Удмурт Ренессанс

Удмурт Дунне
By Удмурт Дунне 14 мая, 2013 09:53
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Удмурт Ренессанс

М. Новиковалэн коллекциез

М. Новиковалэн коллекциез

30-тӥ оштолэзе Удмурт кун филармониын ортчиз модалы сӥзем «Эль ныл» фестиваль. Mademoiselle Oudmourte модельной агентствоысь 13 нылъёс пӧлысь тужгес устозэ бырйимы. Вормись луиз Можгаысь 24 аресъем Ирина Игнатьева.

Модалиос
13 нылъёсын ужаны кутски куарусён толэзе. Котькудӥз — огшоры мудор-тус гинэ ӧвӧл, сямынызы но, тусынызы но висъясько. Уд вера, удмурт модалиос дунне стандартъёслы тупало шуыса. Ӝуждалаенызы куинез-ньылез гинэ ушъяськыны быгатозы. Чебер ветлэменызы — ӝыныез. Туспуксьыны но огез-кыкез гинэ зэмзэ пӧрмыто. Озьы ке но ӧм чигналэ — «Эль ныл» фестиваль борды басьтӥським. Ӵапак та ужрадын усьтоно кариським ар куспын люкам быгатонлыкъёсмес.

Ужрадын нылъёс будэмзэс возьматӥзы. Дӥсьсэс шаплы вошъязы, дэремъёс но вылазы чебер пуксизы. Зэм но, тросэзлы уг тырмы на дӥсьтон. Та бордысь ик пото шуг-секытъёс: я ветлон сямзы йӧн ӧвӧл, я мылкыдъёссэс ватыны уг быгато. Зэмос модали дась луыны кулэ котьмалы: ымныр тусыныз мылкыдзэ возьматыны, дӥськутэзлы синмаськытыны. Веранэз ӧвӧл, мултэс килограммъёс люкетыны кулэ ӧвӧл шуыса.

Ирина Игнатьева

Эль ныл-2013 — Ирина Игнатьева

Эль ныл-2013 Ирина Игнатьева котькуд ласянь пусйымон луиз. Со уг возьдаськы сценалэсь, тусыз но модалилы тупа: спортэн эшъяське, чебер, кузь йырсиез пунэмын. Ирина утӥз валтӥсь кузьымез: Татьяна Москвиналэсь туала дэремзэ, кускерттон, кышет, бадӟым синучкон, спонсоръёслэсь пичи кузьымъёс. Озьы ик сое бырйиз «Перепечкин» удмурт кафе — кузьмаз сертификат.

Кристина Юферева

Кристина Юферева вотэс куара сётонын вормиз

Вотэсын тужгес но трос куара бичаз дэбес ныл Кристина Юферева. Кристиналэн тусыз тросэзлы удмурт ӧз поты, вылды: ӝужыт но веськрес, зэмос модельлы укша. Кристиналэн ваньмыз азьпалан ай, со 10-тӥ классын гинэ дышетске.
Ужрадын висъяськиз мукетыз но уйпал дыды — мисс «Чечым» луиз Ярысь Ксения Евсеева. Ксюша ассэ эрико возе, шӧдӥське «Чеберай» ӵошатсконэ пыриськемез.

Олеся Полатова

Олеся Полатова

«Чеберинаосын» вожвылъяськись Татьяна Щёткина но, «Эль ныл» фестивальын нокыӵе номинациын ӧз ке но вормы, ассэ зэмос моделен возьматӥз. Ужрадэ ачиз «Чеберай-2012» Олеся Полатова но пыриськиз. Со ик луиз залысь учкисьёслэн вормисьсы. Тросэз пусъё, Полатова — модель ӧвӧл, укыр кужмо солэн сямыз, узыр пушдуннеез. Нош учкисьёсты со ас палаз берыктӥз чебер кырӟаменыз. Куаразэ шедьтыны солы юрттӥз Катерина Кенӟали кырӟась.

Елена Иванова

Елена Иванова

Нимысьтыз призъёс утӥзы тужгес но ӝужытэз дыды — Елена Иванова — но тужгес лапегез — Кристина Тихонова. Татарстанысь Балтач ёросысь Лена Ивановалы синмаськемзэ ӧз ваты жюрилэн ёзчиез, фотограф Александр Горбунов. Леналы ӝужыт каблукен ветлыны капчи ӧй вал ке но, яркыт образъёс кылдытыны быгатӥз, дэремъёсты улӟытӥз. Кристина утӥз суредъёсын но рамкаосын вуз карись салонлэсь сертификат. Таиз дыды — тужгес но удмурт, востэм сямо.

Анастасия Тутаева

Анастасия Тутаева

Озьы ик пусъемын вал Анастасия Тутаева — тазэ удмурт Википедилэн, эрико энциклопедилэн, ымнырыз каризы. Настя гожъяськыны но яратэ. Кибашлы солэн выныз но — Коля модалиослы но ӝытэз нуисьёслы удмурт флешка кузьымъёс вӧлӥз.

Пусйытэк ӧвӧл мукет нылъёсты но: Дарья Петрова, Анна Загуменнова, Наталия Волкова, Наталья Ившина но Мария Векшина быгатыса ветлӥзы, удмурт учкисез шумпоттӥзы.

