Керпотӥсь вормись

Удмурт Дунне
By Удмурт Дунне 28 мая, 2013 10:45

Керпотӥсь вормись

Люба Широбоковалэсь горд дэремзэ возьматэ Настя Петрова

Люба Широбоковалэсь горд дэремзэ возьматэ Настя Петрова

19-тӥ-20-тӥ оштолэзе Пермьын модая «Горд дэрем» калыккуспо фестиваль ортчиз. Удмуртиысь та вожвылъяськонэ пыриськизы 4 нылашъёс-дизайнеръёс. Вормонэн огез гинэ берытскиз — Люба Широбокова.

— Люба, кытысь тон таӵе кибашлы, маин выриськод?

— Мон вордски Якшур-Бӧдья ёросысь Кекоран черкогуртын. Али дышетскисько Удмурт кун университетысь Искусствоосъя но дизайнъя институтын.

— Кытысь малпан лыктӥз «Горд дэрем» фестивале пыриськыны?

— Огпол институтысьтымы дышетӥсьмы шуиз: нылъёс, ойдолэ кыӵе ке вожвылъяськон сярысь ивор утчалом. Шедьтӥм тазэ, дэремъёс вурон борды басьтӥським. Куд-огез ӵош дышетскись эшъёсы та малпанлэсь соку ик куштӥськизы, мукет уж борды кутскизы. Нош мыным тунсыко вал учкыны, мар пӧрмоз.

— Фестивальын трос пӧртэм номинациос вал, тон кудаз пыриськид?

— Мон «Царица» номинациын куинетӥ инты басьтӥ. Дэреме сӥземын вал ӟуч эксэй кышнолы Александра Фёдоровна Романовалы. Огъя кылдытэм образэ «Дун-чылкыт» нимаськиз.

— Дэремдэ кема-а вурид? Учкисько ке, туж трос векчи, ӝег ужез.

— Уг ни тодӥськы, кӧня дыр ӵоже быдэстӥ, но дуръёссэ одӥг но ӝыны нунал куспын пужъятӥ. Дышетӥсе ужме чаклаз, юрттӥськиз. Кылсярысь, дэремлэн азяз мае ке пужъятоно шуыса, со вераз. Отчы вашкала туспуктэмъёс поттӥ, соосты юри дэра вылын печатлай. Татчыозь тазьы карыны луэ шуыса, ачим но уг тодӥськы вал.

— Зэмзэ ке, та горд дэремедлы синмаськыса быри ни! Трос-а коньдон басмалы кошкиз?

— Куинь ар ӵоже Ижкарын улытозям, мон тодӥсько ни, кытысь дунтэм но чебер басмаос шедьтыны луэ. Оглом дэремме учконо ке, чеспыриослы (весьёслы) мон тросгес коньдон быдтӥ.

— Дышетӥсед сяна, кин ке юрттӥз на-а?

— Анае туж юрттӥз. Пужъятонме но со йылпумъяз. Солы сяна, та ужез нокинлы ӧй оскысал. Анае ик Якшур-Бӧдьялась горд чиньыё пӧзьёсты басьтӥз, аслам утчаськыны дыры ӧй вал ни. Туфлиосты но дунтэмен басьтӥ но акрил краскаен буяй. Пӧрмиз огъя образлы тупась зарни буёл.

— Эшъёсыд но семьяед вормемед пумысен мар шуо?

— Огез эше куриз ни солы горд дэрем вурыны… Анае монэ эшшо но паймытӥз: бертыса ӧй вуы на, нош со 3-тӥ интые сярысь вотэсысь утчаськыса тодэм ни. Со ик берло «ВКонтакте» бамам туспуктэмъёслэсь вуэмзэс чакласа улӥз. Но тужгес но выны шумпотӥз кадь. Вормемелы сокем ӧз куаны, дыр, кызьы калыке потэмелы. Нокытчы ветлымтэысьтым, ялан монэ куаретэ. Зэм но, мон, школаын дышетскыкум, Кунгур мугырке гинэ потай, солэсь кыдёке нокытчы вуылэме ӧвӧл.

— Азьланезлы кыӵе малпанъёсыд? Вань-а мылкыдыд коллекция кылдытыны?

— Уг тодӥськы. Мон керпотӥсь туж. Та ужрад бере ӵошатсконъёсы пыриськыны мылкыды ӝутскиз ик. Нош ас коллекциме мон лэсьтыны кутски вал ини, но дыр ӧвӧлэн дугдӥ. Озьы ик кылле со ӝыныё-урдсо. Кин тодэ, дышетсконме быдтӥ ке, оло, быдэсто сое.

— Сыӵе кибашлы но сыӵе керпотӥсь! Вормись луыса но возьдаськонэд ӧз ышы шат?

— Школаын дышетскыкум, таӵе возьдаськись ӧй вал кадь. Пӧртэм ужрадъёсы мылысь-кыдысь пыриськылӥ. Нош огпол сцена вылын кылъёсме вунэтӥ, сыӵе возьыт луиз. Тӥни собере ик керпотэмысь ӧй дугдылы ни.

Лукерья Шихова

Туспуктэмез: udmfoto.ru

Удмурт Дунне
By Удмурт Дунне 28 мая, 2013 10:45
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<