Лул — эксэй яке ляльчи

Удмурт Дунне
By Удмурт Дунне 27 мая, 2013 14:08
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Лул — эксэй яке ляльчи

 

Л. Музиянова

Л. Музиянова

Людмила Музиянова вордскемын но быдэ вуэмын Вавож ёросысь Выль Бия гуртын. Татысь школаын со ужа ини 1984-тӥ арысен. Вылӥ категориен дышетӥсь. Россиысь но Удмуртиысь дышетон удысысь дано ужась. 2006-тӥ но 2011-тӥ аръёсы «Дышетон» нацпроект чотын премия басьтӥз. 2008-тӥ арын луиз Россиысь ӟуч кылын тужгес чебер вераськись педагог. Ӟеч тыршемез пусъемын «За просветительскую работу» медален. Удмуртиысь но Россиысь дышетӥсьёс ужазы куто солэсь «Диалог культур в школьном курсе» пособизэ.

— Людмила Арсентьевна, пичи дыръяды ик дышетӥсь луэмды потэ вал-а?

— Нырысетӥ классысен ик тодӥсько ни вал, дышетӥсь луо шуыса. Сыӵе кельше вал мыным тетрадьёс эскерыны но оценкаос пуктылыны. Семьяямы ми вить нылпиос, мон ньылетӥ ныл, витетӥез — пи, Саша вынмы. Ми, Лида, Валя, Нина, Люда нылъёс, копак дядямы Арсентий Васильевич Шуравин кадесь. Атай котьку ас кыл вылаз сылылӥз, мар малпаз, одно ик лэсьтоз, зэмлык понна пумозяз мыноз. Нош вынмы мамамы Анна Михайловна кадь. Мамалэн нокинэн даллашемез, керетэмез ӧвӧл, чал-чал, лякыт, небыт, пумит кыл уз вера.

Мама весь шуэ вал: Люда, эн лыдӟиськы сомында, синтэм кылёд ини. Мон ӵукна 4 часозь лыдӟиськыса пукылӥ. Дышетскыкум кылбуръёс но гожъялляй, чуръёсме «Комсомолец Удмуртии» газетын печатлало вал. Школа бере пыри Удмурт кун университетэ. Шудо аръёс, группамы милям туж тузћ вал, визьмоесь, шаплыесь: Люся Карпова, Надя Боталова, курсамы ик вал Виктор Шибанов, Вячеслав Сергеев, Светлана Арекеева но мукетъёс. Курсмы сярысь печатлазы Москваын потӥсь «Студенческий меридиан» журналын. Отчы шедё вал странаысь устоосыз студентъёс гинэ. Мон али но кусып возисько эшъёсыным. Ӵем вуылӥсько УдГУ-э, студентъёслы методикая занятиос ортчытъясько.

— Тӥ туала амалъёсты уже кутӥськоды. Пыр-почгес вералэ, мар со сыӵе — творчествоя мастерскойёс?

— Ӟуч сямен со шуиське: технология творческих мастерских. Шаерамы таӵе амал вуиз 2002-тӥ арын. Дышетӥсьёслэсь тодон-валанзэс будэтонъя институтысь педагогикая кафедраен кивалтӥсь Елена Блинова (али проректор) дэмлаз Санкт-Петербурге сыӵе курсъёсы мыныны. Сое радъяз Россиысь дано дышетӥсь Анатолий Окунев. Удмуртиысь 8 дышетӥсьёс ветлӥмы. Отысь мон сыӵе бурдъяськыса вуи, валай: таӵе ужан амал мыным тупа. Вераны кулэ, кыӵе вормонъёсы мынам вань, ваньмыз со мастерскойёслы луыса.

Огшоры урокын нылпи дышетӥсез кылзэ, дась информациез басьтэ. Нош мастерскойын дышетӥсь уг валэкты выль темаез. Со пӧртэм заданиос пыр радъя нылпилэсь тодон-валан басьтонзэ. Пинал ачиз утчаське, малпаське, творчество пӧлы вые. Таӵе амал туж трос сётэ школьниклы. Шуом, классын вань ляб пиналъёс, дышетӥсь соосты толэзяз кӧня пол гинэ юалоз? Нош мастерской амалъя нылпиос парен яке группаен ужало. Востэм, ляб дышетскись пинал доска доры потыны кепыра ке, татын со аслэсьтыз малпанзэ одно ик вера, гожтэ, малы ке шуоно нылпиос ог-огенызы кенешо, малпанъёссэс ӵошато, эскеро, дунъяло. Кыкчи, ку урок быроз шуыса, уг пукы ни. Куд-ог дыръя пиналъёслэн переменае но потэмзы уг поты, сокем соос творчество пӧлы зымо. Мастерскойын материалэз сётон амалъёс но мукетэсь. Дышетӥсьлы туж трос дасяськоно луэ. Мон ужам кутӥсько крезьгурез, суредъёсты, бадӟым дидактической материалэз. Соин ик пиналъёс но трос лыдӟиськыны кулэ.

