«Милям со асьмелэн…»

Удмурт Дунне
By Удмурт Дунне 17 мая, 2013 09:19

«Милям со асьмелэн…»

Артём Беспалов апаеныз

Артём Беспалов апаеныз

Кияса ёросысь Дубровск гуртысь Лариса Юрьевна но Евгений Семёнович Беспаловъёс 4 ныл вордӥзы. Кык ар талэсь азьло Ижысь нылпи юртысь Артём нимо пиез басьтӥзы на.

Лариса Юрьевна бадӟым семьяен улӥсьёслы пичи дыръяз ик синмаськылӥз. Угось аслаз кык гинэ вал сузэр-апаез. Кияса шор ёзо школаысь 8-тӥ классэз йылпумъяса, Лариса дышетскиз Сарапулын вуриськисе. Училищезэ йылпумъяса, дор палъёсаз ик берытскиз. Отӥяз Дубровск гуртысь яратонзэ пумитаз — Женя Беспаловлы бызиз. Женялэн бадӟымгес ик вал семьяез — куинь сузэръёсыз но ачиз.

Егитъёс палэнэ кошкон сярысь ӧз ик малпалэ, вуж корказы вӧзы выльзэ ӝутӥзы. Лариса ужаны колхоз фермае интыяськиз — скал кыскиз. Нош Евгений лэсьтӥськон удысын тыршиз. Жаляса верано, гуртысьтызы «Колос» колхоз быриз, Лариса табере бускель гуртысь Суворов нимо колхозын кунян сюдэ. Гуртысь нылкышноосты отчы машинаен нулло. Нош Евгений Семёнович лэсьтӥськисьёс вӧзын ик тырше.

Беспалов кузпалъёс бӧрсьысь бӧрсе ньыль ныл вайизы. Юля ужаны Ямалэ ветлэ. Катя 10-тӥ классын дышетске, Оксана 8-тӥын, нош покчиез — Лиза — 4-тӥ классын тодон-валан люка. Ваньзы нылъёс «4»-лы но «5»-лы дышетско. Вӧзазы песянайзы Мария Антоновна улэ. Пиезлы но кенэзлы со нылпиоссэс пыд йылазы ӝутыны юрттэ.

— Сомында нылпи будэтыса но, Лариса туж ӝикыт улэ, — нылкышнолэн чылкытлыкез сярысь верало бускельёсыз. — Кышномуртлэн кыӵеез укно котырысеныз ик адӟиське, шуо. Ларисалэн укно азяз маке мында сяськаосыз будо, тюльёсыз но штораосыз котьку чылк-чылкесь. Солэн выж вылаз лёгиськыны уд дӥсьты, отысь одӥг жагзэ но уд адӟы. Нош ай кыӵе ческыт со семьязэ сюдэ, арнялы быдэ пыжиське. Бакча котырыз но солэн туж ӝикыт. Та Лариса ку меда вань ужзэ лэсьтэ?

— Колхозын ужаса, трос уксё уд потты, — улэм-вылэмзы сярысь маде Лариса Юрьевна. — Нош нылпиосты кызьы ке но сюдоно-дӥсяно, калык радэ поттоно, дышетоно. Со понна гид тыр пудо вордоно луэ ини. Женялы но, аслым но пи кулэ луиз, лэся. Пиос ук юртэз вордӥсь-кутӥсьёс луо, нылъёс быдэ вуозы но бурд улысьтымы лобӟыса кошкозы. Ӵемысь нылъёсмы но, малы милям вынмы ӧвӧл шуыса, юалляськылӥзы. Мон со сярысь кема малпаськи. Одӥг нуналэ кутӥ но, нокинлы вератэк, Ижысь нылпи юртэ шонтӥ. Тачак нылпиос дорам лыктӥзы, ваньзы шорам «мама» шуыса вазисько, «монэ сьӧрад басьты» шуо кадь синъёссы. Тани та кык аресъем Артём но дорам лыктӥз, соку ик бордам бинялскиз. Со мыным жаль потыны кутскиӟ чиед, пичи но востэм.

