Куректонэз но шумпотонэз — ныпъет тыр

Удмурт Дунне
By Удмурт Дунне Май 17, 2013 10:53

Куректонэз  но шумпотонэз  — ныпъет тыр

Л. Гуменникова

Л. Гуменникова

Людмила Гуменниковаез нырысьсэ адӟи 2010-тӥ арын трос нылпи будэтӥсьёслы «Анаез данъян» награда сётон сӥё-дано ужрадын.

Паласькем адӟон
Шаркан черкогуртысь школа-интернатын ужась воспитателен Людмила Гуменниковаен туэ матэгес тодматскыны кылдӥз. Кык час пала пукимы вераськыса. Нылкышно дырын-дырын ӵушылӥз бам кузяз питырась синкылиоссэ.

1997-тӥ арын, куамын укмыс аресказ, со кузпалтэк кылиз: бадӟымезлы Лена нылызлы дас тямыс арес вал, нош Анялы — куинь арес. Озьы Людмила Павловналы анаезлэсь чиданзэ адӟоно луиз. Сира Андреевналы огназ ньыль нылпиез ӝутоно луиз. Бубиз кулыку, Люда дышетске вал Дэбес педучилищеын.

Мумиз шоры учкисьёс но вылӥллям, но со пумит луэм огазеяськыны: кинлы кулэ луозы, пе, мынам пиналъёсы. Огназлы секыт луоз шуыса, нылпиоссэ интернатэ но сётыны косо вылэм. Нылкышно пумит луэм: кызьы аслэсьтыд вордэм нуныдэ кытчы ке палэнэ сётод? Л. Гуменникова но вань улонзэ сӥзиз нылпиосызлы.

Ботинкаед ӟеч, сёт пиедлы
Людмила Павловналэн кузпалыз Владимир Геннадьевич кема аръёс ӵоже тыршиз Шарканысь ПМК-ын тракторист луыса, выльдӥськон вакытэ ужтэк кылиз. Интернатын уждунэз кык толэзен ӝегато, ужтэк кылемъёслы но пособие уг сёто коньдонзы ӧвӧлэн. Я, куке-соку коньдон вуэм но, комиссия люкаллям тужгес ёрмисьёсызлы висъян пумысен. Кузпалъёс Гуменниковъёс отчы ӵошен вамыштӥзы. Со учырез тодаз вайыса, Людмила Павловналэн выльысь синъёсыз нюромо:

— ПМК-ын ужакуз, мужике кулэсь ботинкаос басьтӥз. Пыдкуксэ адӟыса, комиссиын пукись шуэ: тӥни, пе, аслад кыӵе юнэсь ботинкаосыд, малы пиедлы уд сётӥськы? Сашамылы соку дас куинь арес пала вал. Ма, кытчыяз меда со понысал сыӵе бадӟым пыдкукез! Пыкылӥзы на, пинал вайыкуды, мар сярысь, пе, малпаськиды. Мукет дыръя нокытчы ӧй вазиськылы ни, кураськыса ветлыны уг быгатӥськы.

Тӥни озьы, кузпалъёслэсь пиналъёсты яратэмзэс асьсэлы пумит берыктӥзы. Леназы бӧрсьы вордӥськем Лёня пизы, толэзь улыса, сепсислэсь кулӥз. Нош воргоронлы кулэ юрттӥсь. Сашазы вордӥськиз но анай-атаезлэсь вын курыны кутскиз. Лена но шуэ, мыным, пе, сузэр кулэ. Озьы Гуменниковъёслэн ог-огзылы эшлы кык пизы но ньыль нылзы вордӥськиз. Но трос нылпиё семья, сюдӥсьсэс ыштыса но, юрттэтлы кулэяськисьёс пӧлы ӧз шедьы.

Людмила Павловна ветлӥз ик вал та пумысен юалляськыны. Гуменниковъёслэн доходзы адямилы быдэ улыны тупатэм минимумлэсь кык-куинь манетлы ятыргес луэм. Мукет аръёсаз, оло, огъя табышсы солэсь ӧжытгес луылӥз. Но кӧня ке пол ӵуштаськыса, нылкышно вань чиданзэ кияз кырмиз.

