Улон сое ӧз чигты

Удмурт Дунне
By Удмурт Дунне Май 28, 2013 11:12
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Улон сое ӧз чигты

Влад Леконцев

Влад Леконцев

Алнаш ёросысь Блатгуртысь Влад Леконцев — инвалидъёс пӧлын куасэн бызьылонъя дуннеысь чемпион. Улон солы «шах» пуктӥз 2007-тӥ арын гужем: Влад кылиз паллян китэк.

— Кызьы таӵе шимес учыр бӧрсьы ӧд чигиськы?

— Секыт вал, нырысь-валысь ураме но туж шер поталляй, нош школаын ӵемгес классын гинэ пукылӥ. Озьы ке но анае Тамара Яковлевна, атае Алексей Леонидович но эшъёсы ноку но монэ огнаме ӧз кельтылэ, котьку но юрттыны, буйгатыны тыршизы. Больницаын кылльыкум ик, анае спортэн герӟаськон луонлыкъёс сярысь вералляз. Соку йырам малпан кылдӥӟ куасъёсын ворттылэмысь ӧвӧл дугдоно.

Семьямы бадӟым. Мынам вань Антон агае, Вова выны но Милана сузэре. Анай-атай пичи дырысенымы спортэз яратыны дышетӥзы. Анай егит дыръяз спортсменка вылэм.

— Тодӥськод на-а нырысетӥ малпанъёстэ, выльысь куасъёс вылэ султыкуд?

— Со нуналэз али ке но тодам вайылӥсько. Сюлэмшугъяськон котырам укыр зол кырмиськем… Мугорме азьло сямен уг ни шӧдӥськы: мар кароно, кызьы шонер вамыштоно — номыре уг валаськы… Выльысь куасъёс вылэ султыны, буйганы но ас кужымелы оскыны юрттӥз Алнаш школаысьтымы тренер — Богданов Николай Павлович.

— Кызьы нош али юрттӥсеныд Виктор Николаевич Кузнецовен тодматскид?

— Азьпал улонме умой-умой спортэн герӟаме потӥз. Одӥг пол радио пыр Виктор Николаевичлэсь инвалидъёсты спортэн эшъяськытон сярысь вераськемзэ кылӥ. Ижкаре дораз ветлӥ, монэ одӥг толэзьлы сборазы чортӥзы. Со дырысен Виктор Николаевич мынам спортъя матысь эше луиз. Мугормес кыдатӥм Галина Кулаковалэн но «Югдон» спорткомплексъёсын. Толэзьскын умой-умой куасъёс вылын сылыны дыши. Собере элькунысь вожвылъяськонъёсы но ветлыны кутски.

— Кызьы сюрес лёгид Россилэн сборнояз?

— 2009-тӥ арын Сыктывкарын Россилэн куасэн бызьылонъя 1-тӥ чемпионатэз ортчиз, со мон понна нырысетӥез бадӟым ӵошатскон луиз. Отысь 5-тӥ но 6-тӥ интыен бертӥ. Нырысетӥ интыос басьтыны быгатӥ ке, монэ Удмуртилэн сборнояз кутозы шуыса, эшшо но золгес тренироваться кариськи, озьы мукет ӵошатсконъёсын вормыны быгатӥ ини. Удмуртилэн сборнояз пыреме бере Россилэн сборнояз шедьыны ужпум пуктӥ.

Ханты-Мансийске, Россилэн чемпионатаз, мынон понна быдэс гужемзэ пӧсяй, дасяськи. Отын 2-тӥ интыозь туби. Озьы 2010-тӥ арын Россилэн командаяз шеди.

2012-тӥ арын толсуре Финляндиысь Вуокатти городын пыриськи дуннелэн кубокезлэн этапаз. 10 иськем трасса секыт потӥз. Но трос малпаськыны дыры ӧй вал: секыт-а, капчи-а — вань кужымме люкаса, азьлань гылӟыны тырши! Та вожвылъяськонлы пыр-поч дасяськеме токма ӧй вал, 1-тӥ интыез басьтыны быгатӥ! Дуннеысь чемпион — со кема дасяськыса, зол пӧсяса басьтэм ним.

— Кыӵе вожвылъяськон тон понна самой секыт потӥз?

— Трасса вылысь кошкыны мылкыды одӥг пол гинэ ӝутскылӥз. Со вал Сочиын, Дунне кубокез утыку, 20 иськемез ортчыкум. Сочиын туж трос ӝужыт гурезъёс. Озьы ке но кужым шедьтыны быгатӥ но финише кыкетӥ вуи. Финишын лымы вылын кылльыкум, асме туж шудоен шӧдыны ӧдъяй…

— Кыӵеесь пото тыныд мукет кунъёс?

— Мыным тужгес но зол кельшиз Швециын, яраз инкуазьзы, синмаськымон нюлэсъёссы но тыоссы. Куаслы трассаоссы но кыдёкын ик ӧвӧл. Но ӵемгес тренировкаосы ветлӥськом Финляндие: отын ми гужем но, толалтэ но бызьылӥськом.

— Кызьы спортсменлэн нуналыз радъяське?

— Нуналмы кутске вазь ӵукна ик. 7 часэ зарядкалы дась луоно, 8 часэ сиськиськом, 10-сен — кык час пала тренировка, 12 час котыр — нуназеян, 16 часозь шутэтскиськом-кӧлӥськом, нош ик бызьылӥськом, ӝытсэ куртчиськом. Берло кин кызьы ваньмон дырзэ ортчытэ, нош школаын дышетскисьёс гуртысь ужзэс лэсьто. 20 часэ ыбылӥськонмес волятӥськом. Компьютер сьӧрын пукыны лэзё, кӧлыны выдытозь, 22 часозь, гинэ.

— Кызьы адӟиськод азьпал улондэ?

— Али Сочие паралимпийской шудонъёсы сюрон понна дасяськисько. Со сяна, Удмурт кун университетын педагог-психологлы заочно дышетскисько. Кема малпаськи, кыӵе удысэз бырйыны. Азьланяз спортивной психолог луыса ужаме потэ. Спортсменъёслэн улоназы туж трос шуг-секытъёс кылдо, командаын одно ик луыны кулэ пуш дуннеез шӧдӥсь адями. Малпасько, мынам одно ик пӧрмоз, ачим но трос сюлэмшугъяськонъёс пыр ортчоно луисько…

* * *
Куасъёс Влад понна тыос кадь — соосын со шока. Со сямен тыршись но спортлы вань сюлэмзэ сётӥсь адямиосты шер пумиталод. Куасъёс юрттӥзы солы дуннеез адӟыны. Куд-огез ош кадь таза муртъёс валессылэсь уг ӵыдыло, нош кин ке, инэз адӟытэк, куараос кылытэк, музъем вылэ лёгиськытэк, зэмос вамышъёс лэсьтэ!

Анастасия Тутаева

Удмурт Дунне
By Удмурт Дунне Май 28, 2013 11:12
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<