Мед кылдоз кужмо тулкым

Удмурт Дунне
By Удмурт Дунне 21 мая, 2013 12:20
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Мед кылдоз кужмо тулкым

Ваньмыз кутске семья бордысен

Ваньмыз кутске семья бордысен

Анай кыл быроз ни шуыны шедьтӥськод ке, тросэз удмуртъёс вожзэс потто, уг оско. Но кызьы кылмы улоз, нылпиосынымы ӟуч кылын гинэ вераськиськом ке?

Тракторист но, кивалтӥсь но

Тросэз асьсэды буйгато: «мон уг ке но вераськиськы, бускель гуртын вань пиналъёс удмуртсэ тодо», «пиналы-внуке удмурт садике (классэ) ветлэ!» Бӧрысь шараяське: бускель гуртысь садикын кемалась ӟуч сямен гинэ лабырто ни. Со сяна, адями уг ик тоды, удмурт садикын арняяз анай кылъя занятиос кӧня ке пол гинэ шуыса. Нылпи удмурт кылын рос-прос вераськыны ик уг дышы. Анай-атайёс пӧлын вань на тазьы шуисьёсыз но: «пиналы удмурт сямен вала, но вераськыны возьдаське». Тазьы луэ, анай кыл семьяын нуналмысь уг кутӥськы ке. Удмурт кылэз семьяын ӧд юнматы ке, ӟуч кыл одно ик удмуртсэ вормоз. Малы ке шуоно ӟучез — котькытын: соин дышем сямъя вераськоно.

Мумы-бубыослы шуисько: кыкнады ик удмуртъёс, туж чебер вераськиськоды удмурт сямен, нош пиналъёсты анай кылынызы вераськыны уг пӧрмыто. Пиналъёстылэн нылпиоссы но уз вераське ни. Озьыен, тӥляд выжыяды удмурт кыл быриз, та понна тӥ, анай-атайёс, арлыдоос, лично кыл кутӥськоды.

Тодосчиослэн верамзыя, ӵапак таӵе югдурен сэрен пичи калыкъёслэн кылзы быре. Анай кылын вераськисьёс уг валало на кылзылэсь кулон калэ вуэмзэ. Соос огдышемъя малпало: мон уг вераськиськы ке но, кин ке но, кытын ке но вераське, кытын ке но кылмы улэ.

Эшшо одӥг ужпум. Удмуртъёс пӧлысь уноез малпало: анай кылмес утён — кивалтӥсьёслэн, тодосчиослэн, дышетӥсьёслэн, удмурт интеллигенцилэн ужез. Но со озьы ӧвӧл. Вань луло вераськон кыл, сое кутӥськом нуналмысь. Нош вань абстрактной кыл (кылмылэн грамматикаез). Туннэ нуналлы чиновникъёс но егит активистъёс удмурт кылэз утён сярысь верасько ке, ӵемысь лыдэ басьто абстрактной кылэз гинэ. Кылсярысь, вуз карон интыосты, пӧртэм учреждениосты, ульчаосты удмурт нимен гожтон, книгаос поттон — ваньмыз со удмурт кыллэн пусэз, тусэз гинэ луэ. Адямиослэн улэп вераськонзы вылын со уг шӧдӥськы.

Куддыръя сыӵе ик символической луэ, шуом, садикъёсын но школаосын удмурт кыллы дышетон-эмъяськон: фольклорез куто, ӟуч кылын валэктыса.

Кылэз утён сярысь вераськоно ке, нырысь ик чотэ басьтоно луло вераськонэз. Котькуд удмурт адями удмурт сямен вераськиз ке — семьяеныз, эшъёсыныз — соку гинэ удмурт кыл уз быры, выжыысь выжые выжоз.

Котькӧня книга гожъя, котькӧня кырӟан кырӟа, котькӧня усто ужрад ортчыты — кылдэ выжыяд ӧд ке пыӵаты, пайдаез уз улы. Анай кылъя югдур ӧз ке воштӥськы, кӧня ке ар ортчыса, удмурт кыл книгаосын, аудио- но видеоын гинэ кылёз. Удмурт калык луоз, асьсэды удмурт шуисьёс но лачак люкаськозы, ма, удмурт интеллигенция но уз быры. Но удмурт кылэз анай кыл чотэ нокин уз пукты ни, сое тодон мурт кылэз тодон выллем луоз. Ма, кыдёке ветлонэз ӧвӧл: туала вакытэ но вань сыӵе адямиос, кудъёсыз асьсэды удмуртъёс пӧлы пырто, мылысь-кыдысь тыршо удмуртлыкез ӝутыны, нош кылэз уг тодо — малы ке шуоно анай-атайёссы соосты дыраз дышетӥллямтэ.

