Мукет дуннеын ваньмыз шудоесь

Удмурт Дунне
By Удмурт Дунне 17 мая, 2013 13:54
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Мукет дуннеын ваньмыз шудоесь

Яблоклэн арез...

Яблоклэн арез…

Эгра палъёсын куке но артэ интыяськемын вал Кизядзи, Деревозь, Кураш гуртъёс. Нырысетӥяз ӟучъёс улӥзы, кыкетӥяз — удмуртъёс, кунетӥез суро-пожо вал. Та гуртъёсысь ог куамын пиосмурт кунмес утьыны кошкиз, ӝыныез ож бусые кылиз.

Прокашев
Прокашев Олексан кыдёке лобась самолётлэн штурманэз вал. Мадьылӥз, кызьы ожмаськонлэн тужгес ӟырдыт вакытаз Берлин вылэ бомбаос куязы.

— Ну кышказы ке кышказы ни немецъёс! Соос Москваез котыртӥзы но вормон сярысь зулё, нош ми столицазэс бомбить кариськом. Со понна мыным орден сётӥзы, — школаямы мадьылӥз Олексан дядяй.

Меӵак верано ке, сое школае ӵем ӧз ӧтьылэ, трос медальёсын но куинь орденэн пусъемын ке но. Кышкаллязы, малы ке шуоно Прокашев «калык тушмонэн» ялэмын вал. Сибирь палъёсын вить ар нюлэс кораз.

— Ма понна? Сюрес дуртӥ кызьпуос мерттыны косылӥзы. Мон шуи: коросъёслы, пӧй, писпуос тырмыт ӧвӧл шат? КГБ кырмиз. Кышноме колхозысь уллязы. Со Лоза станцие дас иськеме палэнэ ужаны ветлӥз. Бакчамес но таланы медо вал, гуртоослэн куремзыя жалязы. Трос чидано луиськиз Сибирьын со проклят Сталинэн сэрен, — мадьылӥз ожысь ветеран.

Адӟиськыны вуылэм эшъёсыз верамъя, Сашка туж кышкасьтэм вал, пе, солэн зэмлыкез политруклы ӧз яралля. Герой ним сётон сярысь документъёсты штабе ӧвӧл келям. Тӥни озьы, элькунамы СССР-ысь Герой ним ичигес луиз.

Пал суй
Загребин со, Василий, ожысь одӥг китэк бертэмез бере Пал суй луиз. Деревозь гуртын сое семьяез чидатэк витиз. Бен, зол бӧрдӥзы кышноез, ӵыжы-выжыосыз сӧсырмемысьтыз. Кӧняез быризы, тау Инмарлы, улэп кылиз, пе, буйгатылӥзы асьсэды.

— Улыны-ужаны выльысь дышетски, — мадьылоз вал Пал суй. — Кык киын тӥр кутӥсько кадь, но кытын огез ки? Зар бӧрдылӥ. Кышноме но ӟыгыртӥсько кадь кык киын… Э, улонысь шат кошконо… Сыӵе малпанъёс но вал, — сюлэм висёнъёссэ вералляз со.

Кужмо кариськиз деревозь пиосмурт. Трос кунъёсты мозмытэм ожгарчи адӟиз, кыӵе умой уло Польшаысь, Германиысь крестьянъёс. Коркаоссы шыкыс кадь ӝикытэсь, чебересь. «Мон но юрт ӝуто», — буйгатылӥз ассэ.

Тӧл шудӥз буш пиджак саесэныз. Одӥг киын ужаз Загребин. Бугро ӵупиз, выжъёс лэсьтӥз. Ачиз ик пузэ пилиз, гур но пуктӥз. Гуртэ шуныт но чебер корка пуксиз. Пал суйлы памятник пуктоно вылэм.

Обухов
Обуховез, Ваня дядяез, Кураш гуртын улӥсьёс чидатэк витё. Гурысь перепечез кадь. Со — почтальон. Котькуд корка доры дугдылӥз: «Тпру, Маша!» Небыт турынэн тырмытэм кошовкаысьтыз потыса, ӟезьыос доры «тук-тук!» дыртылӥз.

— Шумпот, Селивёрстовна, Москваысь гожтэт! — али ке но пель сьӧрам кылӥське Ваня дядяйлэн ӟазыресгес куараез.
Тамак кыскеменыз, дыр, зол кызылӥз. Огез пыдыз ӧй вал бере, туккетэм каремъя сое пумитаны потылӥзы.

Ваня дядяй пыдзэ ыштӥз Украина палан. Война сярысь туж шер тодаз вайылӥз. Соин школаямы ӧз ӧтьылэ. Бӧрдыны но кутскылӥз.

