Чалмалы куноостэк мӧзмыт

Удмурт Дунне
By Удмурт Дунне Май 21, 2013 11:10

Чалмалы куноостэк мӧзмыт

Кизекгуртын куно пумитан

Кизекгуртын куно пумитан

Ачим мон киужлы усточи ӧвӧл, но котьку синмаськыса учкисько вуриськисьёс, пужыятскисьёс, чильпаськисьёс, куиськисьёс, керттӥськисьёс шоры.

Удмурт ужрадъёсысь соку ик синйылтӥсько яркытэсь удмурт дэремъёсты, айшетъёсты, кышетъёсты, уксё тӥрлыкъёсты. Газет бамъёсысь но шумпотыса учкисько удмурт дӥськутэн нылкышноос шоры.

Туж дунъясько удмурт ӵушконэз. Асьме улонамы со бадӟым инты басьтэ. Нылпиез черкын чукиндыремзы бере но ӵушконэн кутыны кулэ: нылэз — киросанаез, пиез — киросатаез. Егит кузпалъёсты но гожтӥськемзы бере анай-атайёссы пумитало ӵушконэ кутэм нянен.

Тодам лыктэ анаелэн скалмес нырысьсэ возь вылэ поттэмез. Ӟеч мед ветлоз но дорзэ мед шедьтоз шуыса, одно ик сылалэн нянен сюдылӥз, вӧсям вуэн пазялляз. Кирос карыса тыбыраз ӵушконэн йӧтскылӥз на.

Котьку ик тодам песятае Николай Кузьмич Борисов (Трокай Борисовлэн агаез). Сое кык пол кулаке поттылӥллям. Анаелэн верамезъя, соосыз, вить нылпиосыз, вылазы дӥськутэн гинэ кельтӥллям. Озьы ке но утьыны быгатӥллям песяелэсь куэм чалмаоссэ, шобретсэ, дӥсьсэ, самоварзэс. Иськавынъёссы доры лушкемен поттӥллям. Песяелэсь уксё тӥрлыксэ, чебер шортъёслэсь ӝуткаса куэм чалмазэ анае мыным сётӥз. Мон соосты туж утьыса возисько.

Пичи дыръямы, куно ӧтён азяз, анае коркамес ӵушконъёсын но чалмаосын чеберъялляз. Соосты ошылӥзы борддорысь кортӵогъёсы, туспуктэмъёсын рамкаос, синучкон борды. Рамкаосты песятае ас киыныз лэсьтылӥз но буялляз. Туала вакытэ коркась боддоръёсты тазьы уг чеберто ни, нош анае рамкаоссэ возе али но.

Кемалась ӧвӧл дорам куное вуылӥз киросапае Елена Николаевна Поторочина — анаелэн апаез. Возьматӥ солы чалмаез. Бам бордаз карыса, кема пукиз малпаськыса, пумен синкылиосыз васько. Киросапаелэн тодаз лыктӥз пинал дырыз, вордӥськем юртэз. Кема пуким соку вераськыса.

Пичи дыръяз солэн туж чебер кышетэз вылэм. Семьязэс кулаке поттэм бере анайзы, нылпиосыз сютэм медаз кулэ шуыса, кышетсэ вузам. Киросапае берло сое мурт йырысь адӟем. Анаелы шуисько, пе: мынам кадь ик кышетэз. Соиз соку ӧвӧл верам вузамзэ.

Песяелэн чалмаезлэн ортчем сюресэз кузь, со трос куноосты пумитамын. Пие тямыс ар ветлӥз Ижысь «Розовый слон» ансамбле. Одӥг аре шаерамы вуылӥз Венгриысь нылпи коллектив но ужбергатӥсьёс, тодматскизы асьме ансамблен. Соосты колды нянен пумитаны сандыкысьтым нош ик поттӥ песяелэсь чалмазэ.

2004-тӥ арын оштолэзе шаерамы вуылӥз Венгриысь Будапешт университетысь тодосчи Петер Домокош. Удмурт кун университетын ужасьёс ӵектӥзы солы Трофим Кузьмич Борисовлэн вордскем гуртаз вуылыны. Петер Домокош ачиз но уго трос гожъяз Трокай агаймы сярысь. Соин ӵош Кизекгуртэ вуылӥзы университетысь тодосчиос Любовь Петровна Фёдорова но Светлана Тимофеевна Арекеева.

Дуно куноосты асьсэ дорын пумитазы Раиса Ивановна но Кузьма Трофимович Борисовъёс (Кузьма — Трокайлэн Максим агаезлэн пиезлэн пиез). Анайзылэн сандыкысьтыз поттӥзы тужгес чеберзэ но яркытсэ чалмазэ. Куноосты удмурт сям-йылолъёсъя пумитазы: чалма вылын чечыен, нянен. Анае Екатерина Николаевна Чернова но пӧлазы вал.

Венгер тодосчи туж синмаськем чалмалы, кияз кутыса ик, учкем удмурт пужыосты. Ӝӧк вылысь вань удмурт сиёнъёсты веръям. Тужгес но кельшем гур азьын пыжем пӧсь табань зыретэн. Удмурт сиёнъёс пӧлысь табань кадь ческытсэ веръяме ӧй вал, пе. Петер Домокош трос юалляськем Трокай агаймы сярысь, тунсыкъяськем удмурт сям-йылолъёсын.

2010-тӥ арын гуртамы вуылӥз мукетыз венгер куно — Жужа Шаланки асьме тодосчиен Людмила Евгеньевна Кирилловаен џош. Анаеным куать час пала вераськыса пукиллям, со уго выжымы сярысь туж трос тодэ. Атаез котькуд пырисьлы вералля вылэм Троша выныз сярысь. Ваньмыз со анаелэн йыраз кылем.

Кӧня куноосты, егит кузпалъёсты пумитаз ини песяелэн чалмаез. Оскисько, со азьланяз но удмуртлыкмес утёз ай.

Раиса Корепанова. Ижкар

Удмурт Дунне
By Удмурт Дунне Май 21, 2013 11:10
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<