Лыдпус сьӧрын — пинал

Удмурт Дунне
By Удмурт Дунне Май 31, 2013 09:36

Лыдпус сьӧрын — пинал

Шаерамы та вакытлы 6 сюрс 300 пинал будэ нылпи юртын

Шаерамы та вакытлы 6 сюрс 300 пинал будэ нылпи юртын

Туэ 4 толэзь ӵоже шаерамы улӥсьёслэн лыдзы ог 440-лы тросгес луиз ни. Та сярысь журналистъёслы ивортӥз Семья ужпумъёсъя но демографиын политикая комитетлэн кивалтӥсез Ольга Лубнина.

Семьяез дунъян

Берло аръёсы шаерамы нылпиос шӧдскымон тросгес вордскыны кутскизы, пӧртэм ӧвӧл туэ но: ар кутскем дырысен 7 сюрс 218 нуны нырысетӥ куаразэ сётӥз ни. Кулэмъёс 6 сюрс 751 пусъемын.

Ольга Лубнина верамъя, выль семьяос но туэ, кылем арын та вакытэн ӵошатыса, тросгес кылдэмын — 2 сюрс 881 куз. Бен, таин ӵош йылэ люкиськисьёслэн но лыдзы — 1 сюрс 985 семья ньыль толэзь куспын куашкамын.

Кыӵе арлыдъемъёс ӵемгес акыльто, семьяен улыса? Ма муген соос люкисько? Та юанъёслы тыро-пыдо валэктонъёс шедьтон понна республикаямы матысь дыре нимысьтыз эскеронъёс-юалляськонъёс ортчытыны чакламын. Марысь-мар ке, куд-ог семьяосты, оло, утьыны но луоз на, специалистъёс та бордын ужазы ке. Нош школаосын, оло, нимысьтыз факультативъёс, урокъёс кылдозы семьяез, кусыпъёсты дунъяны дышетон понна.

— Жаляса верано, тросэз егитъёс туннэ гражданской шуиськись кусыпъёс кылдыто, — ватсаз Ольга Владимировна. — Озьы соос нырысь ик асьсэ сярысь гинэ малпасько. Но ӵемысь луэ: та паръёслэн нунызы вордске, семья куашка, егит анай кияз вож нуныен огназ кыле. Соин ик пинал вордскемлэсь азьло сюан мед жингыртоз вылэм.

Трос пинал — шумпотонлы

57 процентаз семьяосын туэ кыкетӥ-куинетӥ нуныос вордско. Валамон, со герӟаськемын анай капитал тыронэн.

— Трос нылпиё семьяослы юрттэт сётон пумысен пӧртэм документъёс юнматӥсько, — шуиз Семья ужпумъёсъя но демографиын политикая комитетлэн кивалтӥсез. — Кылсярысь, май толэзе гинэ Президент А. Волков указ поттӥз: трос нылпиё семьяысь адямилы быдэ 6 сотка музъем дунтэк висъяськыны кулэ. Татчыозь музъем нырысь ик арендае сётӥське вал, табере адями отын кузё луоз. Иське, со ачиз чакланы быгатоз: пуктӥськоз-а со отчы яке вузаса коньдон поттоз-а. Но оскисько, тросэз малпаськозы юрт ӝутон сярысь ик.

Нялтас вераса, музъем басьтыны правозэс трос нылпиё семьяос воштыны быгатозы мукет программаен. Лэсьтӥськонъя, архитектурая но улон инты политикая министерствоысь специалистъёс али сое дасян бордын ужало. Улонэ пыӵаз ке, трос пинал будэтӥсьёс но, егит семьяос сямен ик, 5 процентъем кредитэн квартира басьтыны быгатозы. Нош та программае пыриськем семьяын куинетӥ, ньылетӥ но витетӥ пинал понна республикамы ватсаса 300 сюрс манет сётыны дась луэ на. Озьы семья оглом 900 сюрс манет басьтыны быгатоз но кредитсэ пытсан калэ вуоз. Программа дась луыны кулэ сӥзьылозь.

— Нош семьяын куинетӥ но солэсь тросгес нуны туэ 1-тӥ январь бере вордскиз ке, анайёс, пиналэз нылпи садэ интыятозь (3 аресозь), толэзьлы быдэ 5 сюрс манет басьтозы, — ватсаз О. Лубнина. — Коньдон висъяськоз республикамылэн кисыысьтыз. Таӵе решение кутӥз А. Волков. Угось Россия 5 сюрс манетъем пособие висъя ӧжыт пинал вордскись улосъёслы гинэ. Удмуртия таос пӧлы ӧз шедьы.

Приволжск федерал округын трос пинал вордске на Башкириын но Татарстанын. Нырысетӥяз анайёслы 3 сюрс манетэн тыроно кариськизы, кыкетӥяз таӵе пособие ӧз чаклалэ, сотэк но мукет программаоссы вань шуыса.

Кытын доред, экее?

Шаерамы та вакытлы 6 сюрс 300 пала пинал анай-атайтэк будэ. Но со пӧлысь ог 75 процентэз мурт семьяез аслаз кадь кариз ни.
Нылпи юртъёсын, интернатъёсын быдэ вуись пиналъёсты семьяосы интыянлы берло дыре уката бадӟым саклык висъяське — таӵе курон пуктэмын быдэс Россиын. Та понна пӧртэм амалъёс вань: одӥгъёсыз опекун карисько, мукетъёсыз патронат семья кылдыто, куинетӥосыз вордос басьто.

— Кылем арын шаерысьтымы 78 пинал вордосэ басьтэмын, — шуиз Семья ужпумъёсъя но демографиын политикая комитетлэн кивалтӥсез. — Со пӧлысь 27-ез улыны кошкиз кунгож сьӧры. Туэ 21 пинал пӧлысь 4-ез Россилэн палэназ потӥз ни.

Кунгож сьӧры кошкем нылпиослэсь улэм-вылэмзэс Россия ялан чакласа возе — асьме пиналъёсын кышкыт учыръёс шараямын ӧвӧл. Туэысен тэшкылиосты уг потто ни США-е. Вань соосты Францие, Италие курисьёс.

— Мурт пиналэз басьтыны дасяськись асьме анай-атайёс сямен ик, кунгож сьӧрысь семьяос но нимысьтыз курсъёс пыр ортчоно луо, — ватсаз О. Лубнина. — Ас доразы ке уг, асьме дорын. Но тэшкылиез кунгож сьӧры поттыны капчи ик ӧвӧл, документъёс бичаса, куддыр ар но, кык но ортче, ваньмыз лэсьтӥське суд пыр.

Жаляса верано, нылпиез семьяысь берен берыктонъёс но луо. Берло аръёсы 146 пиналлэсь куштӥськемын. Россиен ӵошатоно ке, со трос ӧвӧл кадь, но шумпотыны номырлы. Угось котькуд лыдпус сьӧрын — пинал.

Нялтас вераса, нунызэс нылпи ваён юртэ кельтӥсьёс ӧжытгес луэмын. Ог 3 ар талэсь азьло сыӵеос 180 пала ке вал, кылем арын 72 нылкышно нунызэ будэтыны пумит кариськиз.

Элина Кумачёва
Туспуктэмез: udmfoto.ru

Удмурт Дунне
By Удмурт Дунне Май 31, 2013 09:36
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<