Ляб лулъёс яке четлыке шедемъёс?

Удмурт Дунне
By Удмурт Дунне Май 31, 2013 12:32

Ляб лулъёс яке четлыке шедемъёс?

14

Уно коньдон но дыр кошке пурккетонлэсь мозмытскон амалъёс утчанлы. Со дыре ик вуз поттӥсьёс миллионъёссэс кисьто, адямиос тросгес но дуногес тамак мед басьтозы шуыса. Шат луэ та урод сямлэсь мозмытскыны, огласянь солэсь ало, нош мукет ласянь гочато ке? Та сярысь кенешиськом республикаысьтымы наркологияя центрысь эмъясен Рамиля Фызлыеваен.

— Рамиля Тимерзяновна, вань, дыр, кыӵе ке лыдпусъёс, кудъёсыз возьмато: трос-а асьмелэн кыскисьёс, кинъёс пӧлын соос уногес?

— Кыскисьёсты оген-кыкен лыдъяса, нокин уг пукы, соин ик тыро-пыдо лыдпусъёс вераны шуг. Но кӧня ке арлы одӥг пол калык пӧлын юалляськонъёс ортчытӥськом. Республикаямы соос берлозэ радъямын вал 2007-тӥ но 2011-тӥ аръёсы. Озьы тодмо луиз: куинь-ньыль ар куспын пурккетӥсьёс ог 14 процентлы тросгес луизы. Ужась калык пӧлысь ог 40 процентэз кыске. Воргоронъёс пӧлын — ог 51 процентэз, нылкышноос пӧлын — ог 31 процентэз.

Россиын лыдпусъёс трослы пӧртэмесь ӧвӧл. Жаляса верано, бадӟым классъёсын дышетскисьёс пӧлын ик трос ни тамак кыскисьёс. Паймоно кадь, но пиосын ӵошатыса, нылъёс уногес но ай.

Вань таӵе лыдпусъёс: тамак кысконэн йырин кылдӥсь висёнъёслэсь Россиын арлы быдэ 350 сюрс адями кулэ. Сюлэм но сэр черъёсын сэрен тросэзлэн улонзы куспетӥ луэ. Таос пӧлысь уноез — тамак кыскисьёс. Пурккетӥсь муртлэн сэръёсыз сюбегало, иське, ёзвиосы кислород уг вуы ни.
Шуом, адямилэн пушказ ватӥськемын кыӵе ке сэр висён. Со ассэ, оло, ӧй возьматысал, адями кема аръёс ӵоже улысал. Но со кыске, таин сэрен пушказ шымырскем висён но пиньёссэ шерыны кутске.

Нылъёс будо 18 аресозь, пиос 21 аресозь нуйтӥсько на. Кыскыны кутско ке, мугорзы кыданы уг вормы ни, будон понна кыл кутӥсь гормонъёс тырмемысь дугдо. Кышкытгес маке вань на меда, нуны вайыны дасяськись нылкышно киысьтыз тамаксэ уг куя ке? Мискинь нуны куаретыны-пумитъяськыны но уг быгаты. Тамакын 3 сюрслэсь ятыр пӧртэм суретъёс. Ваньмыз соос вуо нунылы но.

Жаляса верано, кысконлэн кышкытлыкез сярысь веранъёс гинэ адямиосты уг дугдыто тамак басьтонлэсь. Та бордын ваньмылы одӥг кыткетын ужано.

— Иське, тамак кысконлы пумит закон туж кулэ ни вал?

— Со тыро-пыдо мед быдэсъяськоз на вал. Малпасько, лэзьымтэ интыосын кыскем понна одно тупатоно тыриськонъёс.

Одӥг ласянь, тамак кыскисьёсын нокин уг нюръяськы ук. Закон нырысь ик малпамын кыскисьтэм муртъёсты тамак ӵынлэсь утён понна.
Вань сыӵеос, кудъёсыз кыскон борды сокем бурмемын ӧвӧл на. Соос ӵемысь быръён азьын сыло: басьтоно-а тамак яке ӧвӧл-а. Закон пыӵаз ке, быръёзы, дыр, кыкетӥ сюресэз. Угось лавкаосын адӟиськон интыосы чебер пачкаосын тамак тыремын уз луы — гочан быроз. Сигарет кисыын луиз ке но, кыскыны лэзем интыез утчано на ай…

Пичиен-пичиен ке но дышом, оло, таза улонэн эшъяськыны. Европаысь тросаз кунъёсын югдур куке-соку пӧртэм ӧй вал. Но соос тупатскыны быгатӥзы ук!