— Айда, Ваня, киное, клубын война сярысь кино возьматозы, — ӧте вал мемее.
— Уг дак уг, сюлэм висьыны кутске, — шуылӥз.
— Куке ветлоно вылэм Краина пала. Эше ӧте, со огаз шайвылэ пыдме ватэм. Интызэ но, пе, тодӥсько, кык топольёс дорын гуэз. — Вормон Нуналэ пичияк курытсэ верьямез бере сюлэмзэ усьтылӥз Нюра кышноезлы.

Нюралэн куинь пиналъёсыз вал ни, Ваня дядяен огазеяськыкузы. Эшшо одӥг нылзы вордскиз на, ӵош улыса. Пичи дыръяз со, бубизлэн пу пыд вылаз пуксьыса, ӟечыралляз. Пичи нылок пу пыдэз сутыны но малпа вал, вылез, пе, будоз.

Ваня дядяйлэн сӧсыр пыдыз ӵем висьылӥз. Соку Кушья станциысь почтае ветлӥз ни кышноез. Ачиз ик вал кыткылӥз. Кузпалызлы шуылӥз:
— Ваня, пичияк пенсия тыро ук, шутэтскы ни, коньдон тырмоз.
— Уг чидаськы коркан пукыны, сьӧд малпанъёс одолё. Собере, Нюра, калыке потыса, мылкыд ӝутске, сюлэм каньыл луэ, — вазьылӥз со пумитаз.

Обуховъёс скал но мукет пудо возизы. Пал пыдо ке но, Ваня дядяй дотово зол турналляз. Литовкаез усто шериз. Маша коблаез кыткыса, турын возъёсты гуртэ ворттылӥз. «Скаллы толалтэлы дас кык воз кулэ луоз», — шуылӥз со.

Я, Ваня дядяй, ӟеч ул ни мукет дуннеын. Отын ваньмыз шудоесь. Чутыса но уд ветлы ни.

Хлебников
Нимзэ вунэтӥ ни. Ма, Кизядзи гуртын шораз ваньмыз сямен Хлебников шуыса вазиськылӥзы. Со ӝужыт мугоро вал. Туж ужась. Гуртын солэн гинэ улмопу садаз мыжык быдӟалаем горд-горд емышъёс кисьмаллязы. Шырыт сюлэмо Хлебников вань пырисьёсты яблокен куноятылӥз, вузан сямыз ӧй вал.

Школаямы пиосмуртэ Вормон Нунал азьын ӧтьылӥзы. Гордалэс тушсэ мычыса, егит но чебер вуылӥз. Гимнастёркаяз чильк-вальк кисьтаськизы куинь медальёс. Огез — «За отвагу». Сое Хлебниковлы сётӥзы кышкасьтэм луэмез понна.

— «За Родину, за Сталина!» кеськыса, солдатъёсме атакае ӝутӥ. Соку мон немец офицерез, лейтенант вал кадь, пленэ басьтӥ. Со понна ик медален пусйизы, — кышкасьтэм улосчимы озьы мадьылоз вал.

Хлебников школае буш киын ӧз вуылы. Керттэм сеткаяз горд, ӵуж, вож яблокъёс синмез ик мальдытылӥзы. Война сярысь мадемез бере со серекъяса шуылоз вал:

— Ми, пиналъёс, зол ожмаськимы, фашистъёсты пазьгимы. Ма чотын? Кӧтмес ӝукен тырыса но ческыт емышен шумпоттыса, — вералляз. — Кӧт ке тыр — солдат ворме, кӧт ке буш — берлань чигна.

Оглом вераса, оскытылӥз, яблокме сиыса, умойгес дышетскоды, мумы-бубыостэс шумпоттоды.

Малы ми, витетӥ классын дышетскисьёс, Хлебниковлэн садысьтыз бер ӝыт яблокъёссэ ворамы? Йыгаськысалмы ке дораз, ӧй жалясал, куноятысал ук… Шурка эшенымы сэрен.

— Эх тӥ, кышкась кечъёс, пеймыт садэ пырыны кышкаськоды, — узатӥз милемды.

Конечно, ми геройёс! Тросгес улмопуосты тӥямы. Та сярысь мукет нуналэ Хлебников, дорамы пырыса, мемиелы ӝожтӥськиз. Со сямен милемды ческыт яблокъёсыныз куноятэ. Веня выны но мон бӧрдыны ик дасесь. Ыме уг пыро ческыт емышъёс.

— Сие, сие, пиёкъёсы, бадӟымесь но визьмоесь будэ. Туэ яблоклэн арез, дотово удалтӥзы, — куноятэ Хлебников. — Ческыт-а?
— Ческыт, — шуиськом но кужмысь кадь горд яблокъёсты куртчиськом.

Сергей Широбоков
Эгра ёросысь Чутыр черкогурт
Туспуктэмез: udmfoto.ru

Удмурт Дунне
By Удмурт Дунне 17 мая, 2013 13:54