам йырам но, сюлмам но ваньмыз бугырскиз. Инструментэз ӝуатӥськод но, чиньыос асьсэос кулэ гур пукто. Малпанъёсы воксё мукет пала нуыны кутскизы. Мар ужасько? Кин понна? Кыӵе мынам пайдае вань? Педколледжын басьтэм дипломея мон дышетӥсь. Нылпиосты туж яратӥсько. Гуртэ бертӥсько ке, ӵыжы-выжыослэн векчи пиналъёссы вылысьтым уг васькало. Башкир но бигер телевидениез учкиськод ке, соослэн сомында нылпиоссы кырӟало. Нош милям? Вань та бугырскем мылкыдме эшелы Павел Поздеевлы усьтӥ.

— Озьы вордскиз «Камали» студия?

— Нырысь валантэм вал ай, мар луоз со. Малпаськоно, шуэ Паша. Мар малпаськонэз? Уксё утчано, шуисько. Улыны мыным тамында уксё кулэ — няньлы-йӧллы ке но мед тырмоз. Сомындазэ отысь, тамындазэ татысь шедьтом. Нош сомындаез уг тырмы. Паша кылтӥм кыске ни: кылемзэ шедьтӥ ке, та уж борды кутскод-а? Бон, мон ваньзэ куштыны дась со понна. Кӧня ке улыса, Поздеев паймытӥз: уксё, пе, сётоз Улосэз азинтон стратегияя институт. Нимысьтыз тау кареме потэ Светлана Смирновалы — милемлы оскемез понна. Таре инты кулэ. Удмурт театрын студизы вань шуыса, тодско вал ни. Мынӥ Андрей Иванович Ураськин доры. Директор шуэ: валай, только милемлы, пе, куарая режиссёр кулэ, но уждунэз ушъяськымон ӧвӧл. Озьы огкутскемен кык кечез кутӥ: студилы инты но сюриз, уже но интыяськи. Кылем сӥзьыл кастинг ялӥм. 25 мурт лыктӥз. Ваньмыз сямен нылъёс, пиос кык кузя гинэ. Бырйим 4 нылъёсты.

— Соку Интернетын «кокчаны» кутскизы, нылъёсты гинэ басьтӥды, пиосты ӧвӧл шуыса.

— Вал озьы «миськисьёс». Созэ асьсэос нукыртӥсьёс мед тодозы ни. Но кызьы дышетскыны кутод адямиез, соос крезьгурез пичи но уг шӧдо ке? Тани Пичи Пурга ёросысь Пуроысь Юля Романовалы 5 арес гинэ вал. Анаез жингыртэ: кастинге, пе, 6 аресысен гинэ пыриськыны ӧтемын, мар каром? Лыктӥзы, учким — нылаш туж кельшиз. Воткаысь Маша Агафоноваез басьтӥм на. Мынам мылкыды вал пичигес пиналъёсын ужаны, но егитъёс тросгес куриськизы. Озьы Ижын дышетскись Катя Измайловаез но Аня Образцоваез студие кутӥм. Сӥзьыл «Пичи Зарни перепеч» вожвылъяськон ортчиз. Отчы вуиз горд йырсиё пияш. Ми но вазьгес лыктэмын. Ойдо, шуисько, милемын ӵош куарадэ «шунтод». Чакласько но, пияшлэн куараез но вань, нотаосты но кылэ. Мон бурдъяськи, Женялэсь мамазэ утчаны кошки. Малы, шуисько, «Камали» студие уд ветлӥське. Ми, пе, со сярысь кылэмын-марамын но ӧвӧл. Со ӝытэ Женя Баранов Геннадий Ганьковен ӵош нырысетӥ интыез утӥзы. Собере Женя милям студиямы дышетскыны кутскиз.

— Ӧд-а кышкалля, нылпиос занятиосад мӧзмыны кутскозы, крезьгур удыс куке но аслыд сямен ик акыльтоз шуыса?

— Мон кышкай тросгес пинал кутыны. Нош мар верано, кызьы дышетоно — таиз йырам кемалась лач-лач пуке вал ни. Ужаны кутскыса, ваньмыз кыре потӥз, пӧрмиз.

