Кык дунне

Удмурт Дунне
By Удмурт Дунне Май 31, 2013 11:33

Кык дунне

Е. Артемьев

Е. Артемьев

Пичи Пурга ёросысь Аксак починкаысь Эркемей Егор (Егор Яковлевич Артемьев) Совето Союзлэсь кунгожзэ утиз, пусъемын «Отличный пограничник» гадьпусэн.

Солэн школа бере туж потэ вал тракторен ужамез. Гуртысьтызы трактористъёслэн бригадаенызы кивалтӥсь Трош Паша (Баймурзин), мылкыдзэ шӧдыса, ӵектӥз мыныны Воткае механизаторе дышетскыны. Отысь бертыса, Егор ӝыны ар ужаз на колхоз бусыын, собере военкоматысь повестка вуиз.

Егорез келязы Азербайджанэ Иранэн кунгожез возьманы. Кунгож соку ортче вал Аракс шурлэн шортӥз. Солэн кезьыт но мур вуэз ӝог бызе Талыш гурезьёс вӧзтӥ, изъёссэ волятыса.

Службаез ортчиз 1962-тӥ-1965-тӥ аръёсы. Гурезьёс Каспий зарезьлы матын бере, куазь ӵем вошъяськылӥз. Гужем пӧсь луэ, йыразы панамкаен ветлӥзы, шунды ымнырзэс, чыртызэс медаз пыжы шуыса. Толъёс кезьытэсь — изьылӥзы бушлатэн, пыдазы гын сапеген ветлӥзы. Нош инбам сайкыт дыръя изъёс шунды шорын сокем ӟырдало — лымы ик котыразы шуна, турын-куар ӝужаны кутске.

— Заставамы умой вал, — тодаз вае Егор Яковлевич. — Гурезь бам одӥгетӥ гинэ меӵ. Отчы тубаны, изъёсты пильылыса, 250 лёгетъёс лэсьтэмын. Изъёс улысь быльырась ошмесъёс котырын — будосъёс, сяськаос. Мылкыдэз лӧпкыто соос, дорез тодэ вайыто. Заставаямы асьмелэн пекарнямы вал. Музъем эгырен эстӥське, уг кысылы. Соин нарядысь бертӥсьёсты котьку шуныт сиён возьмаз, сӥзьыл зоръёс дыръя дӥськут куасьтыны ёрмонэз ӧй вал.

Куддыръя пограничникъёсты лэзьязы 7 иськемысь Сым селоез эскерыны. Село шуэм понна — 3 корка гинэ. Отын чабанъёс уло, ыжъёссы тачак. Котькуд уллёез ньыль бадӟымесь пуныос возьманы дышетэмын. Пограничникъёсты ыж йӧлэн, солэсь лэсьтэм сырен куноято. Пӧсь куазен, пе, чаен сыр сю куасьмемез но быдтэ, сием но уг поты.

— Со аръёсы Иран НАТО блоке пыре ке но вал, кунгожез потасьёс ӧй вал, — азьланьтэ веранзэ Егор агай. — Ӵем ӝутказы тревожной группаез, бышкись езъёс пыр гондыръёс потаку. Возьмаськон сюресмы дурын ик чинара будэ вал, вишнялы кельшись емышо писпу. Гондыр ческытам отчы пиеныз. Нош эшъёсмы ыбиллям пизэ. Марлы ёрмыса озьы дауртӥллям? Заставаысь командирмы шуиз: «Ну, табере мумиз асьмелы маза уз сёт ни, весь езъёсты ваче карылоз». Озьы ик луиз. Гондыр, матэктэммес адӟыса, кык пыдъёсыз вылэ султэ но, омырез зынъяса, пегӟе вал.
Служба йылпумъяськон азьын ни вал со. Иранысь кыӵе ке бадӟым адямизы, бышкись езъёсты вандылыса, асьме пала потэм. Егор эшъёсыныз ӵош сое синйылтӥзы, кырмизы, вуттӥзы заставае. Та понна Артемьев пусъемын «Отличный пограничник» гадьпусэн.

Бертӥз данэ потэм пограничник котыр сюрестӥ — Каспий зарезь дуртӥ. Татӥ Аракс шур эшшо но паськыт но мур вылэм. Кык палаз ик — Астара город. Соосты герӟа туж чебер выж. Иранъёс асьсэ палзэ городэз Ардатиль шуо вылэм. Татӥ Талыш гурезьёс Каспий пала васько, шур дуртӥ бамалъёс лысо нюлэсэн шобырскемын. Озьы бере, татын но туж сак луыны кулэ. Берлозэ кунгож шоры учкыса, удмурт пияш азербайджан музъемен люкиськиз.

1966-тӥ арын Егор Артемьев кышнояськиз Уллапал Кечолысь Лидия Алёшкинаен. Семьяенызы улыны выжизы Аксаке. Нылпиоссы кемалась ни асьсэ семьяосынызы уло пӧртэм интыосын. Анайзы ӧвӧл ни ке но, шумпотыса бертыло вордӥськем доразы. Талэсь ӟечез ма вань на дядяйлы но песятайлы?

* * *
Аксакысь Анатолий Акаевлы но кемдӥз Кавказын службазэ нуыны, 2003-тӥ-2005-тӥ аръёсы Дагестан но Азербайджан вискысь кунгожез возьмаз.

— Милемыз вуттӥзы Гарах заставае, — тодаз вае Анатолий. — Нырысь улӥмы пу коркаосын. Кунгож но 4 иськемез гинэ рос-прос лэсьтэмын вал ай — бышкись езъёсын, солэн дуртӥз музъем гыремын-усыямын. Бертон азям гинэ заставамылы оскем 14 иськем кунгожез кызьы кулэ озьы лэсьтӥзы ни, пограничникъёслы бетонлэсь кисьтэм юрт ӝутӥзы. Одӥг липет улын спортзал но, бассейн но. Службае дыръя кунгожез потасьёс ӧй вал. Лудкечъёс гинэ ез пыр уй но нунал солань-талань бызьылӥзы. Езъёс ваче йӧто но, электросигнал заставае вуэ. Котькудаз тревожной группаез ӝутъязы. Нош лудкечлэн потэм интыяз гонэз гинэ ишкалскыса кылемын. Соослы дунне одӥг, нош милемлы — кык: асьме но кунгожсьӧр. Соин туж сак улоно луиз.

Солэн верамезъя, татын улӥсь калыкъёс, лезгинъёс, ӧз яратэ пограничникъёсты. Совето Союз дыръя угось Дагестанысь Азербайджанэ гань-гань луэ вал ӵыжы-выжыоссы доры ветлыны. Нош табере соосты висъяло бышкись езъёс. Но мар карод — пограничник та понна янгыш ӧвӧл ук…

Дагестан музъем — гурезё, абрикосэн, грушаен узыр. Но погонэн адями татын — мурт. Таӵе мылкыдын бертӥз Анатолий дораз. Сьӧр шаер чебер ке но, ас палъёсыд сюлэмлэсь люконтэм. Котькуд 28-тӥ мае люкасько ке огазе кунгожмес возьмасьёс — мылкыдзы пачылме кырӟанъёсын, тодэ ваёнъёсын. Лулпушсы тырме данъяськонэн — вож погонэз котькудӥзлы уг оско.

Валерий Баймурзин
Пичи Пурга ёрос

Удмурт Дунне
By Удмурт Дунне Май 31, 2013 11:33
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<