Етӥн — со дӥсь, вӧй, эмъюм…

Удмурт Дунне
By Удмурт Дунне 6 мая, 2013 10:30
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Етӥн — со дӥсь, вӧй, эмъюм…

etin

Зураысь «Лён-сервис» предприятиын етӥн кужлэсь сӥньыс потто

Вань-а етӥн будэтонлэн азьпал сюресэз? Ма лэсьтоно та удысэз выльысь улӟытон понна? Та ужпумъёс эскеремын Эгра ёросысь Зура черкогуртысь «Лён-сервис» предприятиын ортчем кенешын. Правительстволэн Тӧроезлэн воштӥсез Александр Коробейников люкалляз етӥнэн ужась ёросъёслэсь йыръёссэс, етӥн заводъёслэсь но сое будэтӥсь хозяйствоослэсь кивалтӥсьёссэс.

Удмуртилэн пусэз

А. Коробейников ивортэмъя, етӥн бусыос Удмуртиын бадӟымесь ӧвӧл ке но (2012-тӥ арын 6 сюрс 240 гектар вал), асьмеос сое будэтонъя но етӥн куро дасянъя Россиын нырысетӥ интыосын луиськом.

Удмуртиын быгато етӥнэз кизьыны но, будэтыны но, утялтыны но. Но вуз лэсьтыны яке сое туж вылӥ ӟечлыко сэстыны умгес пӧрмытӥське. Таин сэрен вузан дуныз ичи. Нош али, етӥн удысэз ӝутонъя программа ужаны кутскем дырысен, арысь аре маке но вылез кылдытӥське. Нырысь заводъёсмы кузь етӥн куролэсь ӟеч куж дасяны дышизы, собере — вакчиезлэсь. Кемалась ик ӧвӧл Шарканысь завод поттыны кутскиз етӥн ватин. Лэсьтӥськонын со туж ӵем кутӥське, соин ик уг кылльы, асьме шаерысь предприятиосы ик ваньмыз мынэ.

Нош Зураысь «Лён-сервис» предприятие али гинэ кутскиз етӥн кужлэсь сӥньыс поттыны но бугоре биньыны. Татын ик вакчи куролэсь куж сэсто. Со туж небыт. Cпециалистъёс оскытэмъя, солэсь, пе, носки но керттыны луэ. Нош Удмуртиын 90 процентэз куж поттӥське вакчи етӥн куролэсь. Та производствоез ик возьматыны кивалтћсьёс люкамын вал «Лён-сервис» предприятие.

Александр Коробейников осконзэ вераз, етӥн будэтӥсьёслы но заводъёслы юрттэт федерация ласянь но луоз шуыса. Али Россилэн аслаз хлопокез ӧвӧл, Обороная министерство кулэяське етӥн вузъёслы, угось етӥнлэсь дӥсь, лэсьтӥськон материалъёс сяна, поттыны луэ на ватаез воштӥсь котонин, дары. Етӥн сэстэм бере кылем-мылемъёс туж усто удобрение, эстӥськон луо. Соос номырин урод ӧвӧл гыбедлэсь. Нош етӥн вӧез вашкала дырысен ушъяло тазалыкез юнматэмез понна.

Дуно маке дуноен сётӥське…

Огшоры гинэ кадь: етӥнэз кизь, утялты, вуза но табыш потты. Вашкала дыръя озьы ик вал, дыр. Удмуртиын но ас вакытаз куд-ог хозяйствоос миллионер луылӥзы. Нош али та будосэн ужало на туж мылкыдоос гинэ.

— Тужгес но сюлмаськыто дунъёс, — шуэ гурт удысъя но сиён-юонъя министерствоысь валтӥсь специалист Лариса Печникова. — Етӥн кужлэн асдуныз трослы вылӥын сое вузан дунлэсь. Мугез — вужмемын но куашкан калэ вуэмын транспорт но заводъёсысь тӥрлык. Нош та культураез будэтон понна нимысьтыз оборудование кулэ. Соин сэрен гурт хозяйствоос но етӥн заводъёс кизёнын но утялтонын ӵем дыръя куто ю тысен ужан техникаез. Озьы трос ыштонъёс луо, сӧриське технология. Туннэ етӥн будэтӥсьёс ужало 1970-тӥ-1980-тӥ аръёсы поттэм машинаосын. Выльзэ басьтыны коньдон ӧвӧл, асьме кунын сыӵе техника но уг поттӥськы.

