Бигер, башкир, удмурт, ӟуч, чуваш… Кӧня кылъёсты тодо Купчанай гуртын?

Удмурт Дунне
By Удмурт Дунне 21 мая, 2013 12:34

Бигер, башкир, удмурт, ӟуч, чуваш…  Кӧня кылъёсты тодо Купчанай гуртын?

«Зангари» ансамбль пыриськиз «Чакара» фестивале

«Зангари» ансамбль пыриськиз «Чакара» фестивале

Башкортостанын 22 сюрслэсь ятыр удмуртъёс уло. Тросгес тодӥськомы Татышлы, Калтасы, Янаул ёросъёсын улӥсь выжыосмес. Башкирилэн шундыпуксён палаз — Оренбург улос вӧзын — интыяськемын Ермекей ёрос. Отын вань удмурт Купчанай гурт.

— 500 пала удмуртъёс гуртамы. Вӧзамы башкир, чуваш, пор гуртъёс. Удмуртэз районамы одӥг гинэ. Калыкмы туж ӟун (узыр) улэ. Котькуд гидын трактор, косилка но мукет техниказы уань. Котькуд семьялэн бадӟым гектаръёсын музъемзы. Пиналъёсмы но туж ужасесь, — вера Ермекей ёросысь удмуртъёслэн национально-культурной центрзылэн кивалтӥсез Анастасия Важдаева.

Купчанайын кык этажъем юртын интыяськемын национально-культурной центрзы, вань школазы, медпунктсы, кемалась пыртэмын газ. Ваньмон дырзэ гурт калык шулдыр ортчытыны быгатэ. Арлыдоос ветло «Зангари» ансамбле. Удмуртие соослы ӵем вуылыны уг кылды. Нырысьсэ 1989-тӥ арын Иже вуылӥллям — Геннадий Корепанов-Камскийлэн юбилеяз. Соку ик соосты Удмурт радиое но ӧтчалям, плёнкае гожтыса кельтӥллям. Нош 24 ар ортчыса, нош ик кылдӥз Ижысь сцена вылэ потыны — купчанайёс «Чакара» фестивале пыриськизы.

Кин тодэ, оло, Ермекей ёросын арлыдоос гинэ удмурт кылын вераськысалзы на. Уго 1970-тӥ-1980-тӥ аръёсы гуртысь школаын удмурт кыллы дышетон радъямын ӧй вал ни. 80-тӥ аръёслэн пумазы камсьӧр удмуртъёс зол кариськизы. Озьы купчанайёс кык нылъёссэс Удмурт кун университетэ тодон-валан люканы ыстӥзы.

— Дышетсконмес йылпумъямы но, эше Удмуртие картлы кошкиз (бызиз), — тодаз вае Гуля Антонова. — Но мон Купчанае Удмуртиысь эшме вайи, соин одӥг школаын ужаны кутским. 1993-тӥ арысен школаямы удмурт кылэз выльысь улӟытӥм. Али удмурт кылъя урокъёсмы кулэсмизы. Куд-ог классъёсын 2 час висъяське, мукетаз 3 час но вань. Озьы ке но вань пиналъёс урокъёсы ветло. Куд-ог классъёсын ӟучомем пиналъёс тросгес — соку удмурт литература сярысь ӟуч кылын но верано луэ.

Нялтас вераса, Гуля Алексеевна ачиз удмурт кылъя но литературая тодон-валан школаын ӧз люка. Со понна табере 20 ар ӵоже яратоно предметсэ нуэ. Мылкыдзэ куашкатэ гуртысь пиналъёслэн ичи кылемзы. Али школае ог 60 пинал ветлэ. Мар луоз азьланяз — шуг вераны. Вылаз ик, югдур но арысь аре воштӥське — школае лыкто ӟучомем пиналъёс.

Нош национально-культурной центрлэн кивалтӥсез Анастасия Важдаева тодэ: ваньмыз та сюлмаськонъёс кылдо анай-атайёс бордысь.

— Нылпиосы тодо удмуртсэ но, ӟучсэ но, башкирзэ но, бигерзэ но, чувашсэ но. Ачим бигер кылын кырӟасько но. Нош Мордовие бызем нылы мокша кылэз но дышетӥз, — семьяосыныз данъяськон мылкыдзэ усьтэ Анастасия Николаевна.

Таӵе юн сямыныз Купчанайысь удмурт нылкышно азьланяз но паймытъяны, огъя уже ӝутканы мед быгатоз, соку гуртысьтызы удмуртъёс ӟучомонлы уз сётске.

Елена Скворцова
Туспуктӥз Ильтимир Байметов

Удмурт Дунне
By Удмурт Дунне 21 мая, 2013 12:34
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<