Наука куремъя нянь будэтон

Удмурт Дунне
By Удмурт Дунне Май 6, 2013 12:42

Наука куремъя нянь будэтон

А. Любимов

А. Любимов

Ижысь гурт удысъя академилы — 70 ар

Туэ сӥзьыл Ижысь гурт удысъя кун академилы 70 ар тырме. Со Россиын устоосыз вузъёс пӧлы пыре. Ректор Александр Любимов ортчем сюрессылы вакчияк йылпумъянъёс лэсьтэ.

— Александр Иванович, кызьы но ку кылдӥз гурт удысъя институт?

— Вордӥськонэз туж тунсыко, шуыны луоз. Юн секыт война вакытэ, 1943-тӥ арын, Москваын ӧсъёссэ усьтӥз вал вордонъя зоотехнической институт. 1954-тӥ арын та вузэз выжтӥзы Удмуртие. Со луиз Ижысь гурт удысъя институт. Москваысь лыктӥзы тодосчиос, студентъёс, вагонъёсын вайизы оборудование. Нырысетӥез ректор вал Б. Меньшов.

Александр Любимов вордскемын Кизнер ёросысь Анык гуртын. Дышетскиз Ижысь гурт удысъя институтын, зооинженер луиз. Валтӥсь зоотехник луыса ужаз Гурт удысъя министерствоын. Отысь институтэ ужаны ӧтизы. 1980-тӥ-1988-тӥ аръёсы вал ассистент, валтӥсь дышетӥсь, доцент, факультетлэн деканэз. 1988-тӥ арын дышетон ужъя проректоре юнматӥзы, нош 2002-тӥ арын ректор луиз.

Огдыре ужаса кандидат уж гожтӥз. Али со гурт удыс наукаосъя доктор но профессор, куинетӥ созывзэ Кун Кенешлэн депутатэз.

Александр Любимовлы сётэмын Удмурт Республикалэн Кун премиез, Россиысь Гурт удысъя но Дышетонъя но наукая министерствоослэн Данъян грамотаоссы но «Россиысь вылӥ дышетонысь дано ужась» ним, Россиысь но Удмуртиысь гурт удысысь дано ужась луэ.

Нырысь-валысь институт дасяз зоотехникъёсты но агрономъёсты гинэ. Собере усьтӥськиз механизацияя факультет. Азьло но, али но ми азьын одӥг бадӟым ужпум сылэ — гурт удыслы ӟеч специалистъёс дасяно. Шаерамы таӵе вуз одӥг гинэ. Али академия агрономической но зоотехнической факультетъёсы дышетскисьёсты кутонъя Россиын 2-тӥ инты басьтэ, азьпалан мынэ Москваысь Тимирязев нимо аграрной университет гинэ. Табере академиын дышетске 10 сюрс пала студент, со пӧлысь 4 сюрсэз — нуназе ёзын. Вуз кылдэмез дырысен 50 сюрслэсь уно специалистъёс дасяз ни. Данакез соос гурт удысын тыршо. Удмуртиысь гурт удыс, соослэн лулысь-сюлмысь ужаменызы, Россиысь вань улосъёс пӧлын азьпал радын ветлэ. Академия данъяське выпускникъёсыныз. Тросэз соос быгатыса но валаса кивалто гурт хозяйствоосын. Басьтом Вавож ёросысь Мичурин нимо эштосэз. Валентин Калинин 43 ар кивалтӥз эштосэн. Институтэз йылпумъямъёс пӧлын вань Удмуртиысь Кун Кенешлэн депутатъёсыз но Правительстволэз ёзчиосыӟ А. Соловьёв, А. Коробейников, В. Невоструев, А. Стрелков, Р. Касимов, С. Фефилов, ёрос йыръёс но трос мукетъёсыз.

— Академилэн али кыӵе кужымез, инъетэз?

— 1994-тӥ арын институт луиз академия. Статус воштӥськемен, коллектив азе уката бадӟымесь куронъёс пуксизы. Ми котькыӵе ужпумъёсты — пичизэ но, бадӟымзэ но — ӟеч быдэсъяны тыршиськом. Соин ик дышетон программаосты улонэ пыӵатонъя Ижысь академия Россиысь гурт удысъя вузъёс пӧлын валтӥсь инты возе. Озьы ик шуыны луоз дышетонэ выль амалъёсты но технологиосты кутонъя.

Материальной базамы юнма, со тупа туннэ куронъёслы, ӟеч специалистъёс дасяны но научной ужъёс нуыны. Академиысь кивалтӥсьёс котьку бадӟым саклык висъязы иворъёс сётон амалъёсты выльдонлы. Али студентъёслы дышетскыны но дышетӥсьёслы ужаны 20 компьютер класс кылдытэмын. Ваньмыз соос Интернетэн герӟаськемын. Дышетонын паськыт кутӥське мультимедийной оборудование но компьютерен тест сётон. Данаказ факультетъёсын дышетон мынэ нимаз программаосъя. Со кулэ луоз выпускникъёслэн вуоно ужазы.

Академия узыр визьмо дышетӥсьёсын. 360 мурт пӧлысь 47-ез наукаосъя докторъёс но профессоръёс луо, нош 270-эз — наукаосъя кандидатъёс но доцентъёс.

Наукаен герӟаськем ужасьёсты дасянын нимысьтыз инты басьтэ аспирантура. Али 163 аспирант научной уж нуэ. Академиын туннэ диссертациосты утёнъя 4 кенеш ужа. Аспирантъёс но дышетӥсьёс арлы быдэ 40 диссертация утё.

— Александр Иванович, коллективды азьын кыӵе тужгес бадӟымесь ужпумъёс сыло?

— Академия, веранэз ӧвӧл, валтӥсь инты басьтэ элькунамы АПК-ез азинтонын. Академиын арлы быдэ тодон-валанзэс будэто 2 сюрслэсь уно нянь будэтӥсьёс но пудо утисьёс. Тодосчиослэн научной ужъёссы гурт удысэ пыӵало, хозяйствоосты ӝутыны но ваньбур поттонэз будэтыны юртто. Со дыре ик шыръясько электрокужым, эстӥськон но воштос ёзъёс.

Удмуртиысь гурт удысын нырысетӥ интые потэ ужазинлыкез ӝутон. Сое кулэ каре ВТО-е пыреммы но. Шаерамы котькуд гектарысь шорлыдын 20 центнер ю тысь кутсано, ваньзэ — 1 миллион тонна. Со быдэстымон. Мукетыз ужпум — пудо выжыез умоятон. Таиз но ужмы урод уг мыны. Соин ик Удмуртия сиён-юонтэк ноку уз кыльы.

Геннадий Романов

Удмурт Дунне
By Удмурт Дунне Май 6, 2013 12:42
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<