Улэм-вылэмзы пумысен нокин юась-верась ӧз луы. Вал туж секыт вакытъёс но. Атайзы кулэм бере нылпиослы сётӥськись пенсиез куинь толэзьлы ӝегатӥзы. Пызьзы ӧвӧл, нянь номырин басьтыны. Пиналъёсыз, нянь курыса, бӧрдо. Ярам, пичи ке но бакчазы вань. Картошка вылын улӥзы.

— Алигес ини, картошка пӧзьтэм зынэз кылыса, Марина нылы шуэ: пичи дырмы, пе, тодэ лыктэ. Пиналъёсме маин сюдыны ёрмыса, уйбыт бӧрдыса потылӥ, — шуэ нылкышно. — Огречмы но сылалтыны ӧз тырмылы, сиыса бырылӥз. Али со 30-40 банка пуке. Сяськаослы но инты тырмыт — ӝыны бакчаям мерттӥсько.

Со дыръёсты малпаса, нылкышно ачиз но абдра: кызьы меда чидай, пе, ку вуи ваньзэ лэсьтыны. Воспитательын ужам сяна, мукет азьын тыршиз на. Тодмоосыз но шуо вылэм, сомында нылпиостэ ку вуттӥськод утялтыны, ваньзэс чылкыт дӥсяны? Мисьтаськон машиназы соку ӧй вал. Кезьыт тол куазен, колонка доры потыса, куать ведра дӥськут гылъялляз.

Пиналъёсыз но, ульчаын ворттылыса, ӧз будэ. Огзыя огзы анайзылы юрттӥськизы, спортэн эшъяськизы. Куасэн бызьылӥзы, баскетболэн, волейболэн шудӥзы, капчи атлетикая ӵошатсконъёсы пыриськылӥзы. Вормонъёссы трос пӧртэм данъян грамотаосын пусйылэмын. Леназы гинэ висьылэменыз спортлэсь палэнын вал.

Е кылзӥськись уг кары
Спортэз гажан мылкыд нылпиослы пыӵаз анай-атайзылэсь. Людмила Павловна но пичи дырысен куасъёсын эшлаське. Курнё гуртазы школазы ӧй вал бере, куинь иськеме Балтач школае дышетскыны ветлӥз. Толалтэ куасъёс вылэ султэ вал, ёрос ӵошатсконъёсы но пыриськылӥз. Нош атайзы, Кварсаысь СПТУ-ын дышетскыкуз, куасэн бызьылӥз республикаын но Россиын ортчылӥсь ӵошатсконъёсын.

Анай тужгес сюлмаськиз пиосыз сярысь: бубызы ӧвӧлысь урод сюрес вылэ гинэ медаз султэ. Уже кошкыкуз, вераса кельтылӥз, созэ, тазэ мед лэсьтозы шуыса. Алылӥз, ӝыт 10 часын одно ик дорын мед луозы. Одӥг пол Сашаез гуртэ шок-пуль вуиз. Быдэс сюресме бызьыса бертӥ, пе, озьы ке но 5 минутлы бероми.

Лекъяськыса ӧз будэты нылпиоссэ, жугемез но ӧвӧл. Сашалы гинэ, армиысь отпуске бертылыкуз, еэн сётэмез вань, шӧмаськыса вуэмысьтыз. Пиналъёсыз кылзӥськисесь будӥзы, мамазэс вӧсь каремзы ӧз поты, луоз. Ваньзы шор специальность басьтӥзы. Самой пичиез, Аня, вуоно арын дышетсконзэ быдтоз ни, тодон-валан люка Ижысь сиён-юон промышленностья лицейын. Мукетъёсыз ужало ни.

Э, коркае, коркае…
Людмила Павловналы нылпиоссэ ӝутыны юрттӥз мамаез но. Уло артэ, трос квартираем коркан. Сира Андреевналы улон инты та юртэ висъязы, ПМК-ын ужакуз. Но Гуменниковалэн туж потэ аслаз корказ улэмез. Весь вожъяськыса, учкисько, пе, мукетъёсыз шоры.

Улыны интыяськыкузы, корказы ву уг пыры вал, ньыль ар талэсь азьло гинэ гумыос кыскизы. Газ но корказы пыртымтэ, гурзэс пуэн эстыса, улӥзы. Озьы но коркан туж кезьыт возиськиз. Ярам, табере котельнойысь шуныт лыктэ, гур но кулэ ӧз луы ни.

