Шаян дыр

Удмурт Дунне
By Удмурт Дунне Май 31, 2013 11:10
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Шаян дыр

22-31-1

 

1-тӥ июнь — Нылпиосты утён нунал

Вуэз миськоно

Воспитатель:
— Кранысь вуэз, пиналъёс, юыны уг яра. Ма кароно сое чылкытатон понна?
4 аресъем Настя:
— Миськоно!

«Ӟеч лу!»

Анаез пиналзэ нылпи садэ дӥся, соиз уг кылзӥськы.
Анаез:
— Рома, мон тонэ али доре огнадэ кельто!
3 аресъем Рома анайзэ чупаз но шуэ:
— Ӟеч лу!

Кӧня перепеч сиид?

Воспитатель сиськонниын 5 аресъем Лизалэсь юа:
— Лиза, тон кӧня перепеч сиид?
— Мынам анае вераз вал…
— Лиза, тон кӧня перепеч сиид?
— Ну, мынам анае вераз вал…
— Лиза, тон кӧня перепеч сиид?
— Мон али мукетыз сярысь малпаськисько!

Ужысьтыд уллялозы

Илья воспитательлы сяська вае но шып гинэ кузьма.
Анаез:
— Илья, ма верано?
Илья шып улэ.
Анаез:
— Ильюша, ма верано?
Илья анаезлы:
— Мын ини уж дурад, нош ик бере кылёд, ужысьтыд уллялозы!

Тунаськись

Мариналы 5 арес:
— Нырысь бызьыны турттӥсько вал Матвейлы, собере малпай тунаны Артур вылэ, нош пӧрмиз: бызьыны умойгес луоз Никиталы.

Курег сиись

Воспитатель:
— Кыӵе пӧйшуръёс пӧлы пыре ӟичы?
4 аресъем Егор:
— Курег сиисьёс пӧлы!

Вутэк — выйысалмы

Воспитатель:
— Малы асьмелы ву кулэ?
4 аресъем Соня:
— Ву ке ӧй луысал, адямиос ӧй дышысалзы уяны но ваньзы выйысалзы.

Надежда Сапожникова

***

«Клоскозопие»

Стёпа Скворцов, 6 арес.
— Мама, ми доры садике врачъёс ветлӥзы.
— Кинъёс бон учкизы?
— Уг тодӥськы. Шуизы, синмыд умой адӟе, пельыд умой кылэ, клоскозопиед вань.

«Еслитэк»

Стёпа удмурт сямен шалтыр вераське, но малпаське ӟуч сямен.
Алигес вера:
— Если мон бадӟым будо…
— Стёпа, «если» кылтэк верано, — визьмасько сое.
— Если мон бадӟым будо, — азьланьтэ Стёпа.
— Стёпа, еслитэк… — нош ик кыл висказ пырисько.
— Еслитэк мон бадӟым будо, аслым куинь машина басьто, — веранзэ йылпумъяз со.

Елена Скворцова

***

Пӧсямы, пе

Уже кошкыкум, куатетӥ классын дышетскись Владик пиелы косӥ дыдык быдӟа чипыосты чакланы. Урамын кезьытгес луиз ке, коробкае тырыса, шунтыны корка пыртыны.
Бертыса юасько:
— Пие, чипыостэ шунтӥд-а?
— Шунтӥ. Тубат кузя уйылӥ, уйылӥ но, бурдъёссэс ик лэзьязы. Ачим но пӧсяй.

Василиса Андреева

***

Тон ик янгыш!

Сад-бакчаысен вить аресъем Игнатлы вышкые ву тырмемез учкыны косӥ. Я, шуиз. Нош ачиз эшеныз шудыны ёрмем. Кӧня ке улыса, бакчатӥмы жальыр гинэ ву бызьыны ӧдъяз. Игнатэз куаретӥсько, малы ӧд эскеры шуыса. Со, эшезлы вазиськыса, вера:
— Милям семьяямы котьку но янгыш мукетыз. — Собере мыным шуэ: — Тон ачид ик янгыш!

Наташа Деньгина

***

Котэз утчан

Егор, нылпи садэ мыныкуз, ӟуч сямен уг вераськы вал. Улаз кызяны шедьтэм но воспитательлы шуэ:
— Мынам кот.
Соиз паймыса коӵышез утчаны кутскем. Валес котырзэ но бугыръям ни, нош пинал весь «кот» шуэ. Котырзэ кутылыса гинэ, валатскем ни, мар сярысь вераськон мынэ.

Елена Никитина

***

Дюймовок но Дюймовочка

Вить аресказ внучкаелы Вероникалы кузьмай чебер сяськаосын валес котыр. Шуисько, табере тон, Дюймовочка сямен, ческыт вӧтъёс адӟыса, кӧлалод. Кӧня ке улыса, дорам куное лыктӥз. Лыз вылын тӧдьы сяськаосын валес котырмес адӟыса, шуэ:
— Табере тӥ но, Дюймовок но Дюймовочка сямен,, кӧлалоды ни.

Лия Малых
Туспуктӥз Владимир Беломорских

Удмурт Дунне
By Удмурт Дунне Май 31, 2013 11:10
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<