Котькуд пиналэн арняяз огпол час но ӝыны ӵоже нимаз занятие нуисько. Кулэ упражнениос лэсьтӥськом, выриськом, тупатӥськом. Тужгес бадӟым сюлмаськон — уг тырмо нылпи кырӟанъёс. Оло, гожъяло садъёсын ужасьёс, но кулэ дыръя ки улэ уг шедё. Соин куддыръя ӟучысь берыктоно луылӥз, мукет дыръя ачим гожъяй. Таиз умойгес, малы ке шуоно тодскод нылпилэсь диапазонзэ, солы тупась тональностен гожтӥськод. Тани Юлялы чаляк мынӥсь кырӟан гожтӥд ке, со уз кырӟа — пичи муртлэн тыосыз пичиесь, солэн ӝыны октава диапазонэз. Нылоклы вакчигес чуръёс кулэ, гурызъя со вераськон жанрлы матынгес мед луоз. Озьы котькуд пинал понна нимаз кырӟан гожъяны бурдъяськи.

Нылпиосын ужанлэн самой секыт палыз — валэктон. Малы тон кырӟаськод? Кыӵе та кырӟанлэн пуштросэз, мар сярысь малпаськыса, со гожтэмын. Пинал сое валаса, пыртӥз поттыса ӧз ке быдэсты, кылзӥсьлэн сюлэмаз вуоз-а?

— Пиналъёсты яратӥсько шуиськод но ачид весь казакпи ветлӥськод…

— Ваньмыз луыны кулэ дыраз. Мынам вань сюлэм адямие — Света нимо нылаше. Со быгатӥз сюлэмысьтым кыӵе ке вужмем, тузонэн шобырскем сӥоссэ улӟытыны. Тодматскеммы бере мынам выльысь крезьгур дуннее берытскеме потӥз. Милям 10 ар висмы. Но ӵапак та адями монэ вала, со туж чебер, визьмо, мур пуштросо. Мар али ужасько — ваньмыз Светалы луыса.

Яратон тулкымъёс вылын

Яратон тулкымъёс вылын

— Туннэ Анатолий Эркишев кырӟасез тодо мӧйыос но, шоро-куспо арлыдъемъёс но, егитъёс но. Дискотекаосы, концертъёсы ма муген пыриськиськод?

— Мыным туж кельше сцена вылэ потаны. Кырӟаськод но — тон шоры сомында синъёс учко. Оло, со кырӟан сю пол быдэстэмын ни, нош тон сое мукет сяменгес сётӥськод. Адӟиськод, кызьы пумитало сое. Ӵапак учкисен пумиськон понна ик выльысь сцена вылэ потоно.

— Куд-ог удмурт концертъёсы мынэм уг поты одӥг муген: артистъёс дась кырӟанэз лэзё, асьсэос микрофон азьын ымзэс гинэ усьяло. Тон таӵе коллегаосыд шоры кызьы учкиськод?

— Туж кырыж. Мон кырӟась гинэ ӧвӧл ук — куарая режиссёр но. Плюсовкаен сцена вылэ потӥсьёсты уг валаськы. Куд-огез шуэ: ньылоны висе, куарае ӧвӧл. Сыӵе дыръя эн кырӟа. Артист учкисьсэ визьтэм кожа шат? Залын пукисьёслэн тынад кадь ик синзы но адӟе, пельзы но кылэ. Огпол адямиез эрекчад ке, кыкетӥ полаз со тыныд оскоз на меда? Ижысь тросэзлэн артистъёслэн сыӵе «висёнзы» ортче ни кадь. Со понна районъёсысь кырӟасьёс шальтрак пото сцена вылэ плюсовкаен. Выль ар концерт дыръя одӥг дуэт озьы вуиз. Шулдыр кырӟанзы, нош соос сцена вылын пумемын, трамвай кадь кырӟазы, мылкыдэз но уг ӝуто. Тӥ, шуисько, мар-о каркоды? Огпала ортчиды шат? Кырӟаны-а уд быгатске? Вуонояз концертын ик тупатскизы. Калык воксё мукет пумита ни — чабо, шумпото, сцена вылысь лэземзы уг поты.

— Аслад со выллем сьӧлыкед вань-а?

— Огпол мон но озьы потай. Со вакытэ уй клубын ужасько вал. Эшъёс ӧтизы концертэн потыны. Ӵапак арнянунал. Нош мынам четвергысен кутскыса дискотекаос ни. Уйёсы изьылэмын ӧвӧл, тар-тар коскамын. Куарае но, валамон, кӧлэ. Нош концерт радъясьёслы дунне — ми, пе, Эркишев лыктоз шуыса верамы ни, мынод. Кылзӥськи, соку плюсовка лэзи. Сыӵе дыръя кадь кӧшкемаса кырӟамме уг ни тодскы. Сюлмаськи: остэ, ымме вакытаз ӧй усьты ке, нош мазэ ке вунэтӥ ке.

