Чиган пи — удмурт пи

Удмурт Дунне
By Удмурт Дунне 17 мая, 2013 10:33
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Чиган пи — удмурт пи

Г. Лекомцева Андрей пиеныз

Г. Лекомцева Андрей пиеныз

Туала вакытэ ас кожазы пинал вайыны быгатӥсьтэм семьяос тодо ЭКО, суррогат анайёс сярысь. Нош 20 ар талэсь азьло гинэ таӵе учыръёс сярысь ивор но ӧз кылӥськылы. Нылпитэм семьяослэн осконзы одӥг вал — вордос басьтон.

Вожъяськон
Эгралась магазинэ пичи пиеныз нылкышно пыриз. Басьяськисьёслэн синъёссэс воштэмзы уг ни луы соос бордысь. Паймымон: мумиз суд йырсиё, удмурт тусо, нош пиез макем мусо — йырсиез сьӧд, бабля, бадӟым синъёсыз сутэрлы укшало, синкашъёсыз но синлысъёсыз суредам кадесь. Нылкышно но пияш куспазы маке бӧтьырто.

— Мама, учкы-учкы, кыӵе трактор! — ӝажы вылэ пуктэм вуз шоры возьматэ пиёк. — Мама, басьтом-а? Эшшо мар асьмелы кулэ на? — удмурт кылын туж мусо вераське пияш.
— Шыпытгес, эн ӵашеты, — индылэ мумиз пиналзэ.
— Мед вераськоз, эн на кошке. Ой, макем мусо бӧтьыртэ! — синмаськемзэс верало магазинэ пыремъёс.

Зэм но, удмурт нылкышнолэн Галина Лекомцевалэн вордосэ басьтэм пиез огпол гинэ калыклэсь синзэ ӧз кыскы.

Эгра ёросысь Сэпе Галя лыктӥз распределениея. Ачиз со Якшур-Бӧдья ёросысь Тылоын вордскемын. Асанысь техникумез йылпумъяса, егит зоотехникез Сэпе ыстӥзы. Нылмурт татын ик пумитаз аслэсьтыз куззэ — Николай Лекомцевлы бызиз. Кыкназы колхозын ужазы: Галя зоотехникын, Коля трактористын. Егит семьялэсь тупаса улонзэс пачкатӥз одӥг сюлмаськон: пиналзы ӧз кылды.

Галина бадӟым семьяын быдэсмемын. Соин нуныез ӧвӧлысь туж кайгыриз, ӵыжы-выжыосыз но куректӥзы. Кӧня эмъясьёс доры вазиськылӥз — толыкез ӧз луы, нылкышнолы нокыӵе врачъёс юрттыны ӧз быгатэ.

Аръёс туж ӝог лобизы. Галя 35 арессэ но ортчиз. Нылпи пумысен кузпалъёс пӧртэм сямен куректӥзы ни. Коля ӵем юылыны ӧдъяз, нош Галя борды висёнъёс кырмиськыны кутскизы, вылаз ик лулсэръёссэ тарказ картэзлэн юон бекчее учкылэмез.
Кӧня тазьы векалом на? Мар воштӥськоз ӵуказе, толэзь, ар улыса? Уйлы быдэ йырйиз ассэ Галина. Нуны басьтон мылкыдзэ со картэзлы ивортӥз. Озьы нылпи сярысь куронэн ёрос администрациысь семья ёзэ вазиськизы.

Ӝыны ар ортчиз-а, ӧз-а — Лекомцевъёслы жингыртӥсь луиз. Эгралась роддоме, пе, нуны кельтӥзы. Галина лобыса райцентре кошкиз. Нылкышнолы телефон пыр ваньзэ ивортӥллямтэ вылэм. Нуны ваён юртэ пизэ кельтэм… чиган ныл. Нылмурт — быдэ вуымтэ маке, нунылэн бубиз чиган ӧвӧл. Соин таӵе пиналэз нылмуртлэн семьяосыз кулэ кариллямтэ.

Таӵе вамышлэсь Галяез алыны выризы куд-ог эшъёсыз. Нош нылкышно ас понназ малпаз: адӟонме адӟо.

