«Беренэс» — пумтэм мылкыд

Удмурт Дунне
By Удмурт Дунне Май 31, 2013 10:01
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

«Беренэс» — пумтэм мылкыд

Быги культура юртысь «Беренэс» калык театрлэн туж яркыт улон сюресэз. Кутскиз со 1988-тӥ арын. Люказ актёръёсты Удмуртиысь культура удысысь дано ужась Нина Беляева, али со муниципал кылдытэтлэн кивалтӥсез луэ. 

«Беренэс» театрлэн нимыз «берланес» кыллэсь кылдэмын. Театр дасяз но пуктӥз кызьлэсь ятыр постановкаос. 25 ар талэсь азьло та самодеятельной коллектив нырысьсэ дасяз В. Садовниковлэсь «Выж вылын» пьесазэ. Театр энтузиазм, пумтэм мылкыд вылын гинэ возиськиз. Быги гуртын соку клуб гинэ но ӧй вал. Репетициос ортчылӥзы нылпи садын, сельсоветын.

Та аръёс куспын будӥзы выль артистъёс, коллективе вуизы егитъёс. Шуом, тямыстонэтӥ аръёслэн пумазы театрез творчествоенызы чебермазы Надежда Владимировна но Николай Иванович Голубинъёс — али постановкаосы бадӟым мылкыдын пыриське соослэн пизы Альберт Голубин. Анай-атаез, егит дырзэс тодазы вайыса, шумпотыса учко ни сцена вылын шудӥсь пизы шоры. Надежда Байданова но Андрей Леонтьев но яратоно ужзэс ӧз вунэтэ, али ке но паймыто учкисьёсты.

25 ар тырмон аре артистъёс Игорь Виноградовлэсь «Богатые женихи» комедизэ дасязы. Удмурт кылэ та пьесаез Н. Беляева берыктӥз. Котькуд артист рользэ, вань мылкыдзэ, кужымзэ поныса, шудэ. Выль артистъёс пӧлын — Быги школаысь дышетӥсь Людмила Ильина: солы куамын арес но ӧвӧл ай, нош комедиын сизьымдон кык аресъем кышномуртэз шудэ — учкисьёс солы оско. «Шаркан-трикотаж» акционер огазеяськонысь Виктория Щукина шудэ визьмо но керпотӥсь егит нылэз. Культура юртын ужась Павел Митрофанов коньдонэз но капчи улонэз яратӥсь пиосмуртлэсь рользэ капыртӥз. Быги школаысь дышетӥсь Инна Тополева усто возьматэ кильтро, шоголь нылмуртэз. Таӵе кивоштӥсьёсын, кужмо артистъёсын театр улоз но улоз, оске учкись.

Юбилей аре Нина Григорьевна тодаз вае:
— Театрмы пыд вылаз султон вакытэ, 90-тӥ аръёсы, уждун уг сёто вал, сиён но юон басьтӥмы талонэн. Магазинъёс воксё бушазы. Нош Быги театр адямилэсь мылкыдзэ ӝутӥз, азьпалан умой улонлы оскон сётӥз. Озьы адямиос асьсэлэсь шугъяськонъёссэс вунэтылӥзы.

Елена Перевозчикова

Удмурт Дунне
By Удмурт Дунне Май 31, 2013 10:01
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<