— Тӥляд асьтэлэн методикады вань?

— Вань, со нимаське «Творчествоя мастерскойёс пыр ӟуч но кунгожсьӧр литератураосты дышетон». Таӵе методикаын кык выль люкетэз: урокъёсты паръяса, мастерскойёс ортчытъян но занятиын кӧня ке параллель лэсьтон. Кылсярысь, ӟуч литература вӧзы удмурт, кунгожсьӧр литератураосысь огкадьзэ утчасько. Параллельёс луыны быгато кыкысен (ӟуч-удмурт) ньылёзь (ӟуч, удмурт, бигер, англи).

— Нырысетӥ мастерскойдэс ку гожтӥды?

— 2003-тӥ арын. Гожтӥ Б. Васильевлэн «Великолепная шестёрка» веросэзъя. Ужме Москвае «Литература в школе» журналэ лэзи. 8 толэзь ортчыса, гожтэт вуиз: «Людмила Арсентьевна, ӟечкыласьком, тӥляд материалды 2003-тӥ арын устоез публикация луиз». Туж шумпотӥ. Собере уката ик мыло-кыдо басьтӥськи та уж борды. Огпол дышетӥсьёслэсь тодон-валанзэс будэтонъя институтысь доцент Надежда Лекомцева мыным шуэ: тырмоз ни, пе, ӟуч литература сярысь гинэ гожъяны, удмуртэз борды но басьтӥське. Озьы мон кыкетӥ мастерской гожтӥ: «Людей неинтересных в мире нет». Сое дасяй, удмурт кылбурчилэн Т. Черновалэн творчествоез вылэ пыкиськыса. Солэн вань «Огшоры кышномурт» кылбурез. Мон возьматыны тырши, котькуд огшоры адями пушкын вань маке паймымонэз, аспӧртэмез…

А. Перевозчиковлэн вань «Огшоры» кылбурез, Н. Огарёвлэн — «Обыкновенная повестез», В. Шукшинлэн — «Дядя Ермолай» веросэз. Крезьгурчи Н. Постников Ф. Суворовлэн кылъёсызъя гожтӥз «Эх, шу!» кырӟан. Ваньзэ тае ӵошатӥ но журналэ лэзи. Озьы 2005-тӥ арын нош ик лауреат луи. «Литература в школе» журналлэн редакторез Надежда Крупина гожтэм: тӥляд статьяды, пе, милемыз паймытӥз но 2005-тӥ арын нош ик Россиын устоез луиз. Макем тунсыко гожъясько удмуртъёс! Мон журналэ Т. Черновалэсь но А. Перевозчиковлэсь кылбуръёссэс берыктыса лэзи вал. Журналэ печатлаллям ӟучсэ но, удмуртсэ но.

— УдГУ-ысь студентъёслы но мастерскойёс ортчытъяськоды-а?

— 2010-тӥ арын Россиысь дышетӥсьёслэн конкурсазы пыриськыкум, дасяй «Ӧс» мастерскойме. Син шорам йӧтӥз Удмуртиысь калык художниклэн С. Виноградовлэн ӧс сярысь материалэз. Со мыным туж тунсыко потӥз. Озьы кылдӥз таиз уже. Мон трос бугыръяй удмурт литератураез. Шедьтӥ Л. Нянькиналэсь но А. Белоноговлэсь ӧсэн герӟаськем кылбуръёссэс. Соосты эскери. Ӧс — туж огшоры арбери. Но учке ай, кыӵе бадӟым пуштросэз солэн. Адями улытозяз кӧня ӧсэз усьтэ но дуннеез, ӧсэз сямен, пумен усьтыны кутске. Москваын урок сётэме бере дорам лыктӥз «Русский язык в национальной школе» журналлэн редакторез Жанна Критарова но шуиз: та уроктэс одно ик милемлы лэзе. Сое ик мон удмурт студентъёсын ортчытӥ.

— Кудӥз ужды асьтэлы тужгес но кельше?

