Снайперлэн дыгомонэз

Удмурт Дунне
By Удмурт Дунне 17 мая, 2013 13:39

Пичи Пурга ёросысь Тургуртысь (али со гурт ӧвӧл ни) Екатерина Михайловна Бочкарёва ожмаськиз снайпер луыса.

1923-тӥ арын вордскем нылаш 7-тӥ классэз Кечолын быдтӥз, 8-тӥзэ — Пургалан. Ижысь педучилище бере одӥг ар ужаз нылпи садын Кечолын, собере Пургала кошкиз. Со аре ик война кутскиз. Комсомолецъёс ас мылкыдзыя снайпере дышетскыны куриськизы. Пӧлазы вал Катя но. Ма, сое озьы но нуысалзы. Семьяязы ньыль нылъёс гинэ вал бере, одӥгзэ пи интые военкоматэ ӧтизы.

Ёросысь комсомолецъёсын соку кивалтӥз Катялэн ӵош дышетскем эшез — Рая Решетникова. Со ик Бочкарёвалы дэмлаз Ижысь аэрофотосъёмка нуись эскадрильяе мыныны. Озьы Катя солдат луиз. Эскадрильяез Клязьма город доры вуттӥзы, ожъёслы матэ. Татын нылмурт куриськиз снайпере дышетскыны. Командирез лэзиз.

Снайпере дышетскон капчи ӧз йӧты. Тыбырад вещмешокен, пельпум вамен винтовкаен но противогазэн, кускад ошем сапёр лопаткаен котькуд нунал дасо иськемъёс бызьылоно вал. Кын музъемез лопатаен гудылӥзы асьсэлы ватӥськем инты лэсьтон понна. Котькыӵе куазен часъёсын ватӥськыса улӥзы, эшшо ке вырӟылытэк. Астэ шараяны эн сёт — сыӵе курон вал снайперлы. Сапёрлэн сямен ик, солэн но улонэз вакчи, одӥг пол янгышад ке. Дасо снайперъёс быдэс батальонэз зӥбыны быгатылӥзы. Соин тушмон одно ик быдтылыны тыршиз соосты.

1944-тӥ арын снайперъёслэсь ротазэс вуттӥзы Латвие. «Пӧйшураны» котьку ветлӥзы кык муртэн. Одӥгез сӧсырмиз я быриз ке, мукетыз сое тушмон кие медаз кельты. Катя аслыз эше бырйиз Ленаез, со но Урал котырысь шуыса. Нырысь ветлэмазы ик валазы, кыӵе шуг вылэм адями шоры ыбыны. Кӧня веразы дышетскыкузы ай: тӥ азьын — фашист. Эн чаклалэ егит-а, мӧйы-а. Сюлэмады жалян пыӵалоз, чиньыды курокез уз зӥбы ни. Жалянлы пум вуиз одӥг учырен валче. Ож бере нылъёсты пыртӥзы тушмонэн сутэм гуртэ. Одӥг корка гинэ кылем. Пыризы но, нылъёслэн вырӟемзы ӧз ни луы. Корка шорын кышномурт виемын, нош борддоре штыкъёсын ӵогъямын солэн кыкто пиосыз, алигес гинэ нонтэмысь дугдытэм макеос. Тӥни соку ваньзы кыл сётӥзы, тушмонэз жалятэк быдтозы шуыса.

1944-тӥ арлэн пумаз ожъёс мыно ни вал Германилэн музъем вылаз. Но немец зол кырмиськем Балтика зарезь дурысь Курляндие. Асьме но тушмон окопъёс вискын — 300 метр гинэ. Соин татын туж кулэ вал снайперъёс. Разведка ивор вуттӥз: ӝоген тушмон атакае потоз танкъёсын. Нылъёс интыяськизы окопъёсы пехотаен ӵош. Тани танкъёс ыбылыса матэкто ни. Сьӧразы пехотазы автоматъёсын тачыртэ. Асьме пулемётъёслы соосты ыбылыны кыдёкынгес. Ярано, снайперъёс бӧрсьысь бӧрсе уськытъязы тушмон солдатъёсты. Нош танкъёслы винтовка но, пулемёт но кышкыт ӧвӧл — пушкаосмы гинэ соосты вормизы. Тушмон чигназ.

Ӝоген ротаез мукет кышкыт интые келязы. Татын тушмон дорозь иськем пала луоз. Котыр сыръясь инты, тол куазен но лымы шуна, музъем кынмемын ӧвӧл. Уйин Катя эшеныз ватӥськизы асьме но тушмон окопъёс вискы. Ӵукна одӥг пол гинэ ыбыса вуттӥзы — кутскизы ук сётъяны пушкаосысь но миномётъёсысь! Катя окоп пыдсын, вуын, вырӟылытэк кылле. Ӝыт пал гинэ эшез доры нюжтӥськыны быгатӥз. Нош Лена сӧсырмем вылэм. Пеймытэн кыскыса сое нуиз асьме пала. Ӝоген Лена госпитальысь потӥз. Выль арез кыкназы ик пумитазы сержант нимын но быдэн «За отвагу» медален.

Нош но нош потазы соос «пӧйшураны». 1945-тӥ арын ни апрель толэзе люкиськоно луизы. Одӥг нуналэ туж ӟеч быръем интызэс шӧдӥзы тушмонъёс — котыр снарядъёс усьылыны кутскизы. Одӥгез Катя вӧзын ик пуштӥз. Ӝыт пал гинэ Лена сое шедьтӥз сюй улысь. Йырсазьзэ ыштэм, номыре кылӥсьтэм, вераськыны быгатӥсьтэм Катяез келязы Таллинысь госпитале. Татын ик снайпер Бочкарёва тодӥз Вормон сярысь. Йӧнатыса сое лэзизы гуртаз. Эшъёссэ но адӟыса ӧз вутты ни. Но соосын ортчем ож сюресъёссэ тодаз вайытӥз война бере вуэм Отечественной войналэн II степенё орденэз.

Екатерина Бочкарёва война бере бызиз Миндэр гуртэ быдэс войнаез ортчем Михаил Евдокимович Александровлы. 1947-тӥ арын Светланазы вордскиз. Ар ортчыса, берытскизы Кечолэ. 35 ар ӵоже Екатерина Михайловна дышетӥз покчи классъёсты.

Дышетӥсьсы снайпер вылэм шуыса тодэмзы бере пиналъёс одӥг пол гинэ ож сярысь юанъёсын ӧз ёртылэ. Вал дыгомытӥсез но: кӧня фашистэз вииды? Екатерина Михайловналы та юанлы валэктон сётыны туж секыт вал. Кызьы вералод соослы, адямиос шоры ыбылоно вал шуыса?

Екатерина Михайловна туннэ асьме пӧлын ӧвӧл ни. Светлана нылыз кема аръёс ӵоже дышетӥсьын ужаз. Табере пенсиын ни. Анайзэ со кык нунокъёсын шумпоттӥз. Соос быдэ вуэмын, анайзы бордысь кошкемын. Кышкасьтэм песянайзы пыраклы кылемын тодэ ваёнъёсазы.

Валерий Баймурзин

Удмурт Дунне
By Удмурт Дунне 17 мая, 2013 13:39
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<