Азвесь дуно вылымтэ…

Удмурт Дунне
By Удмурт Дунне 11 мая, 2013 22:48
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Азвесь дуно вылымтэ…

Пичи Пурга ёросысь Д. Ерохиналы 100 арес тырмиз

Пичи Пурга ёросысь Д. Ерохиналы 100 арес тырмиз

Пичи Пурга ёросысь Орлой гуртысь Дария Дмитриевна Ерохиналы 14-тӥ мартэ 100 арес тырмиз. Революция но Быдӟым ож пыр потэм нылкышнолэн 6 нылпиосыз, ваньмыз-ӧвӧлэз 63 пушъетъёсыз.

Капкаез усьтӥ гинэ но, шорам утыса пичи гинэ сьӧд пуштрес гоно пуны лыктэ. Корказе пырон дорысь ӟус вылын удмурт дӥсен нылкышно пуке. Пыре, пыре, эн кышкалэ, со уг куртчылӥськы, шуэ.

Дораз матэгес кариськи но шуисько: мыным Дарья апай кулэ вал.

— Ма, мон та, мон, — серекъяса шорам учке нылкышно.

Синъёсылы уг оскиськы, ма, мыным 100 арес тырмем песянайды кулэ вал, шуисько нош ик.

Ма, кызьы, пе, вералом на, мон та, мон. Песянай шоры учкыса, озьы ик ас синъёсылы ӧй оскы. Ма, та юамме ӧз вала, дыр, шуыса, малпасько, кин тодэ, оло, пельыз но уг кылы. Мон азьын пуке йыг-йыг, веськрес мугоро, чебер ымныро песянай. Кисыриосыз но бамъёссэ сокем вандылэмын ӧвӧл на. Юалляськон вискамы лапас улысь мукетыз нылкышно потӥз. Таиз егитгес. Ма, зэм ик, пе, со милям мемеймы, Дарья апай.

— Алигес ми доры телевидениысь ужасьёс ветлӥзы, — вера Дарья апайлэн Александра Андреевна кенэз. — Соос корка пырыку, мемеймы 75 аресъем Ирина нылыныз диван вылын артэ пуко вал. Журналистъёс, мукет комнатае йырынызы возьматыса, сюлворо, пе: милемлы 100 аресъем песянайдэс возьматэ вал.

— Ачим но паймисько, такем кема югыт дунне вылын улӥсько ини шуыса, — улэм-вылэмез сярысь вера Дария Дмитриевна. — Егит дыръям висьымтэ-чигылымтэ интые ӧй вал. Дӥськут но, сиён но ӧз сюрылы. Пичиысен ужаса будӥськиз, туж алама вал улон. Инмар сое туала калыклы медаз возьматы ни. Вань ужез киын лэсьтылӥмы: арамы, кизимы, кутсамы, куиськимы… Мугорез но, арлыдэз но ӧз учкылэ, секыт ужез ужатӥзы, нюлэс кораны келяллязы. Ужам понна уксё ӧз тыре. Колхозъёс кылдэм бере трудодень понна пырскиськиз ини. Пересьмытозям «1-тӥ Май» колхозын ужай: парсь но сюдӥ, скал но кыски, рядовойын но ветлӥ.

Колхозъёс кылдыку, паймиськиз улонлы: тракторъёсты гуртъёсы вуттылыны кутскизы. Гуретӥсь мае ке адӟыса, пересьёс абдраллязы, ма со ишан, дыр, шуылӥзы. Туала улонэз мед адӟозы вылэм на соос. Вазен ведь поттэм сӥлез, вӧез, йӧлэз государстволы келяськом вал, война дыръя — фронтэ. Доре номыр сиён уг ни кыльы.

Мынам ныл йыры артэ Гожня гуртысь вал. Комаров Митрейлэн (гуртын сое Пор Митрей шуылӥзы) нылыз мон. Анае-атае вить пинал будэтӥллям. Табере анай-атайме нокин тодӥсь ӧвӧл ни. Ма, мар веранэз, аслам ёзъёсы кемалась ӧвӧл ни дунне вылын. Ураме потӥсько ке, нокинэ уг тодмаськы ни. Ачим шоры гинэ вань гуртоос Дарья апай шуыса вазиськыло.

