Дядяе кык пол ватэмын

Удмурт Дунне
By Удмурт Дунне 10 мая, 2013 17:56
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Ленинградэз котыртэмысь поттэм нуналысен туэ 70 ар тырмиз. Ог кык ар советской солдатъёс но городысь адямиос вис карытэк ыбылӥськем улсын сютэм но кынмыса улӥзы. 1944-тӥ арын 27-тӥ январе город тушмонъёслэсь мозмытэмын вал.

Ленинградэз утёнэ но мозмытонэ пыриськизы Пичи Пурга ёросысь Абдэс-Урдэс гуртысь атае Иван Павлович Павлов, киросатае Захар Фёдорович Фёдоров, Степан Михайлович Михайлов, Ильинск черкогуртысь Семён Гурьянович Гурьянов, Егор Иванович Пупыдов, Михаил Васильевич Пупыдов. 1944-тӥ арын Степан Михайлович Михайлов ожмаськонысь сӧсырмыса бертӥз, паллян кияз кык чиньыосыз гинэ кылемын вал. Киросатаеным Захарен ӵош 1941-тӥ арын фронтэ кошкизы вал, одӥг частьын ик ожмаськизы.

— Тушмон бомбаос куяз, ыбылӥзы милемыз уйин но, нуназе но, — вералляз со улэп дыръяз. — Немецъёс матэкто, котырак нюлэс но нюр интыос, ми сьӧрын Ленинград. Захат эше 1943-тӥ арын апреле син азям ик улэпкын нюре выйиз. Мон солы юрттыны ӧй быгаты, кужмы но быремын вал, луонлыкъёс но ӧй вал — пуляос вис карытэк шулазы.

Кӧня асьме калык соку быриз. Котырак бырем солдатъёс кыллизы. Нош кӧняез выйизы, сое нокин но уг тоды ини табере.
Атайме демобилизовать каризы 1946-тӥ арын августэ. Но кӧня кӧшкемыт нуналъёсты но уйёсты чидано луиз солы но милемлы та шумпотон нуналозь. 1943-тӥ арын 21-тӥ сентябре секыт ивор вуиз: Ленинград дорын секыт ожъёсын рядовой Иван Павлович Павлов ивортэк ышиз. Нош куинь толэзь ортчыса, вераны луонтэм шумпотон вуиз: атайлэсь гожтэтсэ басьтӥм. Секыт сӧсырмемез бере со госпитальын эмъяськем. Тушмон самолётъёс батальонзэс пазьгиллям. Но атае улэп кылем. Сое шедьтӥллям музъемысь, сутка пала ортчыса. Со куспын ик милемлы похоронка лэзьыны вуттӥллям.

Атае 1946-тӥ арын бертӥз, ёрос военкоматэ учётэ султӥз. Но малы ке 2000-тӥ арозь со ивортэм ышемен лыдъяськиз. Мон «Буре ваён» книгаысь но атаелэсь фамилизэ лыдӟи, отын озьы ик гожтэмын — ивортэк ышемын («Книга памяти», 6-тӥ том, 1994-тӥ ар, 276-тӥ бам). Мон та пумысен вазиськылӥ Пичи Пурга ёрос администрацие, отын шуизы: ваньзэ тупатом, пе. Потӥз выль книга. Паймымон, «Буре ваён» книгаын гожтэмын: «Иван Павлович Павлов призван в Советскую Армию Малопургинским РВК, гвардии рядовой. Погиб в бою 25 июля 1943 года, похоронен в д. Умрихино Орловской области», («Книга памяти», 1996-тӥ ар, 67-тӥ бам). Оло, зэм но Умрихино гуртысь шайвылын атаелэн фамилиеныз вань памятник?
Фронтысь бертӥз ньыль медален: «За отвагу», «За боевые заслуги», «За оборону Ленинграда», «За победу над Германией в Великой Отечественной войне в 1941-1945 гг.». Медальёссэ сямен ик ӝикыт утялтыса возиз командованилэсь кык Таукаронъёссэ. Отын гожтэмын: «Всему личному составу, в том числе и Вам, Павлов Иван Павлович, принимающему активное участие в боях, объявлена благодарность за освобождение городов Рига, Таллин, Вильнюс, Псков, Нарва, Львов, Эвель, Ковал, Кёнигсберг».

1946-тӥ арын частьсылэн командирез строй азьын верам, наградаоссэ гуртаз лэзём шуыса. Атае соосты кулытозяз возьмаз, но ноку но ӧз басьты. Оло, военкоматын ивортэк быремен лыдъяськемысь?

Атайме фронтысь бертэмез бере ик колхоз кивалтӥсе пуктӥзы. Туж секыт вал ужаны. Вань ужез валъёсын, ошъёсын быдэсъязы, музъемез ноку но гырытэк-кизьытэк ӧз кельтэ. Но атае висьыса ужаны ӧз быгаты ни, 1956-тӥ арын 16-тӥ апреле улонысь кошкиз. Туэ июнь толэзе солы 101 арес тырмысал, но со 45 арескозь но ӧз улы.

Мынам туж потэ вал Ленинградэ ветлэме, атаелэсь ожмаськем интыоссэ учкеме. Сыӵе учыр тупаз 1988-тӥ арын: быдэс Совето Союзысь марафонъя бызьылонэ пыриськи. Таӵе марафонъёс 1970-тӥ арысен арлы быдэ ортчытъясько, со сӥземын Ленинградысь «Улон сюреслэсь» геройёссэ но городэз мозмытӥсьёсты буре ваёнлы. 12 бадӟым автобусъёсын мынӥмы Ладожской ты дуре, «Разорванное кольцо» памятник доры. Со дорын митинг ортчиз, нош 12 часын старт сётэмын вал. Ваньмы бызим Ленинградэ. Финишмы вал Романовка посёлокын «Цветок жизни» памятник азьын. 42 иськем 195 метрез бызьытозям, йырам малпанъёс бергазы: кытын ке но татын ожмаськиз, дыр, мынам атае, кытын ке но со сӧсырмиз. Сюлмам огдыре ик секыт но, капчи но вал.

П. Павлов
Пичи Пурга ёрос, Ильинск черкогурт

Удмурт Дунне
By Удмурт Дунне 10 мая, 2013 17:56
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<