— Анай пинал вае ке, бырйыса уг улы ук, мар Инмар сётэ, озьы ик луэ. Нуны — со вуз ӧвӧл, бырйиськыса улод шат? — вера Галина Аркадьевна. — Мужикелы верай роддоме вуылэме сярысь. Чиган пи, шуисько, сыӵе пичи гинэ, мусо сьӧд комок.

Картэз мултэс ӧз юалляськы:
— Киыз-пыдыз, йырыз вань-а?
— Вань, — пумитаз ма вазьыны ик паймиз Галина.
— Сэре мар малпаськонэз на? Басьтом, — шуиз Николай.

Озьы Лекомцевъёслэн семьяязы шумпотон пыриз — пичи Андрей. Галина нуны утьыны декретэ потӥз. Ӵап улон но соку секытгес луиз. Я колхозын уждун ӝегато, я дунъёс тэтчо. Нунылы йӧл суретъёс но куддыръя басьтыны ӧз шедьылэ. Озьы Лекомцевъёс скал вордыны малпазы. Кузпалъёс куспазы серекъязы: нылпи но басьтӥм, скал но заводим. Уго кыкназы дыръя скаллы ӧз кулэяське, нош пичи пилы аслад йӧлыд но, кузятэмед но, йӧлвылыд но медло.

Ваменъяськон
Пиед ӧвӧл — огпол бӧрдод, пиед вань — дас пол но бӧрдод, шуиллям калыкын. Та веранлэсь зэмлыксэ Галина шӧдыны кутскиз Андреез будэмъя. Лекомцевъёс пизылэсь ватыса ӧз возе, со вордосэ басьтэмын шуыса. Уго муспотон Андрей олокыӵе лулсэреныз шӧдылӥз, сое пичи ке но пӧяны вырыкузы ик.

Нош чиган вир ассэ возьматэ вылэм. Лекомцевъёс туж чаклазы пизэс. Тани чиганъёсты кузь кизы понна уг ярато. Андрей но мумизлэн ӟепаз уксёлы кӧня ке пол пыраз.

— Школае я таизлы, я соизлы шуыса коньдон куро. Нош Андреймы ӝыт вераны вунэтэ, — тодаз вае Галина. — Ӵуказеяз мон уже кошкисько, нош со бӧрысь карманам пыре но коньдонзэ поттэ. Начальнойын дышетске вал, дыр, соку. Зэм, трос уг басьты. Нош тазьы дышиз ке? Вераськоно кариськи. Шуисько: неноку но, пие, озьы карманэ пырано ӧвӧл. Андрей ӝожомиз: мон, пе, мурт ӧвӧл ук. Нош но нош валэктоно, кылъёс утчано луылӥз. Со понна табере тодӥсько: пиелы аслым кадь оскыны луэ, муртлэсь номырзэ со уз басьты.

Уката секыт луиз школаын. Дорысь уж лэсьтон — Андрей понна зэмос четлык выллем потылӥз. Мумиз но, бубиз но солэсь вамен тул кадь сямзэ берыктыны ӧз ворме ни. Пияшлы покчи дырысеныз тунсыко вал калыкен вераськыны, инкуазе потаны — солы отысь ивор но окме, ма муген эшшо книгаос пӧлы выйыны на? Дышетскон пумысен Андрейлэн но мумы-бубыезлэн мылкыдзы огкадь ӧз луы.

Со понна пияш бадӟым мылкыдын калык азьын кырӟалляз. Озьы мумиз сое гуртысь клубе кружоке ветлыны нодъяз. Таиз удыс Андрейлы ӵап сямызъя тупаз ни. Кӧня концертъёсы пыриськиз со, кытчы но ӧз поталэ выступать карыны. Огполаз тазьы ветлыкузы, Андрей аслэсьтыз зэмос ӵыжы-выжыоссэ но шедьтӥз.

— Быдэ вуон вакытэз юн секыт вал бере, пимы вормытъяськылӥз: кытын мынам зэмос мамае, малы монэ куштӥз. Мынам таӵе дыръя сюлмы чигиськылӥз, — син пумъёссэ ӵуше Галина Аркадьевна. — Соин пумен юалляськи Андрейлэн зэмос семьяез сярысь. Тодӥ, мумиз лушкаськемез понна колониын пуке шуыса, мукет пиналъёсыз но нылпи юртъёсы кельтэмын. Соин Андрейлы верай чиганъёслэсь кытын улэмзэс но, мумизлэсь нимзэ-тулзэ но.

