Туннэ 80 тырмысал…

Удмурт Дунне
By Удмурт Дунне Май 24, 2013 10:38
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Туннэ 80 тырмысал…

 

Удмуртиысь калык писатель К. Ломагин Калык эшъяськон орденэн пусъемын

Удмуртиысь калык писатель К. Ломагин Калык эшъяськон орденэн пусъемын

Печать юртэз Ижкарлэн шорысьтыз Воткинской шоссе ураме выжтэмзы бере, 1980-тӥ арысен Кирилл Егорович Ломагинэн ӵош одӥг кабинетын ужаны кылдӥз.

Ай азьпалан — быдэс
гужем,
Поталомы нюлэс куше,
Бичаломы пӧртэм
турлы
Возь выл сяська,
куакагырлы…

Та кылбурме печатлаку, Кирилл Ломагинлы сӥземын шуыса, пусйи вал. Шонерзэ вераса, солэн котьку егит мылкыдызлы паймыса, ӵош ужан вакытмес син азям пуктыса, гожтӥ.

Город пуме интыяськем юрт вадьсын ик — писпуосын-куакъёсын котыртэм тымет, нюлэс кушъёс… Артэ ик — бусы. Туж шулдыр инты! Инкуазез яратӥсь мурт нуназеян вакытэ одно ик отчы дыртылӥз, тымет валлин сюрес кузя вамышъялляз… Кык-куинь ке но сяськаен берытскоз, ӝӧк вылам вуттоз вал…

Быдэс гужем ай
азьпалан,
Зарни сӥзьыл но, тол но
вань.
Тулыс гинэ ортче ини,
Льӧмпу сяська пурӟе
тани…

Соку 80 аресъёс луон сярысь йырын ик ӧй вал ай. Малпамы:

Азьпаламы — дано ужъёс,
Люкиськонтэм дуно
эшъёс…
Быдэс улон ай —
азьпалан…

Гурт улонэз ӟеч тодӥсь, газетын та удысын кема ужам муртэ выль интыын выль интые выжтӥзы: культурая отделэн кивалтыны оскизы. Та дырлы угось Кирилл Егорович ӝот-ӝот кырмиськемын вал ини чеберлыко гожъяськон борды. 1960-тӥ-1970-тӥ аръёсы нырысетӥ очеркъёсыз, веросъёсыз, повестьёсыз, кылбур бичетъёсыз потӥзы.

Кирилл Ломагин вань улытозяз, шуыны луэ, «Советской Удмуртилэн» редакцияз ужаз. Нош газет аксым конвейер кадь: нуналлы быдэ чуръёс, чуръёс… Калыке, ужрадъёсы потано, телефон вылын пуконо, со сяна, кивалтоно адямиосыдлэсь (соку ай ми кадь егитъёслэсь) гожъямъёссэс лыдӟоно-тупатъяно. Вылаз ик, редколлегилэн ужъёсыныз, пӧртэм партийной поручениосын ёрто. Кытӥ ке ӧй вал редакциысь литобъединениез нош люкано, солы дасяськоно…

Озьы ке но, паймоно кадь, бадӟым эшелэн йыраз бадӟым малпанъёс бергазы. Соосты со ӵемысь шара поттылӥз. Нуналлы быдэ кадь ивортылӥз, ма луэ ни та вакытэ произведениысьтыз героен Рево Конюховен… 1980-тӥ арын «Молот» журналын «Кузьма агайлэн садэз» веросэз печатласькем бере уго, та темазэ паськытатыса, «Котьку возь сюлэмад» повесть бордын ужаны кутскиз. 1983-тӥ арын со «Удмуртия» издательствоын потӥз ни. Нош дас ар ортчыса, та бордысь Кирилл Ломагинлэн романэз кылдӥз — «Котьку сюлэмын». Книгапоттонниын ужасько ни вал бере, ӵапак мон та изданилэн редакторез луи. Туж тодмо но дуно потыса, киям кутӥ рукописез: мае воштэм, мар выльзэ ватсам автор…