Соин ик кылэз утёнэ яке кылэз быдтонэ котькуд удмурт адями пыриське — коть тракторист, коть бадӟым кивалтӥсь.

Уж но дор — пӧртэм?
Анай-атайёс пиналъёсынызы туннэ удмурт сямен вераськизы ке, кылмы ӵуказе улоз на. Кылэз быронлэсь утёнын бадӟым инты басьто нылпи садъёс но школаос. Соос пыр асьме обществомы возьматэ кылэз макем дунъямзэ: солы кыӵе статус сётэмзэ, правоос ласянь кусыпъёссэ, кыллэсь данзэ но мукет. Озьы ке но нылпи садъёсын но школаосын кутӥськись амалъёс котьку пайдаё уг луо. Малы ке шуоно туннэ нуналэ кылэз дышетон валтӥсь радэ потэ ке, палэнэ кылё анай-атайёс, семья.

Туала удмурт анай-атайёсты тазьы люкыны луысал:
— нырысетӥосыз пиналъёсынызы удмурт кылын уг верасько. Малпало: удмурт кыл нылпизылэн улоназ кулэ уз луы. Яке: удмурт кылэз дышетон пиналлы мултэс луэ, ӟуч сямен чебер вераськыны люкетэ но мукет. Таӵе адямиослы умой луысал валэктыны: та выллем малпанъёс — со огшоры мифъёс, кык кылэз тодон ноку но, нокинлы но мултэс ӧз луы на;

— кыкетӥосызлэн удмурт кылын вераськон мылкыдзы бадӟым, но уг тодо, кызьы семьяязы кылэз дышетоно, кызьы та ужын кылдӥсь шуг-секытъёсты вормоно. Тросэз малпало, пинал ӟуч садике яке школае ветлэ бере, озьыен, со ӟуч кылын чебер вераськыны дышоз. Ӟуч сямен вераськыкуз, пинал янгышъёс лэсьтэ ке, соиз ини анай-атайёс понна трагедия луэ. Таӵе семьяослы бадӟым юрттэт кулэ — кык кылъем семьяосын кык кылъем пиналъёсты будэтон ласянь тодон-валан сётоно, кыллы сӥзем консультациос радъяно но мукет;

— куинетӥосыз нылпиосынызы удмурт кылын верасько, пиналъёссылы удмурт ним но сёто. Озьы ке но таӵе пиналъёслы удмурт среда уг тырмы — тужгес ик каръёсын но ёрос центръёсын, кунгож сьӧрын улӥсьёслы. Соин таӵе пиналъёслэсь улонзэс умой луысал удмурт кылын радъяны;

— вань на ньылетӥосыз: ӟуч анай-атайёс нылпиоссэс шумпотыса дышетысалзы удмурт кыллы. Таӵе муртъёс но удмурт кыллэн кужымез луо. Таосызлы ивор вуттыны кулэ, кытын но кызьы нылпиоссылэн кылэз дышетэмзы луэ.

Малпасько, семьяосын удмурт кылэз улӟытон понна нокыӵе огазеяськонъёс-мар кылдытыса дауртонэз ӧвӧл, со понна трос уксё но висъянэз ӧвӧл. Асьмелэн валтӥсь кужыммы — со асьмеос, озьы ик удмурт кылын вераськыны быгатонлыкмы.

Зэмзэ вераса, ваньмызлэсь секыт тае валэктыны удмурт учебникъёс гожъясьлы, удмурт институтысь тодосчилы, удмурт кивалтӥсьлы — удмурт интеллигентлы. Угось соос понна удмуртлык но удмурт кыл — со ужен герӟаськем маке. Нош дор, семья — со мукет улон, отын дунъетъёс но мукетэсь ини. Котькуд удмурт интеллигент семьяяз пиналъёсыныз удмурт сямен вераськиз ке, удмурт сямен смс, гожтэтъёс ысъяз ке, эшъёсыз шоры удмурт сямен вазиз ке, соку удмурт сямен вераськыны мода кылдысал, кужмо тулкым кылдысал. Со тулкым вань анай-атайёсты сьӧраз кыскысал.

Одӥгез гинэ валантэм: кызьы удмурт интеллигентлэн сюлмаз-вираз пыӵатоно пиналъёсыныз анай кылын вераськон мылкыд?

Светлана Едыгарова
Финляндиысь Хельсинки университетысь тодосчи
Туспуктӥз Владимир Беломорских

Удмурт Дунне
By Удмурт Дунне 21 мая, 2013 12:20
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<