Адямиос пуктӥсько, ойдо ас поннамы корка ӝутом, шуылӥз Людмила Павловна Володяезлы. Пиналъёс будӥзы ке, пуктом ай, пе. Кузпалызлэн киыз котьмалы мынэ вал уго, ужтэк кылемез бере но, муртъёслы лэсьтӥськыса, ветлӥз. Кулон азяз но корка липет лэсьтӥз вал, ватон нуналаз ӝынызэ ужам коньдонзэ сётӥллям, кылемзэ, пе, берло ваёмы. Но Гуменниковъёс сое ӧз адӟе ни.

Анай туж оске, Шарканын улӥсь Андрей пиез ӝутоз ик корка, весь патерын уз улэ ук. Кык нылпи будэтэмзы понна анай капитал но юрттоз. Тазалыксы гинэ мед луоз, шуэ. Нош Сашалы улон интызэ умоятыны ужез ласянь коньдон сертификат сётыны чаклало. Таизлэн но семьяез вань ни, одӥг пизы будэ.

— Улон интылы ёрмемысьтызы, пиналъёсылы шуисько: папады кулэм бере мон но, юись, калгись кышноос сямен, тӥледды интернатэ куштыса кельтысал ке, ваньдылэн квартираосты луысалзы ни. Али тросгес саклык висъяське юисьёслэн пиналъёссылы.

Туала вакытэ трос нылпиё семьяослы но пӧртэм юрттэт сётӥське: пуктӥськыны музъем висъяське, улон интыез умоятон ласянь но льготаос вань. Но Гуменниковъёс со радысь потӥзы ни. Соин но анайлэн сюлэмыз бӧрдэ. Ярам, нылпи будэтэмзэ гадьпусэн дунъязы.

Вожъяськонлэн синмыз лек
Мар ватонэз, пал кышноез куртчыны турттӥсьёс шедьылӥзы, вераськон но поттӥллям, юыны кутскем шуыса.

— Секыт адӟонэз кышноос но кудӥз уг чидало, юыны кутско. Соизлэсь Инмар мед утёз, — шуэ Людмила Павловна. — Мурт пиосмуртэн но вераськыны эн шедьты, соку ик калгись радэ пыртозы. Меӵак аслым но озьы верасьёс вал. Мужиксы вань вылысь, калгисьёсты уз адӟе, нош пал кылемъёс котьку кыл вылын. Котьмар мед вералозы, мон асме тодӥсько: пиналъёсме но, асме но кер уг поттыты.

Нылпиосызлы атайзы понна пенсия басьтэмысьтызы но вожъяськисьёс вал. Гуменниковъёслэн пенсизы 1 но ӝыны миллион манет луэ, пе. Со вакытэ коньдонлэн лыдыз миллионъёслы ӵошаз уго. Нош кызьы улӥськоды шуыса, юаны тодазы ӧз лыктылы.

Гуменниковалы шуг-секытъёсты вормыны юртто эшъёсыз но ужез. Шарканысь школа-интернатын со тырше ни куамын куинь арзэ. Бен, татын но сюлэм шуныттэ сётыны кулэ. Пиналъёс сое шӧдо, адӟиськыны вуыло, телефон пыр герӟасько. Тросэз асьсэос анай-атайёс ни.

Ачиз но Людмила Павловна улон-вылонзы сярысь юалляське. Кемаласьгес, пе, ӧй жингыръя ни Ува ёросын улӥсь Олялы, анай капиталэн пӧяськыны шедьыса, со шуг-секытэ вуэм. Аслаз анаез кулэм бере нылаш Людмила Павловнаез «мамка» шуэ вылэм.

Быдэ вуэм пиналъёс кузьымъёсын, сяськаосын вуо. Одӥгез пияш туж кема утчам сахартэк торт: Людмила Павловналэн диабет — ческытэз сиемез уг луы. Сыӵе сюлмаськон улыны но ужаны кужым сётэ.

Нош али вӧзаз улэ Маринаезлэн куать аресъем Никита пиез. Толалтэосы Людмила Павловна внукеныз ӵош куас сюрес вылэ пото. Улон азьланьтӥське.

Лия Малых

Удмурт Дунне
By Удмурт Дунне Май 17, 2013 10:53
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<