Ушъяськон но кышъяськон

Удмурт Дунне
By Удмурт Дунне Май 6, 2013 10:52

Ушъяськон но кышъяськон

Ижысь ульчаосын

Ижысь ульчаосын

Иж город Думалэн 20-тӥ сессиез ортчиз. Кылем ар ужамзылы йылпумъян лэсьтӥз Иж городлэн йырыз Александр Ушаков.

Югыт город

Таяз учыре кивалтӥсь веранзэ шумпоттӥсь лыдпусъёс бордысен ӧз мыты, угось Ижын улӥсьёсты туж сюлмаськыто сюресъёс. 2013-тӥ арын городлэн бюджетысьтыз 384 миллион манет висъяны чакламын сюрес тупатонлы, эшшо 700 миллион манет — республикалэн бюджетысьтыз. Со уксёен городысь троссэ ульчаосыз тыро-пыдо тупатъяны кулэ. Лэсьтӥськон ужъёс азинтэмын луозы Телегин, Ново-Ажимов, Ленин, Молодёжной но мукет ульчаосын. Туэ гужем Карл Марс ульчаез (Ленин ульчаысен Либкхнехтозь) паськытатон борды басьтӥськозы.

Сюресъёсын кылдэм югдурез сэрттэмез-пертчемез бере Александр Ушаков мукет ужпумъёс сярысь но ивортӥз. Котькыӵе удысын шӧдскымон азинсконъёс вань. Та вакытэ улонэ пыӵа «Югыт город» программа. Школа котыръёс но куд-ог азбаръёс, мынон-ветлон сюресъёс югытгес луизы. Ваньмыз со лэсьтӥське, адямиослэсь куронъёссэс лыдэ басьтыса. Кылем ар куспын город Думаысь депутатъёслы вазиськонъёс пӧлысь 523 курон быдэстэмын вал. Озьы 80 интыын нылпи площадкаос кылдӥзы яке соос пӧртэм шудонъёсын узырмизы, нылпи сад но школа котыръёс выльдӥськизы.

«Куашкан калэ вуэм юртъёс» программалэн валтӥсь ужпумез — вуж юртъёсын улӥсьёслы но анай-атайтэк кылем нылпиослы улон инты висъян. 2012-тӥ арын декабрь толэзе но туэ март толэзе Дружба но Степной ульчаосын 7 юрт ӧссэ усьтӥз, 222 квартира пӧлысь 41-ез сиротаослы чакламын. Республикаямы юнматэмын «Улон инты — егитъёслы» программа. Тужгес но паськыт кутӥське со Ижын. Озьы городысь 3 сюрс 261 егит семьяос корка пырон ортчытӥзы ни.

Арысь аре городмы югытгес но чебергес луэ. 2012-тӥ ар понна выльдон-тупатъян ужъёс ортчытэмын 55 юртын 191,5 миллион манет тыр, 20 юртысь 74 лифт воштэмын.

Туэ но быдэстоно ужъёс лачак. Трос квартираем 43 юртын капитальной ремонт ортчытоно. Кивалтӥсьёс оскытэмъя, городысь 8 сюрс пала семьяос улон интызэс умоятыны кулэ. Лифтъёсты воштонъя программаез быдэстон вылысь 132 миллион манет висъямын.

Бадӟым саклык висъяське «Кышкытлыклэсь утем город» программалы. Банкъёсын, вуз карон центръёсын но мукет та выллем учреждениосын югдурез чакланъя камераос пуктылэмын. Городысь трос калык люкаськылон интыосты но «ватэм» синъёс эскеро. Видеокамераослэсь лыдзэс туэ 83-ёзь вуттыны чакламын. Пайдаез шӧдӥське уго. Кылем арын, 2011-тӥ арен ӵошатыса, ульчаын лэсьтэм йыружъёслэн лыдзы 5,4 процентлы ичигес пусъемын.

Городысь предприятиос но заводъёс выль ужан амалъёсты пыӵато. Автозаводын бичаны кутскизы «Лада-Гранта» машина, конвейерысь 24 сюрс авто потӥз, туэлы дас поллы тросгес лэсьтыны чакламын. «Ижсталь» басьтӥськиз выль ӟечлыкен андан ӵыжатон борды, радиозаводын «Глонасс» системалы аппаратураос лэсьто. Шӧдскымон азьпала вамыш лэсьтӥзы «Купол» предприятие, пластмасса поттон завод но мотозавод. 1-тӥ январьлы шоркарын уждун шорлыдын 22 сюрс 774 манет луиз, ар ӵоже со 16,6 процентлы будӥз.