— Рамиля Тимерзяновна, кызьы меда тамак кыскись мурт шоры учконо: со ляб лул яке, зэмзэ но, кышкыт четлыке сюрем мурт?

— Юалляськонъёс возьмато: тамак кыскисьёс пӧлысь ог 80 процентэзлэн та сямзылэсь куштӥськемзы потэ. Пӧлысьтызы котькудӥз улытозяз 6-9 пол ке но эскере солэсь мозмытскыны. Но пӧрмытэ ог 10 процентэз гинэ. Ӧжыт-а учыръёс: адямилы соку гинэ сюлэмаз операция лэсьто, нош со койкаысь потыса уг вутты на, лушкем пурккетэ ни…

Тамак кысконлэсь куштӥськон амалъёс тачак, но одӥгезлы со тупа ке, мукетызлы — уг. Соин ик каньылгес луоз йӧнатӥськыны специалист дӥньын. Милям диспансерамы таӵеос вазиськыло, 18 аресозь егитъёслы юрттӥськомы дунтэк.

Тамак — сыӵе ик наркотик шуыса веран юнме кылдэмын ӧвӧл. Шузимытӥсь суретъёслы сямен ик, мугор, лулсэръёс дышо никотинлы. Егитъёслы куддыр тырме, 5-6 тамак кыскыса но. Нырысь адями ӵемгес эшъёсыныз ӵош пурккетыны кутске ке, собере огназ но кенжытэ ни. Оло, паймымонгес кылӥськоз, но тамак кысконэз яратонэн ӵошатыны луоз. Адями синмаськемын ке, мар каре? Гажанэз йырысьтыз уг пота. Тамак кыскись муртлэн но со выллемгес.

Тросэз анай-атайёс юало: кызьы валано, пиналзы кыске-а, уг-а? Куке нылпи саклыксэ ыштэ, урокъёссэ азьло капчиен лэсьтэ ке вал, табере шугъяське, дыгоме ке, соку ик сак кариськоно. Туала вакытэ пӧртэм тестъёс вань ни: соос наркотикъёсын кушласькемез, тамак кыскемез но трос мукет висёнъёсты шараяны юртто. Вузасько аптекаосын.

Пиналдылэсь тамак кыскемзэ шӧдӥды ке, сое тышкаса, шораз кесяськыса гинэ, уд дышетэ. Нырысь ик валаны тыршоно: ма муген со ӵындэ. Юалляськонъёс возьмато: быдэ вуымтэос пӧлысь тросэз пурккетыны ӧдъяло, эшъёссылэсь пӧртэм медаз адӟиське шуыса. Соин ик анай-атайёслы умой тодоно: кытын пиналзы ветлэ, кинэн калтыртэ. Жаляса верано, нылпимы школае ветлыны кутске ке, сое ас эрказ лэзьыны луэ ни кожаськом. Соосты уката чакланы кулэ! Быдэ вуымтэос тамак кыскыны озьы ик кутско, ваньмон дырзы укыр трос луэмысь, мар карыны паймемысь. Тросэзлы тунсыко потэ: мар меда луоз, одӥг-кык пол тамакез шӧмтӥ ке?

Пиналэз визьманлэсь азьло анай-атай ассэ но малпаны кулэ. Ӧжыт-а урамысь адӟоз, кызьы вож пиналэн коляскаен анайёс ӵындо, эшшо киязы сур куто на… Таӵе семьяосын кыӵе пинал будыны кулэ? Ваньмыз потэ анай-атайёс бордысь. Нырысь ик соосты таза улонэн эшъяськытоно, пиналъёссы бӧрсязы кыстӥськозы.

Элина Кумачёва

Удмурт Дунне
By Удмурт Дунне Май 31, 2013 12:32
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<