Геройёсыз — эшъёсыз

Удмурт Дунне
By Удмурт Дунне Май 31, 2013 11:59
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Геройёсыз — эшъёсыз

К. Ломагин кузпалэныз

К. Ломагин кузпалэныз

24-тӥ мае 80 арес тырмонзэ пусйысал Удмуртиысь калык писатель, «Удмурт дуннеын» ужам журналист Кирилл Ломагин. Жаляса верано, со асьме пӧлын быдэс арзэ ӧвӧл ни.

Писателез буре вайыны Пичи Пурга ёрос библиотекае уно калык люкаськылӥз. Писательлэн туспуктэмъёсыныз, книгаосыныз но журнал-газетъёсын печатласькем ужъёсыныз тунсыко выставка лэсьтэмын вал.

Юбилярез шуныт кылъёсын тодазы вайизы Пичи Пурга ёрос йырлэн воштӥсез Валентина Петрова, «Удмурт Кенеш» огазеяськонлэн Пичи Пургаысь ёзэныз кивалтӥсь Василий Москвин. Кирилл Ломагинлэн кылбуръёсызъя чебересь кырӟанъёсты быдэстӥзы вордӥськем Бӧдья-Пуро гуртысьтыз дышетӥсьёс. Гуртысь нылкышноос мадизы, макем Кирилл Егорович вордӥськем палъёссэ яратӥз, аспал калыкеныз данъяськиз. Тросэз произведениосыз эшъёсызлы но тодмоосызлы луыса, пе, кылдэмын.

Озьы ик ӝытэ мыло-кыдо пыриськиз Баграш-Бигра гуртысь арлыдоослэн «Ӝыт тылъёс» ансамбльзы. Соос кема аръёс ӵоже ӟеч кусып возизы Кирилл Егоровичен.

— Кирилл Егорович, выль книгаез потэ ке, ми доры шумпотыса лыктэ вал ини, — вера азьло аръёсы Баграш-Бигра гуртысь библиотекаен кивалтэм Анастасия Николаева. — Ми, огинэ люкаськыса, книгалэн пуштросэз сярысь кенешыса, пукылӥмы. Озьы пуконъямы, дыр, «Ӝыт тылъёс» ансамбльмы но кылдӥз.

Удмуртиысь Писательёслэн огазеяськонзылэн тӧроез Егор Загребин, «Кизили» журналысь Ульфат Бадретдинов но Алексей Ельцов, «Удмурт дунне» газетысь Любовь Тихонова, кылбурчи но бард Владимир Возняков Кирилл Егоровичен герӟаськем учыръёссэс мадизы.

Кирилл Егорович вань улонзэ сӥзиз «Советской Удмуртия» газетлы. Нырысь гурт удысъя отделэн кивалтӥз, отӥяз — литературая отделэн. Газет баме материалъёс люкан понна уно потаз командировкаосы. Трос гожъяз усто адямиос сярысь очеркъёс но зарисовкаос. Уйёссэ кӧлатэк поталляз, дыр, веросъёссэ но повестьёссэ гожъяллякуз. Озьы лыдӟись кие вуизы «Котьку сюлэмын» романэз, «Ӟыгыръя киосыд вань дыръя» повестез но мукет ужъёсыз. 2002-тӥ арын «Мон ке пӧсь шокчи…» кылбур бичетэз потӥз. Кирилл Егоровичлэсь крезьгурчиос кылбур чуръёссэ синйылтӥзы, чебересь кырӟанъёс гожтӥзы. Тросэз соос сюлэмез вырӟыто, уката ик «Тонтэк кин-о мон?» кырӟан.

К. Ломагин трос саклык висъялляз гожъяськыны кутскись егитъёслы.

— Кирилл Егорович мыным, Удмурт кун университет бере Башкириысь одӥгаз гуртысь школаын ужась муртлы, гожтэт келям: ойдо, пе, ми доры ужаны, — писателен герӟаськем учырзэ тодаз вае Ульфат Бадретдинов. — Солы луыса мон редакцие вуи, корреспондент луи. Со котьку но егитъёслы юрттыны дась вал, адямиосын уродъяськыса улэмзэ ӧй тодылы.

Кирилл Егорович лякыт, востэм сямо вал ке но, аслаз быгатонлыкеныз но визьмыныз Кузебай Герд нимо премилэн лауреатэз луиз. Удмуртиысь культура удысысь дано ужась, пусъемын Эшъяськон орденэн.

Буре ваён ӝытын озьы ик вераськиз Кирилл Егоровичлэн героезлэн Иван Очеев партизанлэн Анатолий пиез. Со синвуаськыса тодаз вайиз писательлэсь атаеныз кенешыса пукылэмзэс.

Люкаськем калык одӥг кылэ вуиз: Бӧдья-Пуроысь ошмеслы Кирилл Егоровичлэсь нимзэ сётоно.

Любовь Тихонова

Удмурт Дунне
By Удмурт Дунне Май 31, 2013 11:59
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<