Мукетыз лэчыт ужпум — етӥн заводъёслэн асьсэлэн музъемъёссы ӧвӧл. Сое хозяйствоослэсь арендае басьто. Нош етӥнэз будэтыны луэ, бусыосты вошъяса гинэ. Озьы ужаны луэ бадӟым музъемын. Одӥг бусыысь мукетаз выжон понна я огеныз гурт предприятиен, я мукетэныз огкыл тупатоно луэ.

Соин ик ортчем кенешысен Александр Коробейников етӥн будэтӥсь хозяйствоослы вазиськиз, заводъёслы кызьы ке но юрттыны курыса.

Кун ласянь юрттэт висъяськемен, етӥнлы синмаськисьёс вань ни. Вылаз ик, етӥн бӧрсьы туж ӟеч будо мукет культураос, тужгес ик юос. Ю тысь сыӵе бусыын 15 процентлы тросгес урожай сётэ. Сое лыдэ басьтыса, Кез ёросысь «Труженик» СПК етӥнзэ кылем арын 100 гектарозь вуттӥз. Паськытатӥзы етӥн бусызэс Сьӧлта ёросысь «Звезда» гурт предприятиын. «Звездалэн» кивалтӥсез Владимир Блинов шумпотэмзэ серемпыр вераз. Етӥн будэтон, пе, бадӟым ыштонъёс вайиз, нош кун ласянь юрттэт вуыса, 900 сюрс манет тыр пайдаен берытскиз.

Кылем арозь кун ласянь юрттэт вуэ вал сылало ватсэтъёслы но кизер эстӥськонлы быдтэм уксёез берыктон понна. Со сяна, «Удмурт Республикаысь етӥн комплексэз 2010-тӥ-2014-тӥ аръёсы азинтон сярысь» программая 1 тонна етӥн кужлы, шуом, 2012-тӥ арын 2 сюрс 455 манет висъяськиз. Юрттэт вуиз на Россилэн бюджетысьтыз — етӥн кужлы котькуд тоннаезлы 6 сюрс манет. Таин ӵош ик бадӟым коньдон кулэ на вылэм заводъёсысь тӥрлыкез воштон понна. Та ласянь юрттэт ӧвӧл на. Но гурт удысъя но сиён-юонъя министрлэн воштӥсез Аркадий Малков оскытӥз: юрттэт луоз, но со понна ӧвӧл кулэстоно етӥн бусыосты, ужано ӟечлык бордын.

Туэ дырлы етӥн будэтыны бадӟым луонлык сётӥське. Со юослэсь но дуногес лыдъяське. Туэ субсидиос висъясько, котькуд гектар музъемлэсь удалтонлыксэ чакласа. Озьы етӥнлы куинь поллы тросгес субсидиос вуозы. Туэ тулыс кизьыны кидыс тырмыт дасямын.

Кутсконын

Зураысь «Лён-сервис» предприятилэн кивалтӥсез Николай Овсянников ивортэмъя, ар талэсь азьло заводын выль проект борды басьтӥськизы. Костромаысь басьтӥзы куиськон машина. Со быгатэ кузь етӥн кужез бугоре биньыны. Озьы Зураын сӥньыс поттыны кутскизы. Зэм, али со нунылэн нырысь вамышъёсыз кадь гинэ адӟиське, но та сӥньысез курисьёс вань ни. Ваньмыз умой луиз ке, та сӥньыслэсь дӥсь вурыны кутскоз «Шаркан-трикотаж» фабрика но.

Матысь дыре Удмуртия чакла поттыны асьме понна чылкак выль вуз — котонин. Вань ни мукет малпанъёс но.

Иван Аркашев
Туспуктӥз Константин Семёнов

Удмурт Дунне
By Удмурт Дунне 6 мая, 2013 10:30