Юбер вераське удмурт сямен

Удмурт Дунне
By Удмурт Дунне 21 мая, 2013 12:27

Кылем толэзе Ижкарын «Трос кылъемлыко улосын анай кылэз дышетон» V калыккуспо конференция ортчиз. Анай кыллы дышетон амалъёссэс возьматӥзы Удмуртиысь, Пермь улосвылысь, Комиысь нылпи садъёсын ужасьёс.

Ки миськыны, пуньы кутыны…
Ужрадэ пыриськемъёс нырысь ик вуылӥзы республикаысьтымы Кузебай Герд нимо гимназиысь нылпи садъёсы, тодматскизы соослэн ужан амалъёсынызы. Гимназиысь нылпиос анай кылэз нимаз занятиосын гинэ уг кыло, соослы удмурт кыл пыӵа пӧртэм ужрадъёсын но нунал ӵоже шудонъёсын. Удмурт кылэз поттыло сиськыкузы, ки миськыкузы, ульчаын поръякузы но мукет. Пусйыны кулэ, та гимназия Удмуртиысь Дышетӥсьёслэсь тодон-валанзэс будэтонъя институтлэн экспериментальной площадкаез луэ. Нылпи садын анай кыллы дышетон радъямын институтысь доцентлэн, педагогика наукаосъя кандидатлэн Роза Аркадьевна Кузнецовалэн кивалтэмез улсын. Та ӵош ужанлэсь ӟеч емышъёссэ вылӥ дунъязы ужрадэ пыриськемъёс. Сыктывкарысь педагогика наукаосъя кандидат З. Остапова пусйиз нылпиослэсь анай кылын ӟеч вераськемзэс, гимназиысь воспитательёслэсь ог-огзэс валаса ужамзэс. Пермь улосысь нылпи садъёсысь ужасьёс но паймемзэс ӧз ватэ, асьме нылпиослэсь удмуртлык пӧлын будэмзэс, визь-нод люкамзэс адӟыса.

Пӧртэм улосъёсысь лыктэмъёс та площадкаосын асьсэлэсь ужан опытсэс нимаз дасям видеоадӟытонъёс но докладъёс пыр усьтӥзы. Палэнэ ӧз кыле Удмуртиысь воспитательёс но. Балезино но Эгра каргуртъёсысь, Ува ёросысь Узей-Тукля, Дэри ёросысь Ягул гуртъёсысь, Вавож черкогуртысь нылпи садъёсысь нылпиос ӝыны ар ӵоже удмурт кылэз эксперимент чот дышето ни. Со озьы ик радъяське Р. Кузнецовалэн кивалтэмез улсын. Отысь воспитательёс нырысетӥ емышъёсынызы тодматӥзы. Со сяна, этнокультурной компонентэз ужазы пыртыны быгатэмзэс возьматӥзы Вотка карысь, Дэбес черкогуртысь нылпи садъёсын ужасьёс.

Пермь улосысь Кудымкарысь, Кочёво ёросысь нылпи садъёсысь ужасьёс люкаськемъёсты тодматӥзы коми-пермякъёслэн культураенызы но кылынызы. Жаляса верано, коми-пермякъёслэн кунлыксэс ыштэмзы бере анай кылзэс утён луонлыкъёссы сюбегазы. Коми Элькунысь Сыктывкарысь, Усть-Кулом черкогуртысь нылпи садъёслэн кивалтӥсьёссы но коми кыллы дышетон амалъёсынызы тодматӥзы.

Ужан опытэныз люкаськемъёсты тодматӥз шаерысьтымы «Удмурт нылкышно кенеш» но. Н. Степанова, кенешлэн тӧроез, мылысь-кыдысь пыриськиз семинарлэн ужаз, нылкышно огазеяськонлэсь нылпиосын но анай-атайёсын ужан амалъёссэ возьматӥз.

Кунгожсьӧръёслэн ӟырданзы
Та нуналэ ик Италиысь но Финляндиысь кыккылъемлыкез (билингвизмез) эскерись тодосчиосын видеоконференция радъямын вал.

Кык кылын вераськонлэсь ӟеч палъёссэ шараяса, вераськиз Римысь «Русское слово» школаысь ӟуч кыллы дышетӥсь, философия наукаосъя доктор Лариса Широбокова-Монако. Анай кылэз утёнлэн кулэлыкез сярысь ӟырдыт вераськиз Янне Саарикиви, Хельсинки университетысь профессор. Тодосчи ивортӥз Россиысь пичи калыкъёслэсь кылъёссэс утёнлы сӥзем книга сярысь. Та книгаез Яннелы гожтыны юрттӥллям фин эшез Анника Пасанен но удмурт тодосчи Константин Замятин. Сое «кыскыны» луоз та ссылкая: http://blogs.helsinki.fi/minor-eurus/files/2012/12/kakizachem1.pdf

Сюлэмез бугыртӥз Хельсинки университетысь философия наукаосъя доктор Светлана Едыгарова-Мантель. Со Удмурт шаерлэсь палэнын ке но улэ, пичи пиеныз — Юберен — удмурт кылын вераське. Макем шонер, макем кулэ вераськонэз ӝутӥз Хельсинкиысь удмурт эшмы!

Татьяна Волкова
Дышетӥсьёслэсь тодон-валанзэс будэтонъя институтысь доцент
Туспуктӥз Владимир Беломорских

Удмурт Дунне
By Удмурт Дунне 21 мая, 2013 12:27
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<