— Кӧня ке ар талэсь азьло тон Интернетын шара мылкыддэ гожтӥд, малы удмурт дискотекаосын ӟеч крезьгур ӧжыт шуыса.

— Соку сюлмам ваньмыз бугырскиз. Кин ке курлам: удмурт дискотекаын, пе, удмурт гуръёс чиньыен лыдъямон. Нош мае лэзёд? Дискотекалэн аслаз куронъёсыз. Эктон ӝыт 6 час мында кыстӥське. Вань-а со дырлы тырмымон удмурт крезьгур — эктоно кадез? Ӧвӧл. Критика кулэ, но со тышкаськонлы гинэ медаз пӧрмы.

Мыным кельше удмурт крезьгурлэн берло аръёсы азинскемез. 2000-тӥ аръёс бере мур гуэ усем кадь луим вал. Али ӝутскон вань. Шумпотӥсько, егитъёс лыкто ӟеч аранжировка гожтыны, асьсэлэн шӧдонъёссы вань, куронзэс верало. Азьло кызьы кырӟало вал? Олокыӵе аранжировка лэсьтэмын, кылъёсыз валамон уг чузъясько, крезьгурез кыскемын-позыръямын. Табере сое шӧдыны кутскизы. Ӟечгес продукт куро. Мон солы шумпотӥсько. Лӧптӥсько мукетызлы но — Удмурт театрын студия вань шуыса. Удмурт кырӟасьёслэсь мылкыдзэс ӝутон понна аранжировка лэсьтэмелы ӝыны дун пуктӥсько, ӟучъёс вазисько ке, татын нокыӵе скидка ӧвӧл — тырелэ ваньзэ.

— Берло дыре тон эпатаж амалэн астэ возьматӥськод. Удмурт кылэ берыктэм «Камасутраез» лыдӟид, хип-хоп кырӟад.

— Сыӵе ужъёс споръяськемысь пото. Мыным аслым кельше озьы сэмберъяськон. Куд-огез йыр бордаз кырмиське: кызьы «Камасутраез» луоз шара лыдӟыны. Мон шуисько: микрофон кут но крезьгур улсын лыдӟы. Озьы ик кари. Удмурт хип-хоп но споръяськыса кылдӥз. Сыӵе жанр, пе, удмуртъёслы кылдытыны секыт. Малы? Бумага вылысь текстэз лыдӟи, крезьгур лякылӥ но — пӧрмиз хип-хоп, адӟиды-а?

— Кыӵе крезьгур кылзӥськод мӧзмыкуд я шумпотыкуд?

— Мылкыдме ӝуто фолк, пӧртэм калык кырӟанъёс — удмуртъёсыз но, Кавказын улӥсьёслэн но. Мӧзмыку номыре кылзэм уг поты — шыпыт медло.

— Радиоез лэзьяськод-а?

— Туж шер. Удмурт кылын радиоез лэзисько но, мылкыд куашка. Выль ар азьын луэм учыр тодэ лыктэ. Котыр яркыт тылъёс ӝуало, Выль ар мылкыд омырын шӧдске. Радиоын шулдыр джинглъёс гожтэмын, пиналъёс «Выль арен! Выль шудбурен!» кесясько. Мылкыд сыӵе ӝутске. Та бӧрсьы как сёто кырӟан: «Пинал пиез туган кутӥ, со но армие кошкиз…» Ну кызьы озьы? Мон понна со валантэм. Радиоысь крезьгуръя редакторлы та юанэз сётӥсько но — ми, пе, юри озьы ум пуктӥське, автомат озьы лэсьтэ.

Удмурт кылзӥсьлы чурытгес кариськыны сӥзьысал мон. Кылӥськоды шальтрам кырӟасез, урод гожтэм кырӟанэз, вамен нёжъяны вырисез — вералэ радиокомпание. Асьмелы медаз донге кӧш, уродмем «сиёнэз». Удмурт кырӟан зол, кужмо, ӟеч, бӧрдытӥсь, рос-прос гожтэмын но чеберъямын медло. Кылзыса сюлэм мед бугырскоз.

Алёна Ионина

Удмурт Дунне
By Удмурт Дунне Май 31, 2013 10:42
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<