Мертчанлэсь но ӵужо йырсие

Удмурт Дунне
By Удмурт Дунне Май 31, 2013 13:58
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Мертчанлэсь но ӵужо йырсие

Якшур-Бӧдья ёросысь Сюровай гуртысь Д. Байкузина вордӥськемез дырысен тӧдьы

Якшур-Бӧдья ёросысь Сюровай гуртысь Д. Байкузина вордӥськемез дырысен тӧдьы

Тӧдьы йырсиё адямиослэн табере вань асьсэлэн праздниксы. 2006-тӥ арын дуннеын кылдӥз блондинкаослэн нуналзы. Пӧртэм буёло йыръёс пӧлысь малы одно ик мертчанэз быръемын, вераны шуг, но котькуд ар, 31-тӥ куартолэзе, тӧдьы кысъем адямиос ас праздниксэс пусъё.

Югыт мылкыд

Дуннелэсь бере ӧз кыльы Россия но. Мертчан йыръёс асьсэлы «Бриллиант шпилька» премия но малпазы. Соин пусъё странаысьтымы тужгес визьмо, усто но азьмынӥсь блондинкаосты.

Совето Союз вакытэ странаямы валтӥсь чебераен лыдъяськиз актриса Любовь Орлова. Туала вакытэ йӧно, чебер блондинкаос трос гинэ. Тужгес тодмоосыз: спортсменка Мария Шарапова, политик Валентина Матвиенко, кырӟасьёс Кристина Орбакайте, Валерия, телеведущийёс Ксения Собчак, Лера Кудрявцева но мукетъёс.

Вашкала вакытысен ӵапак тӧдьы йырсиё адямиос шоры калык уката но синмаськыса учкылӥз. Малы? Соос сьӧд, кельыт, пеймыт-суд йырсиё адямиослэсь ӧжытгес вал. Грек мифологиез учконо ке, Афродита, пе, вань инмар кышноос пӧлысь огназ гинэ вылэм блондинка. Грециысь нылкышноос со кадь чебер но югыт бабляё луон понна йырзэс миськылӥллям чырсатэм ишак йӧлын. Удмурт песянайёсмы но йырзэс мисько вал кузятэм вуэн. Алнаш ёросын сое чырс шуо. Творог ву йырсиез, чылкыт, чилясь сяна, кӧня ке югытгес каре. Но мыным потэ, песяйёсмы мертчан кариськон понна озьы ӧз выре, шампунь интые кутылӥзы.

Туннэ тӧдьы кысъем луон понна сыӵе курадӟоно ӧвӧл ни. Туала вакытэ сомында буёлъёс, котькудӥз сьӧд нылаш но ӵуж дыдылы пӧрмыны быгатэ. Удмуртиын но блондинкаос ӧжыт ӧвӧл, тросэз, валамон ини, буяськемын. Шаерысьтымы тужгес тодмоосыз: Удмуртиысь калык артистка Валентина Пудова, республикаысьтымы Правительстволэн Тӧроезлэн воштӥсез Людмила Чунаева, Кун Кенешысь депутатъёс Наталья Сударикова но Елена Чиркова, политология наукаосъя доктор Светлана Смирнова, Удмурт театрысь артисткаос Оксана Гаврилова, Валентина Моисеева но мукетъёс.

Блондинкаосты, чебер, ненег, мальдытӥсь сяна, шузи но шуо, юнме-а тӧдьы йырсиё нылъёс сярысь уно анекдотъёс, серемес учыръёс. Но та веранъёс тросэзлы мертчан йыръёслы уз тупалэ. Тани басьтом одӥгзэ мертчан чебераез — Удмурт кун филармониысь кырӟасез Регина Музияноваез. Та усточиез визьтэм шуыны ымыд уз пыры. Регина школаын «витьёслы» гинэ дышетскемын. Собере Удмуртиысь крезьгуръя училищеез но Санкт-Петербургысь культурая но искусствоосъя университетэз горд дипломъёсын быдтэмын. Р. Музияновалы Питерысь университетысь студентъёсты дышетыны дэмлало вал, но егит артистка вордскем шаераз бертӥз, табере Удмуртиысь учкисьёсты шулдыр но сюлмысь кырӟаменыз шумпоттэ.