Таин валче тодам лыктэ туж юн сюлэмшугъяськемез но. Россиысь Писательёслэн огазеяськоназы пырон понна ужъёсыд одно ик ӟуч кылэ берыктэмын луыны кулэ: подстрочникъёс лэсьтоно. Та ӝегыт ужен вырыны журналистлэн кытысь дырыз тырмоз? Соин ик «Котьку возь сюлэмад» повестьысьтыз куд-ог люкетъёссэ ми но, редакциысь егит ужасьёс, берыктыны юрттӥм: котькудмылы кык-куинь бамен ке но перевод лэсьтыны сётъяз.

К. Ломагин вань лул-вирзэ гожъяськонлы сётӥз ке но, писательёслэн радазы пырон со понна секытэн сётскиз. Талэн пӧртэм мугъёсыз. Нырысь ик — ас гожъяськон сямыз, литератураез со вакытэ дунъясьёслэн куронъёссылы тупамтэез. Котьма ке но, номыр шоры учкытэк, Кирилл Егорович, саесъёссэ пужалляса ик, тыршиз. Газетын ужась, публицист, беллетрист луэм сяна, зэмос калык писателёзь будӥз. Зэм но, нырысь ик лыдӟись, огшоры калык солэсь «пӧрамъёссэ» дунъяз, авторлы уно гожтэтъёс но вуылӥзы, мылкыдзэ лӧпкытъязы. Ар ортче-а, уг-а — солэн выль повестез дась ни…

Пенсие потэмез бере, ваньмон дыр кылдыса, писательмылэн аръёсыз уката емышо луизы. 60 арессэ, тодӥськом, «Котьку сюлэмын» романэныз, выль книгаен, пусйиз. Та дырлы «Вождэ эн вай, Окыль», «Пазьгиськем кизилиос» но мукет веросъёсыз, «Юсь», «Кусолы мытылӥсь будос», «Ӟыгыръя киосыд вань дыръя» повестьёсыз вал ни. 2000-тӥ аръёсы гожтӥз «Вир», «Сьӧд тэльын пушъем яратон», «Гырлыё чиган», «Лялюк», «Сыръясь нюр» повестьёссэ. Таос газет-журналъёсын печатласькемын, огез-кыкез гинэ нимаз книгаен, авторлэн ас уксёеныз поттэмын. Жаляса верано, Кирилл Егоровичлы огазеям произведениосыныз йӧн-йӧн книгазэ кияз кутыны ӧз кылды — секыт висемез бере кылем арын 6-тӥ оштолэзь дырысен со асьме пӧлын ӧвӧл ни. 80 аръем юбилейзэ ачизтэк пусйиськомы…

Кирилл Ломагин лирик но, юморист но вал (озьы ик серекъяса шуылӥз: нимме мыдлань лыдӟоно ке, Кирилл — лирик луэ). Чеберлыко лул-сюлэмыз прозаяз но шӧдӥське. Бадӟым ужъёссэ гожтон куспаз шуак чилектэм малпанъёссэ кылбур чуръёсы кисьтылӥз. Умойёсыз гожтэмъёсыз «Шӧкычен кенешыса» бичетаз (1978) но «Мон ке пӧсь шокчи…» (2002) лирика книгаяз пыризы. «Молот» (али «Кенеш») журналлэсь номеръёссэ бугыръяса, адӟи: ӵош ужан вакытамы, 1980-тӥ аръёсы, со ӵушкась но серемес кылбуръёссэ пӧрмытъям на. Соос нимаз книгаен ӧз печатлаське. Газетэз лыдӟисьёсмылы куд-огеныз тодматскыны дэмласьком.

Татьяна Чернова
Туспуктӥз Владимир Беломорских

Удмурт Дунне
By Удмурт Дунне Май 24, 2013 10:38
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<