Яратоно кылы — «потэ»

Удмурт Дунне
By Удмурт Дунне 28 мая, 2013 10:55

Яратоно кылы — «потэ»

Татьяна Тихонова

Татьяна Тихонова

Таня Тихонова вордӥськиз Алнаш ёросысь Улын Сыръезь гуртын. Огшоры гуртысь нылаш «Чипчирганэ» ветлэ, киужен выре, крезьгур тӥрлыклы сӥзем ӝытъёс радъялля.

Нылаш понна крезьгур — со сюлэмез буйгатон, карлэн бызись улонэзлэсь шутэтскон.

— Сиськыкум но, ужакум но, поръякум но — весяк кырӟасько. Соин ик апае мыным «Чипчирган» ансамбле мыныны дэмлаз. Тани али нылъёслэн кырӟамзы потэ ке, Таня, ойдо кутскы, шуо. Собере гинэ ваньмылэн куараосмы одӥг гуре кисьтӥсько. Сыӵе дыръёсы, вань сюлэмме поныса, кырӟасько, номыр но кулэ ӧвӧл ни, — шуэ Таня.

Нылашлэн туж потэ вал крезьгуро инструментъёсын шудэмез. Одӥг нуналэ со ялон адӟиз. Кыӵе шумпотон: табере со крезьгур тӥрлыкен шудыны гинэ уз дышетскы, со аслыз ачиз крезь лэсьтоз! Озьы Таня Сергей Капустинлэн крезь лэсьтонъя мастерскояз сюриз.

Кырӟаны но эктыны яратэ ке, малы Таня крезьгурен герӟаськем профессия ӧз бырйы? Удмурт кун университетысь педагогикая, психологияя но информационной технологиосъя институтэ йыгаськиз бак сузэрезлы юрттон понна. Таня университетын ньылетӥ арзэ дышетске ини. Гужем «Друзья» студенческой отрядын вожатой луыса ужа. Нош толалтэзэ туж мӧзме нылпиослэсь. Лагерьын солы аспӧртэмлыко тетрадь нуыны дэмлаллям.

— Гожтӥськод тетраде 50 малпан: мае азьланяз лэсьтыны медӥськод. Одӥгез быдэсмиз ке, ӵушиськод, интыяз мукетсэ гожтӥськод. Озьы тынад тетрадяд котьку 50 малпан луоз. Воксё ке, мынам самой яратоно кылы — со «ПОТЭ». Потӥз но — крезь лэсьтӥ, потӥз — кофта керттӥ. Азяд ужпум пуктӥськод но сое быдэстыны турттӥськод, — шуэ Таня.

Танялэн киросэн пужъятэм вылбамъёсыз котькуд книгаез аспӧртэм, син шоры йӧтымон каро. Нош ас киыныз вурем дукесэз мынэсьтым но вуриськыны мылкыдме ӝутӥз.

— Малы мон дӥськут вурисько? — шуэ нылаш. — Тани вуз карон юртысь кофта басьтӥськод, университетэтӥ ортчиськод, адӟиськод: тынад кадь ик дӥсь мукетыз вылын пуке. Мынам озьы уг поты. Мон малпамъя, адями быдэсак ассэ ачиз сюдыны-дӥсяны быгатыны кулэ. Таиз но соиз уг пӧрмы шуыса пукид ке, зэмзэ ик номыр но уд пӧрмыты. Соин ик ужано ас бордад.

Таня ас бордаз ужа. Али «Перепечкин» кафеын кубызлы сӥзем ужрад радъяз. Крезьгуро инструмент сярысь пыр-поч тодэм сяна, люкаськем калык выйиз шуныт, либыт дуннее. Ӝытэ вуэмъёс эктӥзы но, кырӟазы но, шудӥзы но. Азьланяз Таня видео-артлы но арганлы сӥзем ӝыт ортчытыны турттэ.

Мария Векшина

Туспуктӥз Евгений Бикузин

Удмурт Дунне
By Удмурт Дунне 28 мая, 2013 10:55
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<