— «Зор» нимоез. Та материалме пыртӥзы Москваысь дышетӥсьёслэсь тодон-валанзэс будэтонъя курсъёслэн программаязы. Сое ортчытӥ 5-тӥ классын. Тросэз пиналъёс зорез уг ярато дэриез, гудыръямез понна. Нош мон зорлэсь чебер, умой палъёссэ возьматыны тырши. Мастерскойын ужаса, нылпиослэн маке шоры учконзы чутрак воштӥське, малпанзы мукет луэ. Занятие бырыку, школьникъёсты косӥ асьсэлы Зорлэн нимыныз гожтэт малпаны. Максим нимо пияш тазьы гожтэм: «Чырткем, Максим. Гожтэ тыныд эшед. Ӧд тодма? Мон со, пичи зор. Кылӥ, тон доры вуылӥз мынам лек дядяе… Мон ачим но сое уг яратӥськы. Ветлоз эшъёсыныз, писпуосы тылпумъёс куяса, собере аслаз кысэмез уг луы. Нялтас вераса, тӥ доры али кошкиз мынам атае, сьӧраз кузьымъёс — губиос — кутӥз». Учке ай, кыӵе зол гожтэмын чилекъян но шуныт зор сярысь. Гениально.

— Людмила Арсентьевна, кылӥськиз, туэ тулыс Москваысь выль вормонэн бертӥды.

— Озьы. Мон пыриськи литературая калыккуспо «Купель» конкурсэ. Со радъямын вал Россиысь литературая премиез басьтэм муртлэн, Карелиысь гожъяськисьлэн Александр Костюнинлэн творчествоезъя. Ӵошатсконэз ортчытӥз Москваысь дышетонъя департамент но «Достояние России» фонд. Александр Костюнинэн ми 2008-тӥ арысен тодмо ини. Мон солэн «Сострадание» веросэзъя мастерской гожтӥ. Малы одно ик та веросэз басьтӥ? Отын туж мур философиез. Пуштросэз таӵе: одӥг пияш эшез доры куное пыре. Отын юлтошезлэн бабушез керттӥськыса пуке. Пи кружкаяз йӧл лэзьыку, песяй внуксэ янгышен донге но, йӧл выж вылэ кисьтӥське. Пияшлэн вожез потэ но, бабушез шоры таба кутонэз зӥртэ. Со пересьлэн пыдаз йӧтэ, арлыдо кышномурт бӧрдэ. Пияшлэн эшез соос дорысь бызьыса потэ.

Та верос сюлмам пыриз, но ӧй тоды, кызьы сое занятиын радъяны но кыӵе «тусын» ыстыны конкурсэ. Шуак йырам лыктӥзы О. Мандельштамлэн «Дано мне тело — что мне делать с ним» чуръёсыз. Соку ваньмыз ас интыяз пуксиз. Материалам валтӥсь геройёс луизы Мугор но Лул. А. Костюнинлэн веросаз пичи пияш бызьыса кошке. Малы? Малы ке шуоно лулыз вӧсь луиз, сыӵе лекез адӟыса. Нош мугорыз шуиз кадь: со тынад бабушед ӧвӧл ук, малы бӧрдӥськод? Озьы адямилэн лулыз ляльчи но, эксэй но луыны быгатэ.

Та материалме конкурсэ лэзьыса ик, мон вормись луи. Со конкурсэ пыриськизы на нылпиос. Кылсярысь, Юля Лапшина «Поэзия» номинациын та веросъя кылбур гожтӥз. Софья Шемякина «Фото» люкетаз ужзэ лэзиз, нош Алина Абрамова «Сострадание» веросэз удмурт кылэ берыктӥз. Пиналъёсмылэн ужъёссы озьы ик устоосыз радэ сюризы.

— Россиын «Лучший урок письма» конкурсын нош ик тӥляд дышетскисьты вормиз но «Орлёноке» вуылӥз.

— Нырысьсэ та конкурсэ пыриськиз пие Дамир Музиянов 2007-тӥ арын. 226 сюрс гожтэт пӧлысь солэнэз нырысетӥ инты басьтӥз. Табере тани Роман Возняков «1941-тӥ аре гожтэт» номинациын вормиз. Мон солы дэмлай сочинение гожтыны. Роман одӥг ужзэ вае, кыкетӥ сочиненизэ вуттэ, куинетӥзэ. Маиз ке но уг тырмы. Котькудысьтыз мон одӥг яке кык предложенизэ гинэ бырйисько. Чиданэз тырмиз ведь, молодец, гожтӥз, вормиз. Романэз «Почтовик России» журналэ но печатлазы. Туэ вормисьёсты нырысьсэ ӟечкылазы «Орлёнок» нылпи лагерьын.

