Кылбур кылзыны — уй клубе

Удмурт Дунне
By Удмурт Дунне Май 28, 2013 12:43
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Кылбур кылзыны — уй клубе

Андрей Гоголев уй клубын

Кылбурчиос Андрей Гоголев но Марина Кацуба куанэмын: ужрад пӧрмиз!

Егит кылбурчи Андрей Гоголев тодмо луиз Можгаын, Ижын, Питерын кылбур лыдӟонъёсты мыло-кыдо радъяменыз. Озьы со калыклы выль нимъёсты усьтэ. Андрей дышетске Москваысь М. Горький нимо литературая институтын. Оштолэзь пумын «Ленин. Самолёт. Девушка» нырысетӥ книгазэ поттӥз. Со мадиз выль книгаез, кылбурет но шоркаръёсысь лулчеберет улонлэн шокамез сярысь.

— Огшоры шумпотонлэсь номыр но дуноез ӧвӧл — таӵе малпанэ вуыса, мон аслым ачим пересь потӥ. Со кылъёсты пересьёслэсь гинэ кылэме вань уга. Пушкысьтым шумпотонэз поттыны амал шедьтӥ — гожъяськыса. Туж умой — выль книгаелы шумпотӥсьёс сюризы. Талэсь номыр но дуноез ӧвӧл.

Араб поэт Абу-ль-Фарадж гожтӥз: вань гожъямъёсты лыдӟыны кулэ ӧвӧл, котькудӥз аслыз кельшись сяськаосты мед бичалоз. Кылбур бичет дасяку, тодын возёно: кылбуръёс — со уксё ӧвӧл, ваньмызлы уз кельше. Тани мынам книгаям одӥг роман, одӥг верос, одӥг кылбур. Кылбур, кырӟан, текст — со туж ненег маке. Кинлы ке со уг кельшы ке, озьыен — адями мукет тулкым вылын.

— Андрей, огаз интервьюын тон шуид, литературной институтысь дышетӥседлэн малпамезъя, ужъёсад ӧвӧл огъя героез. Та книгаед сярысь, оло, озьы вераз.

— Ӧвӧл, Евгений Юрьевич Сидоров озьы вераз кылбуръёсы сярысь. Мон малпасько, герой ке вань, со котырын гинэ дунне берга: со кужмо, нош кылемъёсыз — ӟустариос. Нош адями пушкын трос субличностьёс уло, уродэз но ӟечез ваче мыно.

Литературной институтын дышето совето вакытысь адямиос. Совето Союзын чурыт куронъёс, кабъёс вал. Но куке но институтын паймымон кылбурчи дышетӥз — Константин Кедров, со али но гожъяське. Ачиз ик кат кылдытэ, ачиз ик сое сӧре.

Мыным туж кельше, адями ачиз стиль малпа ке. Гожъяськыны луэ со дырозь, куке тон со стилез пумозяз ӧд кылдыты на. Нош кыӵе ке кабъёсъя гожъяськод ни ке — со бырон.

— Кӧня ке дыр ортчыса, валаны луэ ук, тон но кыӵе ке стиль, ӧр пӧлын мынэмед шуыса…

— Бен. Озьы луэ. Куддыръя со автор пушкысь потэ, яке кылбурчилэн гожтэмезлы сыӵе дунъет сёто. Мыным но шуизы, гожъямъёсыд, пе, постмодернизме пыро.

— Тон ӵем вуылӥськод шоркаръёсы, яратӥськод Петербургез. Вера вал Питер сярысь.

— Питер — со вӧсьлыко кар. Тани Мускоын дыртыса улоно. Мон заочник бере, толэзь куспын ваньмаз вутсконо: дышетсконэ ветлыны, экзамен сётыны, концертъёсы, ужрадъёсы пыриськыны. Озьы куинь ар кыстӥське ини, пушкам выль сямен шӧдонъёс ялан кылдо.

Питере мон эшъёсы доры ветлӥсько, отын мынам одӥг уже — кылбур лыдӟонъёс. Тужгес но ӟеч кылбур ӝыт 2011-тӥ арын южтолэзе вал Fish Fabrique уй клубын. Та ужрадэз дасязы «Болт» арт-клуб но Марина Кацуба кылбурчи. Соос, куинь нунал куспын калыклы ивор сётыса, быдэс клуб тыр адями люказы. Мон трос лыдӟи, лулысь-сюлмысь, калык туж умой пумитаз.

Со ӝытын текстъёс гинэ лыдӟизы. Зэмос поэтъёс вераськизы, соин мон ӧй шӧды, эшшо мар ке кулэ на шуыса. Вис карыку гинэ лэйкыт крезьгур пуктылӥзы. Ваньмыз туж зол пӧрмиз.

