Писательёс вуозы школаосы

Удмурт Дунне
By Удмурт Дунне Май 31, 2013 12:42

Национальной библиотекаысь шаертодонъя но фин-угор литературая отделын 27-тӥ мае ортчиз «Удмурт шаер» клублэн пумиськонэз.

Со сӥземын вал туала удмурт писательёсъя ӟуч но удмурт кылын поттэм мультимедийной биобиблиографической справочникен тодматсконлы.

Проектлэн авторез — Галина Шантурова. Финляндиысь дышетонъя но культурая министерство юрттэмъя библиотекаын ужасьёслы та справочникез поттыны грант висъяз фин культурая М. Кастрен нимо огазеяськон. Библиотекаын ужасьёс люкаськемъёслы веразы справочник бордын ужамзы сярысь, экран пыр тодматӥзы солэн пуштросэныз, адӟытӥзы гожъясьёслэсь туспуктэмъёссэс.

Издание пыртэмын туала гожъяськисьёс пӧлысь 39 мурт. Писательёсын тодматскон радъямын алфавитъя, нимаз-нимаз люкетъёслы висъяса:
— авторлэн улон-вылонэз но творчествоез — ивортонъёс люкамын газет-журналъёсын потэм материалъёсъя;
— произведениосысь тужгес яркыт люкетъёс;
— потэм произведениосыз, ачиз но творчествоез сярысь гожъямъёсын удмурт но ӟуч кылын библиография — Национальной электронной библиотекае интыям текстъёс ссылкаосын тодмостэмын;
— писательёслэн архивысьтызы туспуктэмъёссы;
— аудиозаписьёс — авторъёс асьсэ сярысь мадё, кылбуръёссэс, призведениосысьтызы люкетъёссэ лыдӟо.

Дискъёсты дунтэмен вӧлмытыны чакламын удмурт кылэз дышетӥсь школаосы, библиотекаосы, издание пырем авторъёслы. Нош вань мылкыд карисьёс справочникен тодматскыны быгатозы Интернет пыр, Национальной библиотекалэн сайтаз пырыса.

Выль амалэн лэсьтэм ужез люкаськемъёс ваньмыз ик ӟечен веразы. Нылпиос писательёсты адӟыны, кылыны, соослэн ужъёсынызы тодматскыны быгатозы, туала амалъёсты уже кутыса.

Арлыдо писательёсын артэ справочнике пыртэмын егитъёсызгес но гожъясьёс, кудъёсызлэн нимъёссы, оло, тросэзлы тодмо ӧвӧл на. Но кызьы валэктӥзы проект бордын ужасьёс, авторъёсты бырйыкузы, лыдэ басьтӥзы, кыӵе материалъёс уг тырмо библиотекалэн фондъёсаз. Та пумысен мылкыдъёссэс вераллям студентъёс но. Озьы ке но сборнике пырымтэослэн юанъёссы кылдыны быгатозы, пе. Сыӵе юанъёс пумиськонын но вал ни.

Лия Малых

Удмурт Дунне
By Удмурт Дунне Май 31, 2013 12:42
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<