Кыл юан

Иж город Думаысь депутатъёс сак кылзӥзы благоустройствоя но транспортъя управлениен кивалтӥсьлэсь Михаил Тарасовлэсь докладзэ. Вань-а меда сюресъёслэн ӟечлыксы понна кыл кутӥсьёс?

Егит кивалтӥсь тупен-тупен мадиз, кыӵе ульчаосыз кӧня миллион манет тыр но ку тупатъялозы. Машинаослэн лыдзы будэ. Соин валче уг тырмо машина возён интыос. Город администрация аспӧртэмлыко проект-схема кылдытон борды басьтӥськиз. Транспорт дугдылон интыослы саклык висъям сяна, велосипедэн ворттылӥсьёслэсь но куронъёссэс лыдэ басьтозы. Пуктыны кутскемын трос этажъем паркингъёс. Нимысьтыз саклык висъяськоз азбаръёсысь сюресъёсты тупатъянлы. Солы 146 миллион манет висъямын.

Михаил Тарасовлэсь верамзэ кылзыны куд-ог депутатъёс ӧз чидалэ, юанъёсын согизы: малы выль кисьтэм асфальт кемалы уг чида, кыл кутӥсьёс вань-а урод лэсьтэм сюресъёс понна, вуоно арын но-а калык потоз «Ижевск — сюресъёстэм город» пикетэ? Жаляса верано, депутатъёс одӥг юанлы но валэктон ӧз кылэ.

Берло куать ар ӵоже городысь сюресъёсты тупатъянлы 3 миллиард манет пала висъямын, нош пайдазэ нокин уг шӧды. Сюресъёс пумысен аслэсьтыз кылзэ вераз Иж городлэн йырыз Александр Ушаков:

— Сюрес ӧжытсэ 4 ар чиданы кулэ, солэсь вазьгес асфальт пырдыны кулэ ӧвӧл, нош ӧз чида ке, сюрес лэсьтӥсьёс сое ас коньдонэнызы выльысь тупатъяны кулэ. Та вакытэ гордысь тросаз ульчаосын лэсьтӥськон, шонергес луоз, дыр, вераны кышъяськон ужъёс мыно. Сое 1-тӥ маёзь йылпумъяны куремын, нош 12-тӥ июньлы городысь тужгес урод сюресъёсты волятоно. Со понна туэ гужемлы тырмыт коньдон висъямын.

Лэсьтӥськон ужъёслэн кыӵе ульчаосын мынэмзы сярысь тодыны луоз город администрацилэн сайтысьтыз. Городлэн йырыз чырмытгес кариськыны куриз асьсэды адямиосты но, сюрес лэсьтӥсьёслэсь умойтэм ужамзэс синйылтыкузы, шып медаз пуке.

Нылпи садэ — куинь аресысен

Нылпи садлы кулэяськисьёслэсь лыдзэс кулэстон вылысь берло ньыль ар куспын ватсаса 4 сюрс 761 инты усьтэмын. Озьы 3-7 аресъем тэшкылиослы ваньзылы нылпи садэ путёвкаос висъямын. 2013-тӥ арын чакламын на эшшо 620 пиналлы ватсаса инты усьтыны. Ю-2 но 8-тӥ Восточной микрорайонъёсын 220 интыен нылпи садъёс пуктыны чакламын.

Бадӟым саклык висъяське нылпи садъёсын ужасьёслы. Кылем арын воспитательёслэсь уждунзэс 37 процентлы йылтэмын. Со сяна, городысь социальной политикая алан ужась комиссилэн ӵектэмезъя, егит воспитательёслэн но нянечкаослэн нылпиоссы садике ветлэмзы понна огъя дунлэсь 10 процентсэ гинэ тыро. Таӵе льготаосты куто 2 сюрс 500 ужасьёс.

Валентина Емельянова
Туспуктэмез: udmfoto.ru

Удмурт Дунне
By Удмурт Дунне Май 6, 2013 10:52
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<