Кошкыкум бӧрдыса кылиз. Вуонояз лыктыкум, мон солы пӧртэм шудонъёс но ческыт сиён вайи. Отӥяз мыным воспитателез жингыръяны кутскиӟ со, пе, тӥледыз возьма, мӧзме. Нош мынытэк амал ӧвӧл, лушкем сямен кузь сюрес вылэ потӥсько. Озьы ветлэмме кузпалы тодӥз, но пумит кыл ӧз вера, ӧз уродъяськы. Нылпиосты яратӥсько шуыса, Женя тодэ ук. Собере валай: солы но пи кулэ. Ар пала озьы курадӟимы, документъёс туж кема бичано луимы. Огшоры гинэ уг луы вылэм нылпиез басьтыны, оломарзэ но отын кулэ каро. Семьяысь котькуд нылпилэсь юало, кулэ-а соослы мурт пинал. Артёмез дорамы ваеммы бере ини ёросысь калыкез улон-вылонын утёнъя ёзэтын ужасьёс олокӧня пол эскерыны вуылӥзы. Чаклазы, ми сое умой-а, ческыт-а сюдӥськомы, ӟеч-а дӥсяськомы, солы висъям уксёез кулэ интые-а быдтӥськомы, уг-а висьы, ми сое жугыса ум-а возиське шуыса. Ма, али но соос ветло. Вордос пи басьтэмелы тросэз гуртоос но тодмоосы паймизы кадь. Малы, пе, со тӥледлы кулэ на.

Пимы али ке но кышка кадь, ми дорысь сое кытчы ке нуозы шуыса. Изьыны выдӥськом ке, бордам кырмиське, «мама, моя любимая мама» шуыса ик, умме усе. Ӵукна сайка ке, чаляк утчаськыны кутске, мынэсьтым киосме, бамъёсме маялля. Ужаны вазь кошкыкум, копак ыштэ, лэся, бӧрдыса, пе, монэ утча, бакчаетӥ но азбаретӥ бызьылэ. Пичи дырысеныз мунчое но монэн ӵош потэ, олокызьы атаез борды дышетом ини.

Артём сьӧрлось Колошур гуртэ нылпи садэ ветлэ. Нылъёсмы но со гуртысь школаын ик дышетско, соосты автобусэн нуо-ваё, Артёмез но сьӧразы ик келяськомы. Сузэръёсыз сое нылпи садэ нуо, асьсэос ик доре ваё.

— Милям со асьмелэн вынмы кадь ик потэ ни, — вера Беспаловъёслэн бадӟымез Юля нылзы. — Кытӥ-отӥ тышкаськон-визьман дыръёс но луо, но ми солы алама кылъёс вераны ик ум дӥсьтӥське, жаль потэ. Артёмез пичи дыръяз кык семьяе вордыны басьтылӥллям ини. Огаз но удалтымтэ. Со милям син азямы воштӥськиз. Нырысь нуналъёссэ кыӵе ке йӧнтэм кадь вал, кылзӥськисьтэм, табере сямыз зӥбломиз, верам кылэз пеляз поныны тырше. Эшъёсызлэсь мӧзмыса, пукылӥз, собере ми борды дышиз, сьӧрамы гинэ ветлысал на, дыр. Ма, асьмеос но ми сое пумтэм яратӥськом. Соиз но ай паймытэ: Тёмамы каллен-каллен удмурт кылын бӧтьыртыны кутскиз ини, туж мусо кылӥське вераськемез. Удмурт кылбуръёсты но кырӟанъёсты дышетӥськом. Нош кӧня ми сое туспуктылӥм ини. Малпаськом, таӵе мусо нылпизэ вордэм анаез адӟысал ке, сюлэмыз амалтэк тарс! карысал.

Но Артём умой семьяысь вылымтэ, шӧдске, солэн, пе, эшшо кык сузэръёсыз но выныз нылпи юртын будо.

— Куддыръя аслэсьтыд нылдэ-пидэ кызьы будэтыны паймиськод ай, нош татын муртлэсь вордыны, — паймемзэс верало гуртысь нылкышноос. — Со понна бадӟым чидан но яратон кулэ, дыр. Сыӵе сям ваньмызлы уг сётӥськы. Лариса — юн нылкышно, со огзэ но нылпизэ обидьыны уз сёты, ачиз но уз чабкы.

— Артём туж яратэ техникаез, — вера Лариса Юрьевна. — Атаез азбаре потэ ке, со сьӧры кыстӥське ини, тракторист луо шуэ. Ма, котькыӵе ужез адӟыса, будэ инӥ пу но пырта, бакча сиёнъёс вылэ ву но кисьта, выж но миське, котькыӵе уж борды сузэръёсызлы юрттӥськыны басьтӥське. Ваньмыз сямен нылъёсмы туж чебер суредасько, тужгес но тузӥ ужъёсыз пӧрмо Оксаналэн. Солэсь адӟем карыса, Артём но кияз кисточка кутэ ини. Кыштыр гинэ асьсэ понна выро.

Беспаловъёслэн улыно-вылыно коркаязы Артёмлэн нимаз висъетэз вань. Отын телевизор сылэ. Ойдо, пе, яратоно мультфильмъёсме возьмато… Та улонын шудо мед луод, Артём!

Любовь Тихонова

Удмурт Дунне
By Удмурт Дунне 17 мая, 2013 09:19
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<