Нош шунды ӝужа но ӝужа

Удмурт Дунне
By Удмурт Дунне 10 мая, 2013 18:43
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Нош шунды ӝужа но ӝужа

Г. Анисимов

Г. Анисимов

Ёмка Гирго агай (Григорий Семёнович Анисимов) вордӥськемын но будэмын Кияса ёросысь Выль Тӥгырмен гуртын. Ож кутскон аре ик сое тылӝуэ ыстӥзы. Соку ик со ньыль гожтэт келяса вуттӥз.
(Скобкаосы валантэм кылъёс кылемын.)

Шундыпуксён пала мынӥсько
«Гожтэт гожъясько 1940 (…). Анисимов Григорий Семёнович. (…) мон шундыпуксён пала мынӥсько. Али гожтэтэз гожъясько Казань карын. (…) станциын ми потӥмы Можга каре. 27 толшоре милемыз Можга карын дӥсязы. Отын ми 4 нунал улӥмы. Милемлы винтовка но дӥськут сётӥзы. Сётӥзы 1 шинель, 1 фуфайка, 3 дэрем, 2 шаровар, 2 шуныт дэрем. Мынӥськомы Вужгуртысь Кузьмаен но асьме Насьтялэн картэныз — Иванэн. Да, дядяй, таяз войнае мынӥськомы, лэся. Ваньдылы салам верасько. Тон Катя, Байбатров Олексанэз документ басьтыны кос, мынам дышетскеме понна со трудодень пусъёз. Озьыен веранэ быриз. Ваньдылы салам верасько. Матысь дыръёсы номыр уг гожъя ни али…»

Инмарлэн кужымез бадӟым, дыр
«Гожтэт гожтӥсько 1940 аре 4 тулыспалэ. Дядяй, нэнэй но Катя, мынонме мон мынӥсько али. Та гожтэтэз гожтӥсько Ленинград карын. Татын 2 сутка сылӥськом ини но ум тодӥське татчы-а дугдомы яке эшо мыномы на. Татын туннэ мунчо пыриськомы али. Да, дядяй, тон ветлэмед, пиёсыдлы но ветлыны кулэ луоз. Катя, нэнэй но дядяй, туж эн бӧрдэ. Инмарлэн кужымез бадӟым, дыр, али ветло но, оло, берто али. Оло, (…) тӥ уйдэс но уд изиське, дыр. Малпаса туж эн кайгыре, мон одӥг но уг кайгыриськы. Мон гинэ татын ӧвӧл, ми туж трос татын. Каритон агай но кошкиз, дыр, ини. Али адрес тодмо ӧвӧл на. Гожъясько вагонын. Дядяй, Олексанлы тон 10 манет уксё сёт. Эшо верало, Катя, тон Олексанэз кос мынам дышетскемелы документ мед куроз Мушегысь но солы трудодень пусъёзы. Ну пока веранэ быриз, туж салам верасько ваньдылы. Али Кузьмаен но Иванэн огазьын одӥг вагонын мынӥськом. Озьыен веранэ быриз, туж салам верасько, но тыныд Катя нимысьтыз салам верасько. Гожтӥз Анисимов Григорий Семёнович.»

Льӧмпу садэз мерттэ вал
«Гожтэт гожтӥсько 1940 арын 11 тулыспалэ. Катя, мон табере интыям вуи ини. Туж салам верасько. Дядяй, нэнэй но Катя, берпум гожтэтме басьтоды, дыр, мон туннэ мынӥсько. Ми Финнляндиын ини, жугиськон ми дорозь 200 метр гинэ. Пу корам кадь ик, дыбыр шуыса улэ. Да, Катя, табере мон тынэсьтыд люкиськи, лэся. Туж салам верасько, эшо салам верасько Тонялы но агай-вынъёсылы, но весьвань калыклы салам верасько. Нэнэй, дядяй марлы монэ вордӥды? Монэ вордытозь льӧмпу садэз мерттэ вал. Тулыс вуысал но югыт сяськаоссэ тӥ учкысалды, нош табере монэ уд адӟе ни ведь. Кызьы аслэсьтыд пельдэ уд адӟиськы, озьы ик монэ но уд ни адӟы ни. Туж эн кайгыре али, шудэ ке вань яке улэп кылё али. Милемыз одӥг но ӧз ни дышетэ, соку ик фронтэ пырто ини. Кыӵе но раньӟыса ум улӥське. Землянкаын улӥськомы, туж кезьыт нокытчы но пырыны уг луы, тазьы раньӟыса ветлытозь Инмар эзельзэ мед сётоз ини шуисько. Сюдонзэ туж умой сюдо но котькуд нунал ӵукна чарка вина сёто. Кузьмаен но Иванэн огазьын улӥськом али. Азьланяз мар луоз уг тодӥськы. Адресмес ум тодӥське, тодмо ӧвӧл али кыӵе луоз. Уд тоды, дыр, туннэ татын, ӵуказе мукет азьын.»

Туж жаль кылиськод
«Вот Катя, тон туж эн бӧрды. Мон одӥг но уг бӧрдӥськы. Огпол (…) Туж жаль кылиськод ини. Ну ӟеч лу (…) кышно Екатерина Фёдоровна но атай Семён Дементьевич но (…) Гожтӥз Анисимов Григорий.»

Шунды ӝужа но ӝужа йыр вадьсамы. Григорий Семёновичлэн но сюлэмыз кыӵе кыстӥськиз вордӥськем палъёсаз, яратоно муртъёсыз вӧзы. Ленинград улосын бырем мукет солдатъёсын артэ шедьтӥз аслыз кӧлон инты. Бадӟым тау шуэм потэ солы асьмелэн югыт но шулдыр улонмы понна.

Николай Анисимов
Кияса ёросысь Выль Тӥгырмен гурт

Удмурт Дунне
By Удмурт Дунне 10 мая, 2013 18:43
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<