«Болт» — туж тунсыко клуб, солэн легендаез — Артём Кулагин. Отын «Брезент кеттык (цапля)» выллем ужрадъёсты ортчыто. Ижын ми доры калык ветлэ, нош Питерын таӵе ужрадъёсы эшшо но тросгес лыкто. Ижын уй клубе кӧня калык огшоры позыръяськонэ люкаське, сомында ик егитъёс Питерысь клубе кылбур кылзыны лыкто. Малы ке шуоно кылбурет бордаз кыске. 1990-тӥ аръёс бере вордӥськем поэзия туж аспӧртэм. 1990-тӥ аръёсы ми ӧм шӧдэ йырвиымез пуштытӥсь кылбуретэз: совето вакытысь кылбурет чоньдӥз, нош вылез ӧз на кылды.

— Нош кыӵе со, совето вакытысь йырвиымез пуштытӥсь кылбурет?

— Мон Иосиф Бродский сярысь верасько. Бродский — со генератор, маял вылын сямен, ми ӝужамын Бродскийлэн кылбуръёсыз вылын. Со кадь кылбурчиос уз луэ ни, малы ке шуоно Бродский вал ни. Верасал: ас ёзо эшъёсме, соослэсь гожъямъёссэс мон дунъясько. Питерын со, нырысь ик, Марина Кацуба. Кылбуръёссэ нылкышно кылбурет пӧлы пыртыны шуг, со мукет поэзия кылдытэ. Бадӟымъёсыз пӧлын Лёха Никонов, егитъёсты ас палаз кыскыны быгатэ. Бадӟым куараен, визьтэм кылын кылбур черекъя, турын кыске, но кышкыт уг луы. Та кылбурчилэн туж кужмо энергетикаез. 10 кылбур гожтыса, укмыссэ сэрпалтыны быгатэ, тупатыса уг улы. Мыным со кельше, но мылкыдме быдтэ солэн огшоры луэмез.

— Нош кин кылбуранэныз малпанэз воштыны быгатэ?

— Созэ ини дыр ортчем бере гинэ валаны луоз. Питерын мон 3 творческой огинлыкез синйылтӥсько. Со «Болт» арт-клуб, кыкетӥез — «Послушайте» кылбурчиослэн театрзы, куинетӥез — Ленинградысь писательёслэн огазеяськонзы — классикъёс номырин но уг выро ке но, соосты туж гажало.

«Болт» арт-клуб — туж модной, чебер. Егитъёс понна, хипстеръёсты люкан понна кылдытэмын. Мыным со сюлэмыя уггес лякиськы, но, малпасько, Питерын та огазеяськон тужгес но ӟечез. Кыкетӥез — поэтъёслэн «Послушайте» театрзы но Владимир Антипенко. Мон валай, отчы куаш-куаш графоманъёс люкасько, театрализациос орчытъяло, телевидениын соосты возьмато. Антипенко «ВКонтактеын» ӧте: отчы лыктэ, татчы лыктэ, татын лыдӟе. Со телепередача нуэ, туж пӧсь, акылес выре.

— Тодам лыктэ «Брезент кеттыклэн» графоманилы сӥзем нимысьтыз люкаськонэз. Со ӝытын энергетикаез туж кужмо вал.

— Бен, но кылбурет графоманиен нокызьы но герӟаськемын ӧвӧл, малы ке шуоно та учыре адямилэн ассэ ачиз гажамез гинэ адӟиське. Таӵе малпан вань: яке адями возьматыны турттэ, макем дунне чебер, яке — макем со ачиз чебер.

Кылбурчиослэн «Послушайте» театрзы — со гожъяськисьёс понна огазеяськон: соос асьсэлы асьсэос лыдӟо.

Мон туж шумпотӥсько, «Брезент кеттыке» адямиос кылзӥськыны лыкто шуыса. Та книгаме («Ленин. Самолёт. Девушка») поттыны юрттӥз историк. Озьыен, милемыз калык кылэ. Ми усьтӥськемын ваньмызлы. Нош «Послушайте» амёба выллем бадӟыма: ньылэ но пушказ пыртэ. Тае тодытэк, мон соослэн ӝытазы кылбур лыдӟыны кутски. Нош Владимир Антипенко кылбуръёсме киысьтым кыскиз но, «Эн лыдӟы ни! Тырмоз» шуыса, кагазме пыд улаз лёгаз. Соку кичабыны кутскизы. Уг тодӥськы, кинлы чабизы: оло мыным, оло солы, оло та учырлы.

Антипенко мынэсьтым мылкыдме ӧз сӧры, мон Питерысь мукетсэ шедьтӥ: монэ отын одно ик маке умоез вите.

Питерын ведь туж умоесь ижкар пияшъёс уло: Петя Берш, Гриша Старовойтов — кужмо кылбурчиос.

— Кыӵе ужен али выриськод?

— Алигес ужаны выжи «Италмас» литература журналлэн редакцияз. Журналэз арлы куать пол потто Кам институт но М. Петровлэн благотворительной фондэз. Ужъёс трос: журналэ материал утчано, дизайнзэ чебергес кароно. Нош тужгес но бадӟымез ужпум — Михаил Петров писательлэсь сочинениоссэ поттон борды басьтӥськоно. Озьыен, мон удмурт литературалэсь но палэнэ уг кылиськы.

Лариса Дмитриева

Удмурт Дунне
By Удмурт Дунне Май 28, 2013 12:43
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<