Виталий Шоркинлэн крезьгуръёсызъя кырӟанъёс

Удмурт Дунне
By Удмурт Дунне Май 31, 2013 13:22
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Виталий Шоркинлэн крезьгуръёсызъя кырӟанъёс

Синмаськид ке — яратод

Кылъёсыз Алексей Ельцовлэн

Гажаное — тракторист но,
Эшъёсы серекъяло:
Со, пе, артэ мыныкуз,
Чебер дӥсьтэ сьӧдмалоз.
Кызьы карод,
Ма карод?
Синмаськид ке —
Яратод!

Гажаное — комбайнёр но,
Эшъёсы серекъяло:
Руль сьӧраз артэ пуксид ке,
Юатэк, пе, чупалоз.
Кызьы карод,
Ма карод?
Яратӥд ке —
Чуп карод.

Яратонэ — агроном но,
Эшъёсы серекъяло:
Луд вылэ, пе, со мынэ ке,
Сьӧр нылъёс бӧрсяз ветло.
Кызьы карод,
Ма карод?
Яратӥд ке —
Чидалод!

Табере ини ӵошен ми.
Корка тыр нылпиосмы.
Эшъёслэн серем быриз ни —
Палтури пуко ваньмыз.
Кызьы карод,
Ма карод?
Ӝожомид ке —
Вожъяськод!

Гажаное - гармонист

Синмаськид ке — яратод

Италмас сяськаос

Кылъёсыз Галина Романовалэн

Мамында сяськаос  дуннеын, дуннеын,
Нош мыным ӵуж сяська дуногес.
Пишты тон, италмас, возь вылын, возь вылын —
Тулыслэн улонэз, чеберез.

Тон бордысь тусбуйзэ шундылэсь, шундылэсь,
Нылмуртлэсь чеберзэ адӟисько.
Ма кулэ на мыным тулыслэсь, тулыслэсь,
Мон ачим тулыс кадь  луисько.

Ойдо мед шуозы кинъёс ке, кинъёс ке:
Ӵуж сяська — люкиськон-куректон.
Италмас ке ӝужа возь вылын, возь вылын,
Сюлэмам бугырске яратон.

Мед нуоз монэ ялан сюрес, кузь сюрес,
Жадеме ортчемын ни мынам.
Италмас сяськалэн чеберез, чеберез
Весь улоз, уз, уз безды сюлмам.

Мемиен люкиськон

Кылъёсыз Виталий Шоркинлэн

Сяськалэсь чебергес
Вань меда на маке?
Адӟыса ик кӧтыд тырымон!
Мемилэсь мусогес
Вань меда на маке?
Учкыса ик сюлмыд буйгамон!

Ой, ӧвӧл, дыр, ӧвӧл, дыр, ӧвӧл
Мемилэсь мусогес
Возь вылысь италмас сяськаед.
Ой, ӧвӧл, дыр, ӧвӧл, дыр, ӧвӧл
Мемилэсь дуногес
Дуннеын нокыӵе кузьымед.

Тани нош уйвӧтам
Адӟисько тусбуйдэ,
Витисько шунытак ваземдэ.
Но ӧвӧл ни, ӧвӧл
Мемие мон дорын,
Уд, уд сёт ни мусо киостэ.

Ой, ӧвӧл, дыр, ӧвӧл, дыр, ӧвӧл
Бакчаысь сугонэд
Быльырась синвуэ кадь курыт.
Ой, ӧвӧл, дыр, ӧвӧл, дыр, ӧвӧл
Нокыӵе кайгуэд
Мемиен люкиськон кадь секыт!

Тон ӧвӧл мынам

Кылъёсыз Галина Романовалэн

Тон ӧвӧл мынам,
Тон уд лу мынам.
Ыштыны гинэ
Шедьтӥськем тонэ.

Ойдо ӵош пуком,
Ваче син учком.
Пичи шудмылы
Туннэ шумпотом.

Та мӧзмон дыръя
Сюлэмме туннэ
Ӝамдэлы ке но
Буйгатод, оло.

Мон ӧвӧл тынад,
Мон уг лу тынад.
Мон уг кенжыты
Яратон тылӝу.

Ӟардытозь туннэ
Ойдо ӵош пуком.
Пичи шудмылы
Нош ик шумпотом.

Арганчилы

Кылъёсыз Гильман Касимовлэн

Жингрес гурдэ кисьты, арган,
Гажанэ мед кырӟалоз.
Чебер кылъёс ӧй ке шедьты,
Арганэ мед вералоз.

Шуд, арганэ, шуд, арганэ,
Верам кылыд туж ӟырдыт.
Яратоно ныл туганэн
Кезьыт дыръя но шуныт.

Эх, арганэ, эх, арганэ,
Вожа, лэся, гажанэ.
Шӧдӥсько мон, сюан бере
Со пыдло ватоз тонэ.

Жингрес гурдэ кисьты, арган,
Гажанэ мед кырӟалоз.
Чебер кылъёс ӧй ке шедьты,
Арганэ мед вералоз.

Буртчин возь вылын

Кылъёсыз Галина Романовалэн

Буртчин возьмы вылэ
Кизилиос, пе, усиллям.
Мыном, эшъёс, отчы,
Бичаломы айшетамы,
Йырси пунэтамы бырттыломы.

Вало шурмы вылэ
Вуюисьёс, пе, васькиллям.
Мыном, эшъёс, отчы,
Куром ялтрась буёлъёссэс,
Ворпо-ворпо дэрем вурыломы.

Лабрес уйпу улэ
Сьӧрлось пиос, пе, лыктӥллям.
Мыном, эшъёс, отчы,
Кырӟаломы-вераломы,
Паймытомы, нылъёс, чеберенымы.

Буртчин

Буртчин возь вылын

Удмурт Дунне
By Удмурт Дунне Май 31, 2013 13:22
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<