Анай-атаелэн олокӧня пол юртъерзы сутскылӥз. Соин валлин школае но мынытэк кылиськиз, грамотаез тодыса таки ӧй вутты. Ярам, пичи-пичи ӟуч сямен йӧттӥсько, Огырчи базаре вузаськыны ветлыса, дыши кадь потӥсько. Туала арын табере нылпилэн нылпиезлэн нылпиосыз ӟуч нылъёсты кен ваё ни ай. Соосын но кызьы ке лабыртоно ук.

Тау нылылы-пиелы, уг кушто монэ, сюдо, утялто, сӥлы каро, шуныт но вӧл-вӧл чебер коркан возё. Мунчое пырто, чебер дӥськутэн дӥсяло. Кемалась пыдъёсам кутъёсты уг нуллӥськы ни, дэра дӥськутэз но вунэтӥ ини. Кашамер кышетъёсын гинэ ветлӥсько на. Сурагатэз но пот нянез сиемме малпаме ик уг поты ни. Нош ай кыӵе кӧй тылын уйёссэ черсыса-керттӥськыса потӥськом вал. Али гинэ мон таӵе чебер но гань-гань улонэз улӥсько ай. Кинлэн таӵе улонэз улэмез уз поты меда? Кин тодэ, оло, кулыны ӵыдытэк, 200 аресозь но векалод ай. Адямилы котькӧня арес мед луоз, сьӧд сюе пырем уг поты вылэм, югыт дунне вылын ик улэм потэ.

Дария Дмитриевна улытозяз кык картлы бызьылэм. Кыкез ик соос Орлой гуртысь Ерохинъёс вылӥллям. Нырысетӥеныз, Ондреен, кык пинал вордӥллям, Никифореныз — ньыльзэ.

Дария Дмитриевна котьку но сьӧраз сотовой телефонзэ нуллэ: Москва но, Ижевск но, Казань но, Камчатка но проводын луо, шуэ. Телефонлэн, пе, шугез вылымтэ, нылпиос кнопкаоссэ зӥбылыны дышетӥзы. Камчаткаын солэн Миша пиез улэ, отын со геолог луыса ужа. Кемалась ини пенсие потэмын, озьы ке но ялан ужа на, мемеезлы но сузэр-вынъёсызлы уксёен юрттэ.

Мукет нылпиосыз но Дария Дмитриевналэн адӟем карымонэсь. Бадӟымез Ирина нылыз Баграш-Бигра гуртын улэ. Со вуриськись. Ирина Андреевналы 75 арес тырмиз ини. Дарья апайлэн Вася пиез но туж кибашлы вылэм. Улытозяз гуртазы 7 корка ӝутыса кельтэм. Но, жаляса верано, висеменыз сэрен улонысь далайгес кошкем ини. Дарья апай Васяезлэн кузпалыныз но Валера внукезлэн семьяеныз ӵош улэ, соослэсь нылпиоссэс утялтэ. Ньылетӥез Алексей пиез Ижын улэ. Со но лэсьтӥськон удысын ужамын. Дарья апайлэн Надя нылыз дышетскемезъя агроном вылэм. Со Дэри ёросысь «Правда» совхозын валтӥсь агроном луыса ужам. Таиз нылыз пумысен Дария Дмитриевна эшшо но юнгес чигтӥське. Надежда угось УАССР-ысь Верховной Советлэн депутатэз но вылэм ини. Но улыны кема кылдымтэ, улонысь егитысен кошкем. Пичиезлы, Оля нылызлы, 54 арес. Со но Ижын улэ. Ваньзы нылпиос яратоно мемейзэс эскерыны бертыло, тазалыкез сярысь нуналлы быдэ телефон пыр юаллясько.

— Улонысь кошкем нылпиосме малпаса, бӧрдыса пукисько, — вера дауръем песянай. — Соослэн жальзылы сюлэм уг чида. Но мар карод, Инмар кинлы кӧня сётэ та улонэз.

Дарья апайлэн йырвизьмыз сазь но сэзь возиське. Со аслэсьтыз малпам кырӟанзэ кыласа-бураса лэзиз ук:
— Зарни дуно мон кожай но,
Азвесь дуно мон кожай.
Азвесь дуно вылымтэ,
Дуно зарни вылымтэ.
Дуно вылэм вордылэм но
Дуно вылэм нылпиос.
Сием потон сиёнъёсы
Огырчи но базарын.
Адӟем потон нылы-пие
Кыдёке кошкиз городэ.
Адӟем потон нылы-пие
Одӥг сажень сюй улын.

