Сю танкъёс шоразы лыктӥзы

Удмурт Дунне
By Удмурт Дунне Май 17, 2013 13:27

Сю танкъёс шоразы лыктӥзы

Ф. Плотников

Ф. Плотников

Быдӟым ож кутскем бере шаерысьтымы уно сюрс воргоронъёс кошкизы тушмонэз жугыны. Атайёсын ӵош пиос но мынӥзы. Палэнэ ӧз кыльы Можга ёросысь Плотниково гуртысь Плотниковъёслэн семьязы но.

Семьялэн кузёез Фёдор Плотников 1900-тӥ арын вордскемын, Граждан ожез пырпотэмын. Войнаысь бертэмез бере нод-нод, сабырлы воргоронэз пуктӥзы Биляр сельсоветэ секретаре. Ас удысэзлы со ӝог дышиз, ужзэ умой нуиз. Гуртын улон ас ӧраз пыриз, колхозъёс юнманы кутскизы. Но шӧдтэк шорысь кышкыт ивор вуиз: 1941-тӥ арын 22-тӥ инвожое Германия Совето Союз вылэ омырскиз.

Плотниковъёслэн семьяязы куинь нылпизы вал: Раиса, Зоя нылъёссы но Анатолий пизы. Война кутскон аре ик 18 аресъем Анатолиез фронтэ басьтӥзы. Нош ар ортчыса, 1942-тӥ арын феврале, солдат луиз Фёдор Иванович но. Со шедиз пушечно-артиллерийской полке, нырысетӥ батареяе. Соослэн взводазы Удмуртиысь кӧня ке кузя ожмаськизы. Кылсярысь, Плотниковлэн расчётаз вал Можгаысь Г. Буторин, Сюмсиысь А. Максимов но Ф. Сорочин, Дэбесысь П. Ситников. Нырысетӥ батареяын телефонистъёс вал Ижысь Т. Косарев но Эгралась Н. Малых. Та взводэн 1942-тӥ арын 15-тӥ мае нырысетӥ оже пыриськиз Фёдор Плотников. Быдэс гужемзэ соос тушмон позициосты пуштытъязы. Нош 1943-тӥ арын, асьме армия бадӟым наступление мыныку, артиллеристъёс пехоталы юрттӥзы Орёл улосысь гуртъёсты мозмытыны.

Удмуртиысь сержант пыриськиз Курск понна ожмаськонэ, мозмытӥз Белоруссиез, штурмовать кариз Берлинэз. 1943-тӥ арын тулысысен гужемозь асьме солдатъёс ожмаськизы Курск-Орёл чугун сюрес котырын. Огполаз Ф. Плотников эшъёсыныз ӵош ватскизы Дружевицкий хутор доры. Соос дась вал котькуд минутэ тушмонлы пумит султыны. 5-тӥ июле Плотниковлэн орудиез 30 минут куспын 50 пол ыбиз тушмон шоры. Ӝыны час куспын кык тонна корт лобиз соослэн йыр вылазы. Тушмон талы дась ӧй вал, немецъёс дуринчиос кадь урмизы. Со куспын разведчикъёс ивортӥзы: пужым нюлэс сьӧрысь пырак соос шоры лыкто 100 танкъёс. Соос 3-4 иськеме кыстӥськемын, нош танкъёс мышкын вамышъя немец пехота.

Со ожмаськонэз Фёдор Иванович войнаысь бертэмез бере но тодаз вайылӥз, кузпалызлы вералляз.

— Курск дорын со ожмаськонэз ӵужатай ӵем тодаз вайылэм, — шуэ Фёдор Плотниковлэн внукез Владимир Бабурин. — Мыным со сярысь мадьылӥз ӵужае. Ӵужатай, пе, шуэ вал: батареялэн паллян палаз но бур палаз тыл гомаз, нош танкъёс пырак шорамы лыктӥзы. Ӵужатай куинь танкез пуштытэм, нош ож, пе, эшшо ӟырдытгес луэ. Пуштытэм танкъёс интые мукет тушмон техника матэктэ ини. Ӵапак ӵужатайлэн орудиез азьын ик гуньдэм эшшо одӥг немец танк. Ӵужатае малпам ни вылэм, татын ик быроз шуыса, но немецъёс кужымзылы оскиллямтэ, лэся, асьме солдатъёс шоры мынӥсь танкъёс соку берытскиллям но чигналлям. Ӵапак со пӧсьтолэзе луэм ож понна ик ӵужатаез данъяллям Горд Кизили орденэн.

Россиысь Писательёслэн огазеяськонзылэн ёзчиез Николай Кузнецов шаерысьтымы Быдӟым оже пыриськем аспалъёсмы, соослэн подвигъёссы сярысь книгаос дася. Трос аръёс ӵоже утчаське, бугыръяське Россиысь Обороная министерстволэн архиваз. Личной делоосты, наградной листъёсты лыдӟе. Озьы шедьтӥз Можга ёросысь Плотников сержантлэн ожмаськемез сярысь гожтэмъёсты.

— Фёдор Плотников висъяськиз Берлинын ожмаськон дыръя, со 89-тӥ стрелковой дивизиысь орудилэн командирез вылэм. 1945-тӥ арын 30-тӥ оштолэзе огаз ульчаын коркаосты пуштытъяз. Со юртъёсысен немецъёс асьме солдатъёсты ыбылӥзы. Фёдор Плотников куинь 4 этажъем коркаез пазьгиз, отын 40 пала немецъёс вал. Собере эшшо кык 4 этажъем коркаез пуштытӥз, отын 20 тушмон ыбылӥське вал. 1945-тӥ арын 1-тӥ куартолэзе Удмуртиысь сержант пазьгиз крепостьлы пӧрмытэм юртэз. Шаерысьтымы солдатэз Горд Знамя орденэн пусъён сярысь приказ потэмын 1945-тӥ арын 9-тӥ инвожое. Озьы ик сое Ленин орденлы дэмлаллям вылэм, — шуэ Николай Спиридонович.

— Ӵужатае туж востэм адями вал, войнаысь фотоосыз но малы ке ӧй вал, — тодаз вае Владимир Бабурин. — Гуртоос солэсь бадӟым наградаоссэ но ӧз тодылэ. Нош кышкатэк ожмаськемез понна ӵужатае данъямын Горд Кизили, Горд Знамя орденъёсын, «За боевые заслуги», «За взятие Берлина», «За победу над Германией», «За освобождение Варшавы» медальёсын. Ож сюресъёссэ калыклы ӧз вералля, ӵужаелы мадьылӥз. Тодаз вае вылэм лымы вылын кӧламъёссэс. Оло, соин но, тазалыкез лябӟемын вал.

Война бере со озьы ик сельсоветын тыршиз. Со ужысьтыз ик пенсие потӥз. Но шутэтскыны кема ӧз кылды, ӵужатай 1965-тӥ арын улонысь кошкиз. Жаляса верано, Анатолий пиез ож лудэ ик кылиз. Сое эшъёсыныз ӵош тушмон пӧлы ыстӥллям разведкае шуыса, отын ик егит солдат бырем.

Галина Семёнова

Удмурт Дунне
By Удмурт Дунне Май 17, 2013 13:27
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<