Ма со сыӵе, астэ блондикаен шӧдон? Та юанме мон сётӥ шаерысьтымы тодмо но адӟем карымон нылкышноослы: Дышетон удысысь национальной ужпумъёсты эскеронъя институтлэн директорезлы Надежда Ураськиналы но «Удмуртия» ГТРК-ысь дикторлы Татьяна Денисовалы.

— Данъяськыны быгатӥсько, йырсие аслам мертчан, анай-атае сыӵе вордӥллям. Брюнетка луэме потылэ гужем гинэ куэным сэрен — пӧсь шунды шорын кема кылльыны уг быгатӥськы. Тӧдьы муртлэн куэз чаляк ӝуа. Блондинкаос сярысь малпам анекдотъёслы йыры кур уг луы. 31-тӥ куартолэзез уг пусйиськы вал. Но таӵе праздник вань бере, туэ, мертчан йырсиме уката чебер карыса, уже лыкто, — мылкыдзэ усьтэ Татьяна Денисова.

Надежда Ураськина мертчан кариськем 30 аресаз. Малы?
— Мон туж яратӥсько тӧдьы буёлэз. Улонэз но мынам тӧдьыгес адӟеме потэ, дӥськут но таӵе буёлэн бырйисько, йырсиме тӧдьы буясько — пушкы югытгес луэ кадь. Огпол тӧдьы кариськи но, аслым но, семьяелы но кельшиз. Мон шедьтӥ аслэсьтым образме. Чик соглаш ӧвӧл тӧдьы йырсиё адямиослэн йыразы тӧл шула шуэменызы, соосты шузи каременызы. Ваньмыз потэ адями бордысь.

Шузи, визьмо, ӟырдыт

Психологъёс но тодосчиос огымысь кадь шуо, йырсилэн тусыз но адямилэн сямыз зол герӟаськемын.

Йырсилэн буёлэз кылдэ гормонъёс бордысь. Эстроген — нылкышно гормон, со кузёяське блондинкаос пушкын. Нош тӥляд йырсиды сьӧд ке, озьыен, вирады кузёяське пиосмурт гормон — тестостерон. Со бордысь ик потэ сям но. Соин ик сьӧд кысъем нылкышноос дӥсьтӥсесь, юн сямоесь, эрикез яратӥсесь, кужмоесь. Нош мертчан йыръёс — небытэсь, лякытэсь, керетон, азьлане валтон сямзы уггес шӧдӥськы. Блондинкаос, пиосмуртъёсын кивалтэм интые, эсьма кужмо воргоронъёслэсь кылзӥськозы. Европаысь тодосчиос, 10 сюрс адямилэсь юалляськыса, таӵе йылпумъянъёс лэсьтӥллям: ӟечгес ужало но бадӟымгес уждун, пе, басьто пеймыт йырсиен адямиос.

Но тӧдьыос но сьӧдъёс вискын вань на тыл кадь горд, кельыт йырсиё нылкышноос. Таосыз пиосмуртъёсты огкадь кышкато но гочато. Горд йырсиен адямиос сярысь психологъёс шуо: ӟечесь, капчи мылкыдоесь, пуштӥсь, керетӥсь но вог сямоесь. Дуннеысь 45 процентэз воргоронъёс синмасько, пе, кельыт нылкышноослы. Пиосмуртъёслэн малпамзыя, таӵе йырсиё нылъёс валесын, пе, ӟырдыт луо.

Тӧдьыос — шузиесь, гордъёс — ӟырдытэсь, сьӧдъёс — визьмоесь. Та веранэн соглаш луо Америкаын улӥсьёс.

Кинлы кыӵе адями кельше, вылды. Кин ке тӧдьы йырсиё нылэз кышно басьтэ, мукетыз чиль-сьӧдзэ туган кутэ, куинетӥез шунды кадь пиштӥсьсэ быръе. Кызьы кырӟа Удмуртиысь калык артист Евгений Серебренников: мынам туган сӥтьпужыё, нош мыным со туж мусо.

Галина Семёнова

Удмурт Дунне
By Удмурт Дунне Май 31, 2013 13:58
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<