Пияш ваньзэ тае йыраз кельтылӥз. Учыр тупаса, чиган семьяе кожам. Татын сое пичи пиналэн пересь кышномурт пумитам. Андрей, «мон тӥляд нунокты» шуыса, ассэ верам. Песянай нокыӵе ик кариськымтэ: сотэк но тодско, пе. Вераськон ӧвӧл мытэм, доразы огдырлы кыльыны но ӧвӧл курем. Чиганъёс доры ветлэмзэ Андрей мамаен-папаезлы, ог кык аръёс ортчыса гинэ, вераз. Бӧрысь чиганъёс доры ӧз но куриськы, соосты ӧз но вералля ни.

Котькыӵе анай-атайлэн пизэ рос-прос, дышетскем муртэн адӟемез потэ. Таӵе ик мылкыдыз Галина Аркадьевналэн но. Но школа бере Андрей дышетскыны ӧз пӧрмыты. Мумиз нош ик куректэ: кин ке луыны бадӟым мылкыдыз но ӧвӧл. Эшъёсыныз ӵош Андрей ӝуткаськиз вал Иже кошкыны. Заводын ужаны документъёс но люказ вал ни. Нош анай сюлэм пырак пилиськоно кадь луиз: кытчы кошке одӥг гинэ пиез, кинъёсын артэ луоз со, урод вамыш лэсьтонлэсь кин утёз?

Анайлэсь сюлмаськонзэ кылэм сямен Андрейлы жингыртӥз гуртысь культура юртлэн кивалтӥсез Татьяна Мосова.
— Татьяна Ксенофонтовна шуэ: уж интымы, пе, вань. Мадиськимы куспамы, озьы малпай гуртэ кыльыны, — шуэ Андрей. — Мыным татын ужаны туж яра. Организатор луисько бере, пиналъёсын но ужасько, егитъёслы но ужрадъёс ортчытъясько.
Андрейлэн мылкыдызлы клубын ужасьёс туж шумпото. Уго пияшсы кырӟа но, гитара сиосты но кыска, али синтезаторен шудыны дышетске. Вылаз ик культурая колледже заочно дышетскыны пыро, шуэ. Таӵе пияштэк Сэпын зэмзэ мӧзмыт луоз.

Сэпе концертъёсын вуылӥсь тодмо артистъёсмы но Андрейлы паймо. Нырысь пияшлы ӟуч вазё, нош удмурт сямен кырӟамзэ но чылк-чылк вераськемзэ кылыса, бакомо. Алигес, пе, Геннадий Ганьков паймыса кошкем. Сьӧдкысъем пияшлэн улоназ тумошо учыръёсыз уно гинэ луо. Я сое армянъёс асьсэ выжыысь кожало, я мукетъёсыз Кавказысь лыктэмын малпало. Андрей Лекомцев шуыса нимзэ веракуз, паймемзэс ватыны уг быгато.

Нош Галина Аркадьевнаен Николай Алексеевич шумпото, Андрейзы кытчы ке кошкыны уг ӝуткаськы ни шуыса. Озьыен, кема возьмам пизы вӧзазы улоз. Кин тодэ, оло, матысь аръёсы кузпалъяськоз, Лекомцевъёслэн корказы тырмоз жингрес нылпи куараосын.

* * *
Галина Аркадьевна вераськонмы ӵоже бӧрдӥз но, пальпотӥз но, пиеныз ушъяськиз но.
— Роддомын ик верасалзы ке, тамында сюлмаськонэн пумиськоды шуыса, басьтысалды-а бордады чиган пиез? — юай мон.
— Басьтысал. Кызьы сотэк? — шорам сэзь учкиз кышномурт. — Андрей — мынам пие. 20 ар талэсь азьло со мыным «мама» шуыса вазиз…

Алёна Ионина
Туспуктӥз Владимир Беломорских

Удмурт Дунне
By Удмурт Дунне 17 мая, 2013 10:33