«Кучыранлы» мӧзмыт медаз лу

Удмурт Дунне
By Удмурт Дунне 28 мая, 2013 11:02

«Кучыранлы» мӧзмыт медаз лу

Азиза Курбанова

Азиза Курбанова

Туала арын нокинэ но уд ни паймыты, кык пӧртэм выжыысь егитъёс семья кылдыто ке. Нош вир сураськон луэ ке, нылпиос но паймымонэсь будо. Ӵапак тазьы шуыны луоз 20 аресъем Азиза Курбанова сярысь. Азиза — егит журналист, дышетске Удмурт кун университетын. Вордскем интыез — Кияса ёросысь Уддяди гурт. Анаез — удмурт, атаез — таджик.

— Тон пушкын кык турлы вир бызе. «Кыӵе выжыысь тон?» шуыса юасьёс трос-а?

— Выжыез, пе, бубыя учко. Соин ик таджик, шуисько. Нош бигер карыны кутско ке, асме удмурт шуисько, адямиослэн синъёссы соку кымесазы тубо. Сямыя мон копак атае кадь. Пуш дуннее но тупа Шундыӝужан палан (Востокын) улӥсьёслы. Нош мылкыды эрикез быръе. Мар ке сюлмам кельшиз ке, нокинлэсь кылэм-адӟем уг кары, ачимъя бералто. Вылаз ик, котькинэн споръяськыны вырисько.

— Атаед но анаед кызьы тодматскиллям?

— Анае Омскын ветеринарной институтын дышетске вылэм, нош атае соку армиын службазэ ортчем. Со анаелы сокем синмаськем — сьӧраз лыктыны дась луэм. Анае, дышетсконзэ йылпумъяса, гуртаз бертэм, нош ӝыны ар ортчыса, атае но лыктэм. Туж, пе, модной — тӧдьы джинсэн, кроссовкиосын. Бусыын йыромем, зор улэ пачкам, воксё дэриесь вуэм. Озьы куамын ар татын улэ ини. Анае но атае куинь нылпи будэтӥзы. Мон пичиез, агайлэн но апайлэн асьсэлэн семьяоссы вань ини.

— Вань-а вуылэмед атаедлэд вордскем палъёсаз?

— Дышетсконме быдтыса, ветлыны малпасько. Таджикистанын монэ тодо. Атай ласянь родняосмы куное лыкто ке, ваньзы шумпото: песянаедлы, пе, кельшиськод. Соин весь Таджикистанэ чорто. Туж мынысал, но дышетсконэн йырин уггес пӧрмы. Эшшо кышкасько, асьсэ пилы бызьытозы шуыса. Али, пе, ныллэсь мылкыдзэ юатэк, отын уг ни басьто, озьы ке но кин тодэ.

— Тусыдъя тонэ удмурт уд шуы, соин валче олокыӵе но тумошо учыръёс луо, дыр.

— Соиз озьы. Удмурт кылын вераськемме кылыкузы, тросэз паймо. Огпол ветлӥ ӵужанае доры куное — Кияса ёросысь Калашуре. Тодматски гуртысь пиналъёсын, нош соос малпазы, удмурт кылэз уг валаськы шуыса. Озьы куинь нунал куспын умойзэ но, аламазэ но кылӥ ачим сярысь. Куинетӥ ӝытаз юри поттӥ удмурт кылме. Сыӵе маскара вал: кин гордэктӥз, кин куатаськиз, кин гор серектӥз.

— Нош таджик кылэз дышетӥд-а?

— Кӧня ке кыл гинэ тодӥсько. Пичи дырысеным ик, кык кыллы дышыса, будӥ: анаен удмурт вераським, атаен — ӟуч. Соин кыӵе кылын вазё — озьы ик пумитазы верасько. Малпаськисько но кык кылын ик. Школаын немец кылэз дышетӥ, али ас поннам англи кылэз дышетӥсько. Городын улыса, удмурт кылын вераськисько эшъёсыным.

— Туала арын тросэз студентъёс дышетскон вакытазы ик уже интыясько. Тон но соослэсь бере уд кылиськы.

— Озьы. Ужаны дышетскисько, собере, кисые пырем коньдон но нокинлы ӧз на люкеты. Ужасько «Купол» заводлэн радиояз. Татчы интыяськемелэн мугез уксёен чик герӟаськемын ӧй вал. Кыкетӥ сменае дышетскыны кутским. «Кучыран» луэменым йырин уйёсы иземысь дугдӥ: компьютер, Интернет. Ӵукна пал выдӥськод, собере нуназеозь изиськод. Сыӵе дыръя дышетскыны но мыл уг пот ни, нунал но шаплы ортче. Акыльтӥз сыӵе улон. Университетын, ялонэз адӟи: радиое но газетэ корреспондент кулэ, пе. Кыл быдтыны яратӥсько бере, куриськи радиое. Табере котькуд ӵукна 7 часын ужаны бызисько ни. Ивор утчасько, заводын ужасьёсын тодматскисько, интервью басьтӥсько, бӧрысь сое эфире сётымон карисько. Иворъёсты куараен гожтыса кельтӥсько, кыӵе ке передача радъясько. Уже сыӵе кельше, куддыръя коммунизме вуэм кадь но потӥсько. Завод — со кыӵе ке пичи город кадь, отчы пыриськод ке, мукет интые сюриськод кадь. Отын зол дисциплина, мар ке лэсьтыны куриськод ке, ваньзэ рос-прос быдэстозы. Заводысь радиоын но удмурт кылэз уг вунэтӥськы. Ӵемысь dj Электроникъёслэсь кырӟанъёссэс лэзьясько, Удмурт театрын мынӥсь спектакльёслы реклама сётӥсько.

Оля Васильева

Удмурт Дунне
By Удмурт Дунне 28 мая, 2013 11:02
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<