— Дышетӥсьёслэн ӝыны улонзы школаын ортче, асьсэлэн нылпиоссылы дырзы уг тырмы.

— Озьы со. Мон школаын, бумагаос, тетрадьёс пӧлын. Нылпиос, хозяйство картэ вылын вал. Раис Нургаянович — Можгаысь бигер. Соин тодматским Ижысен, студент вакытам. Со, сельхозинститутэз йылпумъяса, инженерын ужаз. Вань гуртысь ужез лэсьтылӥз. Огпол георгин мерттӥ но, Раис выльысен копам, озьы, пе, мерттыны уг яра, кыед пононо, нош тыныд музъеме донгемын гинэ медло. Мукет дыръя дас ӟазегпи басьтӥз. Со ужысь вуыку, огез гинэ на тютю кылемын вал. Мынам соосты учкыны дыры ӧз тырмы-а, мар-а. Ма, кыӵеме тодыса, картэ мыным писпу мерттонэз но уг оскы вал. Садамы ваньзэ ачиз мерттылӥз. Яке убо лэсьтоз но шуоз: таяз сое кизёд, таяз тазьы карод.

Картэным куинь пинал вордӥмы: Гуля нылмы быдэс папаез кадь. Сыӵе ик небыт, лякыт, нылпиосты яратэ. Со УдГУ-ысь искусствоосъя но дизайнъя институтэз йылпумъяз. Кыкетӥез — Регинамы — Удмурт кун филармониысь артистка. Таиз мон кадь. Ваньзэ пырак вералоз, солы котькинлэсь азьпалан, кияз горд флаген луоно. Дамир пимы али УдГУ-ын юристлы дышетске, спортэн эшъяське, папаез кадь ик ӟеч, лякыт. Нылпиос понна но Раис котьку нырысь интыын вал, больницае но пиналъёсын со ветлылӥз. Огпол картэ Ува санаторийын шутэтске вал. Гулялэн пиньыз висьыны кутскиз. Ӵап соку Раис жингыртӥз: мар, пе, кариськоды, кыӵе ужъёсты? Гуля папаезлы ӝожтӥськиз, пиньыз висе шуыса. Раис ведь 12 часын уйин санаторийысь вуиз, нылмылы эмъюм вайиз.

Гуртын берло дыре сыӵе мода луиз: анайзы-атайзы удмурт, нош пиналзы удмурт кылэз уг дышеты. Семьяямы ноку но сыӵе юан ӧз кылдылы. Раис пиналъёслы шуиз: мамады удмурт, улӥськоды удмурт гуртын, Удмурт шаерын. Анай кылдэс одно ик умой тодыны кулэ. Со бигер ке но, туж чылкыт вераськиз удмурт сямен. Ассэ удмурт бигер гинэ шуылӥз. Жаляса верано, куинетӥ арзэ вӧзамы ӧвӧл ни. Но ми Раис кадь луыны тыршиськом. Нылпиосын, маке ужакумы, весь шуиськом: вот папамы озьы карысал, папамы озьы шуысал. Мон понна со кулэмын ӧвӧл. Валес дорам бадӟым туспуктэмез сылэ. Ӵукна султыкум но, школаысь бертыкум но, мон Раисэн ӟечбуръяськисько. Сотэк мынам нокыӵе вормонъёсы но ӧй луысалзы, дыр, картэ мыным котьку юрттылӥз. Ма, Можгаысь выны но шуэ, Раис ке ӧй луысал, диссертацидэ но ӧд гожтысалыд.

Нылпиос быдэ вуизы

Нылпиос быдэ вуизы

— Озьыен, тӥ диссертация гожтӥды?

— Мон сое ог 7-8 ар талэсь азьло гожтӥ ини. Защитае луыны кулэ вал Москваын Дышетонэз азинтонъя федерал институтын (ФИРО). Мынэсьтым диссертациме Россиысь Наукаосъя академиысь профессор но учкиз, отзывез но вал ини. Но ФИРО-ысь аспирантурая отделзэс ворсазы. Документъёсты басьтыны уг лэзё, со отделэз весь усьтом, шуо. Ижын асьмелэн методикая аспирантурамы ӧвӧл. Мукет городъёсын но луэ вал, дыр, ини защитаме ортчытыны. Но адӟиськоды ук, весьдыр уг тырмы.

— Нош ик кытчы ке дасяськиськоды?