Дизайнеръёс
Дӥськут кылдытӥсьёс сярысь верано ке, нырысь кышкамы ик: оло, тырмыт уз люкаське? Полина Кубиста, Наталья Кожевникова, Софи Разина пыриськыны мылкыд ӧз каре. Паймытӥзы но данъяськон мылкыд вордӥзы Вера Кузнецова но Светлана Мельникова — таосызлэн коллекцизы рос-прос, 13 муртлы чакламын: джинслэсь дукесъёс вашкала сямен вуремын, кечато басмаос огшоры улонын нуллымон дэремъёслы тупало. Шаркан ёросысь Быги гуртын вордскем ӵош ужась эшсы Елена Тополева озьы ик шыкысъёсысь джинслэсь бичет поттӥз: вань ужъёсыз туала тусоесь но вашкала сямен киын пужъятэмын. Таин сэрен котькудӥз дэремез яке штанэз 5 сюрс манетлэсь ӧжыт уг сылы. Лена оскытӥз, дунтэмгес вурыны тыршоз, амал утчалоз — басьтӥсьёсыз куризы уго.

Шукырес но узыр адскиз «Шаркан-трикотаж» фабрикалэн кык сузьетэз. «Емышо гуждор» керттэм бичет Сочи карын кылем арын вормись луиз. Гужемлы тупась дэремъёсты но сарафанъёсты мыло-кыдо нуллозы сяськаё пужыосты яратӥсь апайёс.

8

Дано горд дэремен — Анастасия Петрова

Ужрадын воректӥз Любовь Широбокова. Удмуртиысь дизайнеръёс пӧлысь огназ со Пермьын ортчем фестивальысь куинетӥ интыен бертӥз. Горд дэремзэ возьматӥз чеберай Анастасия Петрова.

Мария Векшина возьматэ Monami дизайн-студилэсь майказэ

Мария Векшина возьматэ Monami дизайн-студилэсь майказэ

Котькуд нунал нуллымон дэремъёссэ вайиз егит дизайнер Дина Дэрем. Егитъёслы тупась модельёсынызы тодматӥзы «Монами» дизайн-студиысь Андрей Соловьев но Катя Сысоева. Соос пӧртэм гожтэмъёсын футболкаос лэсьтӥзы: «Опа, вал но скал», «Ноябре ӧд ке кынмы, январе но уд ӟонгыра», «Одӥг муш уно чечы уз люка» но мукет. Соос борды тупазы Диана Нуриевалэн кильтро юбкаосыз но Ирина Загребиналэн яркыт сумкаосыз.

Нош зэмзэ но абдратӥзы учкисьёсты выжыкылысь принцессаослэн кадь пуштырес дэремъёс. 13 удмурт ныл пӧртэм дауръёсысь мода возьматӥз: кин Шор дауръёсысь вуиз, кин ке — Ренессансысь, кин ке — 19-тӥ даурысь… Таӵе синмальдымон коллекциез Сарапул карысь вайиз дизайнер Мария Новикова. Нимысьтыз та коллекциез возьматон понна сцена вылын чузъяськиз удмурт романс, нош быдэстӥз сое егит усточи Андрей Конышев.

Фестивальын 19 пӧртэм коллекция возьматэмын вал. Озьы ке но нылашъёс тужгес но усто адскизы удмурт дэремъёсын. Соосты ас ёросъёсысьтызы, гуртъёсысьтызы люказы. Пусйыны кулэ, нырысетӥ инты басьтэм Ирина Игнатьевалэн удмурт дэремез тужгес но шоголь адскиз.

Кырӟасьёс но куноос
Фестивальын трос гинэ егитъёс воректӥзы. Татарстанысь Бавлы ёросысь вуиз но аспӧртэм диалектэн кырӟаз Павел Александров — Шонер Пол. Кужмо куараеныз паймытӥз Ижын улӥсь Кристина Ярская. Нылаш азьланяз но ассэ возьматоз ай, мылкыдыз вань пичи калыкъёслэн «Евровидениязы» удмуртъёсты возьматыны. Вань залэз ас палаз берыктӥз, шунытсэ кузьмаз Екатерина Данилова — Катерина Кенӟали. Таиз нылмурт фолк но транс амалэн гурла. Нылпи вайыны дасяське ке но, сцена вылэ потыны ӧз кышка. Солэн кырӟамез улсын возьматӥз коллекцизэ пинал вайыны дасяськись нылкышноос понна сюлмаськись Ольга Вужер.

Надя Сапожникова

Надя Сапожникова

Нош Кузебай Герд нимо нылпи садысь дышетӥсь Надежда Сапожникова пиналъёсыз дӥсяз, нылпиос кубыз чузъяськем улсын эктӥзы. Эсьмаса «Эктон корка» ансамбль но жингыртӥз! Эшшо Дэбес ёросысь Зар-Медлоысь, Шаркан ёросысь Быгиысь мода театръёс, Татьяна Москвиналэн дэремъёсыныз потэм Пичи Пургалась нылашъёс… Арганчиос но битбоксеръёс, хип-хоп эктӥсьёс, романс — ваньзэ вераса но уд быдты.

Эль ныл гинэ ӧвӧл, эль пи сярысь сюлмаськыны дыр вуиз. Туала удмурт мода — сыӵе азинскись, пӧртэм тусо, дӥсьтӥсь. Оскем потэ, вуоно арын фестиваль кужмоялоз но йыг-йыг пыд вылаз султоз.

Дарали Лели
Туспуктэмез: udmfoto.ru

Удмурт Дунне
By Удмурт Дунне 14 мая, 2013 09:53
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<