— Мон кырӟаны усто ӧй вал, — шуэ Дарья апай. — Мемее но гурез ӧз шедьтылы. Кырӟаны монэ кайгу дышетӥз. Ӟазегпи, ӵӧжпи возьмаса пуконъям йырам оломар но лыктылӥз. Собере, дугдылытэк кырӟаса, пукылӥ.

Дария Дмитриевналэн моӵез тырмысал ке, Камчаткае но кунояны мынысал на, дыр. Но укыр кыдёкын, шуэ. Алигес Ижын улӥсь нуныкаез квартира басьтэм. Песянай отчы кунояны вуылэм. Нылпиослэн улыны быгатэмзылы шумпотӥсько, шуэ.

— Мыло-кыдо адями со, маскарчи, нылпиосты серекъятыса возе, — анайзы сярысь вера Александра кенэз. — Керетонэз-мае тодэмез ик ӧвӧл, дыр. Ми тани кӧня арзэ ини соин ӵош улӥськом, ноку монэ пыкылэмез ӧвӧл. Милемын шудэм порма гинэ вераське. Соин ик со уг но висьы, пересьмонлы но уг сётскы, дыр. Егит дыръям виси, шуэ но, ӧйтод, мон кык пол сяна солэсь больницае ветлэмзэ уг тодӥськы. Одӥг пол, мунчое пырыкуз, кык сюозь вирзӥбетэз ӝутӥськиз, мукет дыръя бадӟым пыдчиньыез сьӧдэктыны кутскиз. Хирургъёс сое вандылыны малпало вал, но ми ӧм сётэ, асьмеос ик йӧнатыны быгатӥм.

Алигес шуэ: одӥг гинэ, пе, пиньы кылиз на, туж люкетэ со кылылы. Ма, ойдо, шуиськом, иське, быдэсаз протез пуктом. Я, ӵок ини, кулытэк кылем татын пинь пуктыса улэ на, шуозы, пе. Со пиналъёссэ но, ужась муртлы ноку озьы ветлыны шуыса, больницаосы нуллымтэ, пӧсь мунчоын, чечыен но шунтэм вӧйын зыраса, эмъя вылэм.

— Ма, асьсэос но монэ нылпиос серекъяло, олокызьы но мактало, — нылпиосызлэн нылпиосыныз кусыпъёсыз сярысь маде песянай. — Тон, пе, тамаша могдос адями. Ӧйтод, олокыӵе потӥсько ини мон соослы. Сиськыны но, пе, мудрон выриськод.
Дария Дмитриевна татчыозь киужен вырем ай: керттӥськем но, пужъятскем но, чильпаськем но. Туэ гинэ, синъёсыз лябњозы шуыса, семьяосыз алыны быгатӥллям. Тэк пуконэз валасьтэм адями ялан мар ке но карыны турске. Укно азьысь сяськаос вылэ ке но ву кисьтаны выре. Ӝытазезэ семьяеныз ӵош телевизор дуре пуксе. Олокыӵе но ӟуч передачаосты возьматытозь, удмуртсэ мед сётозы вал, шуэ. Кыӵе, пе, радио пыр шумпотыса кылзӥськом удмурт кырӟанъёсты. Сюлэмез ик соос вырӟыто.

Кыӵе эликсир-кужым улыны юрттэ меда Дарья апайлы? Та юанлы со огшоры гинэ валэктӥз:
— Улонэз, нылпиосты, ужез яратӥсько. Со ик мыным улыны кужым сётэ, дыр.

* * *
Кошкон азям Дарья апай кензэ чай пӧсятыны косӥз. Пырем муртэ, пе, утялтытэк кельтыны уг яра. Ӝӧк сьӧрын пукон вискамы но со трос гинэ вераз на улэм-вылэмез сярысь. Пайми: туала адями мае ке вераны кутске ке, ку но кызьы вал ай со шуыса, малпаськыны шӧта, нош Дарья апай нуналэн-арен ваньзэ тодэ, йыраз-визьмаз возе. Ёрос кивалтӥсьёслы тау каре, 100 арес тырмонам, пе, 10 сюрс манет сётӥзы.

Любовь Тихонова
Туспуктӥз Валентина Емельянова

Удмурт Дунне
By Удмурт Дунне 11 мая, 2013 22:48
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<