— Инвожо толэзе мынӥсько Москвае. Кыкетӥ арзэ ини Россиын радъяське «Русский язык в диалоге культур» проект. Мон отчы кылем арын но пыриськи. Ворми вал «Социальной проект» номинациын. Ужме герӟай Удмурт кун университетэн. Туэ куинь номинацие пыриськи ке, кыказ мынам проектэ нырысетӥ инты басьтэм. Вормисьёсты ӧтё Москвае июнь толэзе. Озьы ик та проектын «Язык и культура» люкетаз вормисе потӥз дышетскисе Евгений Прозаев. Нялтас вераса, та пияш ик 2007-тӥ арын кыкетӥ инты басьтӥз Россиын ортчем «Гайдар. Время. Мы» конкурсын.

— Людмила Арсентьевна, тӥляд туж трос вормонъёсты, соосты ваньзэ гожтыны газет бам уз тырмы. Ойдолэ выжом Выль Бия школаысь учыръёс вылэ.

— Соос трос. Я ми, дышетӥсьёс, серекъяськом, я пиналъёс горо. Мон понна шыр — дуннеысь тужгес кышкыт изьвер. Малы ке азьвыл соос школаямы трос вал. Одӥгаз урокын доска доры ӧти Оля Метелёваез. Нылаш потӥз но уроксэ вераны кутскиз. Собере шуак шыпаз. Мон сое дыртытӥсько: шонер, Оля, азьланьты. Нош со шып улэ. Выж шоры учки но, сэрегысь шорамы ик шыр лыктэ. Оля класс тыр кеськиз но парта вылэ тэтчиз. Мон кышкаменым ӧй но вала, кызьы Оля вӧзы султӥ. Озьы ми, дышетӥсь но дышетскись, урокын парта вылын сылӥмы.

Кылем ар пумын почтае пыри но тодӥ «Ты не один» акция сярысь. Со сӥземын вал огназы кылем пересьёслы саклык висъянлы. Нылпиосын кенешим отчы пыриськыны. Арлыдоослэн юртазы улӥсь песятай-песянайёслы шуныт кылъёсын гожтэтъёс, ӟечкылан открыткаос ыстӥм. Ваньзэ-ӧвӧлзэ 25 гожтэт луиз кадь. Кемалась ик ӧвӧл тодӥм: Выль Бия школаысь нылпиослэсь гожтэтъёссэс басьтӥллям Можгаысь пересьёслэн юртазы улӥсьёс. Табере со арлыдоос милемлы гожъяны кутскизы. Огез песяй гожтэм: шуныт кылъёстэс лыдӟыса, пе, быдэс уй бӧрдыса потӥ, мон но кинлы ке кулэ на шуыса. Мон шумпотӥсько, нылпиос со пересьёсын кусып тупатӥзы шуыса. Таиз дышетскон ар быре ни, пиналъёс экзаменъёслы дасясько. Малпасько, оло, сентябре ик ми Можгала вуылом но со пересьёсын матысьгес тодматском, эшъяськом. Соос милемды куное ӧтё ини.

Кызьы А. Костюнинлэн одӥг веросэз пиналъёслэсь сюлэмзэс бугыртӥз, соосты ӟечгес карыны, арлыдоосты гажаны-жаляны дышетӥз, озьы ик та ужрад но соослы возьматӥз: макем кулэ сюлэмын но улонын ӟечлык.

— Людмила Арсентьевна, тӥ чик уд шутэтскиське, дыр.

— Уг быгатӥськы мон шутэтскыны. Мыным ялан утчаськоно, кытчы ке но пыриськоно, али тани нош ик школаысьтымы куинь нылпиез выль конкурслы дасяно. Мон собыдӟа кайгуэз, Раислэсь улонысь кошкемзэ, ӧй вормысал, яратоно уже ке ӧй луысал. Мынам тау кареме потэ школаысьтымы кивалтӥсьёслы но. Тани кема аръёс директормы вал Нина Максимовна Ефремова. Со котьку но валаса, шумпотыса пумиталляз мынэсьтым ужъёсме, ӵектонъёсме, выль амалъёсты уже кутэмме. Озьы ик Ижысь дышетӥсьёслэсь тодон-валанзэс будэтонъя институтысь Надежда Витальевна Лекомцевалы но наукая кивалтӥселы Елена Рудольфовна Блиновалы тау шуисько. Соос лӧпкытъямен, бурдъямен выль ужъёс борды мыло-кыдо басьтӥськи.

— Али ӵукнаозь лыдӟиськиськоды на-а?

— Лыдӟиськисько. Мукет сямен мынам улэме уг луы.

Галина Семёнова

Удмурт Дунне
By Удмурт Дунне 27 мая, 2013 14:08
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<