Куас вылын — 13 кузя

Удмурт Дунне
By Удмурт Дунне Май 17, 2013 11:50
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Куас вылын — 13 кузя

Хохряковъёс  нылпиосынызы

Хохряковъёс нылпиосынызы

Шаркан ёросысь Быги гуртысь Антонина но Анатолий Хохряковъёслэсь семьязэс тодӥсьтэмез ӧвӧл, дыр. Кузпалъёс вить пинал будэтӥзы. Анатолий Григорьевич трос аръёс ӵоже быгатыса кивалтэ «Восход» хозяйствоен, «За заслуги перед Отечеством» орденлэн II степенё медаленыз пусъемын. Антонина Михайловна 37-тӥ арзэ Быги школаын пиналъёсты визьнода, удмурт кылъя но литературая урокъёсты нуэ. Пусъемын «Анаез данъян» гадьпусэн.

— Антонина Михайловна, тӥ бадӟым семьяын, пиос пӧлын будэмын.

— Вордски но будӥ Шаркан ёросысь ик Кион-Липето гуртын. Нуналлы быдэ 5 иськеме Кыква школае дышетскыны ветлӥ: гужемзэ — пыдын, толалтэзэ — куасэн. Семьямы зэмзэ но бадӟым вал: Вова, мон, Коля, Гена. Бадӟымезлы 7 арес, нош пичиезлы 2 но ӝыны толэзь дыръя 26 аресъем анаймы Екатерина Митрофановна огназ кылиз. Мыным соку 5 арес вал, папаме ӟеч тодӥсько на. Солэн одӥг пол но шорамы кеськемез ӧй вал. Бен, вожез потыкуз шорамы лек учкылӥз ик, янгыш лэсьтэммес соку ик валаллямы. Вотка заводын охранаын ужаз, пыӵал нуллӥз. Огполаз эшез янгышен шораз ыбыны шедьтэм. Анаймы ӧз чигиськы. Кӧня ке дыр ортчыса, гуртысьтымы воргоронлы синмаськиз, эшшо кык пи вайиз. Со воргорон юрттӥськыны вуылӥз ке но, дорамы улыны ӧз дӥсьты-а, мар-а.

Озьы мон куать пиос пӧлын будӥ. Огнам ныл шуыса, лэся, монэ жалязы, нуны утён но трос ӧз донгиськы — пересь мамамы но тятямы бордамы улӥзы. Эшъёсы пӧлын но пиос тросгес вал. Нюк тапалан кык коркан 11 пиналъёс будӥзы, соос пӧлын кык гинэ нылъёс. Пиос ноку но милемды ӧз обидьылэ. Школае дэмен ветлӥмы. Одӥг пол гинэ братэным школалэсь кыльыны малпамы.

Кезьыт тол нуналэ туж пелляськиз, ӟезьы сьӧры потамы но берен корка пыримы. Но милемлы шутэтскыны ӧз кылды, мамамы вал кыткиз но школае келяз. Ватсаз на: школалэсь пегӟыны выремды нырысетӥез но берпуметӥез мед луоз. Анаймы кулэ интыяз чурыт вазьыны быгатӥз. Котькудмес нуныяз ке но, сьӧраз ӧз ортчы.

Тодам вайисько на, папамылэн киыз котьмалы усто вал, пулэсь лэсьтэм шыкыссэ туннэ но возисько. Атаймы сюлмаськемен ик, котькинлэсь вазь куасъёсмы кылдӥзы. Куасэн бызьылонлэсь одӥгмы но ӧм палэнске.

— Нош спортсмен луон сярысь ӧд малпаськылэ-а?

— Эшъёсы пӧлын мон котьку чупрес вал, куасэн бызьылонъя ӵошатсконъёсын вормонъёс басьтылӥ, но гуртамы тыро-пыдо тренермы ӧвӧлэн физкультуралы сокем ӧй синмаськы. Эшъёсынымы ӵош шудыкумы, ялан концертъёс, сценкаос пуктылӥмы, мыным дышетӥсьлэсь рользэ сётылӥзы. Со дырысен визьнодась луон вирам пыӵаз, лэся. 10-тӥ классэз йылпумъяса, Удмурт кун университетэ пыри. Студент вакытам нош ик яратоно куасъёсы вылэ султӥ. Озьы факультетлэсь данзэ вить ар ӵоже пӧртэм ӵошатсконъёсын ути.

— Ас мылкыд каремдыя-а Быгие вуиды?

— Азьвыл аръёсы вань студентъёсыз распеделениея ужаны ыстылӥзы. 1979-тӥ арын Быги школае куать егит дышетӥсьёс ужаны лыктӥзы. Вордскем гуртэлэсь со ог 25 иськемын луэ. Кӧня ке ар ужай ке, кошко, малпай вал. Куать мурт пӧлысь ӝыныез пыраклы Быгие кылиз, мон но. Егит дыръям арнялы быдэ гуртам бертылӥ. Керпотӥсь сямылы луыса ӝыт шулдыръяськонъёсы но трос ӧй пота.

— Озьы ке но йӧно, ӝужыт казакпилэсь йырзэ поромытӥллямды…

— Толяен нырысьсэ пумиськимы Шарканысен. Андрей но Сергей вынъёсы пыриськизы ёросын ортчись куасэн бызьылонъя ӵошатсконэ, мон соос понна «виси». Нош Толя гуртсы понна бызьылӥз, со вакытэ Глазовысь совхоз-техникумын дышетске вал ай.

Кыл бӧрсьы кыл, со ик тодматскеммы луиз, лэся. Спорт сярысь маке вераськеммы бере люкиськимы. Техникумзэ йылпумъямез бере гуртысьтымы дышетӥсьёсын ӵош армие келяны ветлӥ. Службазэ ортчытӥз Литваын, ракетчик вал. Кусып гожтэт пыр возимы, тросгес гожъямы спорт сярысь: ёросын кыӵе ужрадъёс луо, кинъёс вормисе пото. Толя туж сабырлы, керпотӥсь пияш. Анайзы Мария Алексеевна, милям анаймы сямен ик, куинь пиналзэ огназ будэтэм, соин, дыр, Толя но нуныямын ӧй вал.

Армиысь бертэмез бере трос ӧз калгы, кураны лыктӥз. Спортэн эшъяськеммы ик юрттӥз, шуысал, милемлы огазеяськыны. Кужмо спортсмен луэм сяна, Толя котьма гурт ужез мыло-кыдо быдэсъя. Армиысь бертыса, колхозын ужаны кутскиз. Нырысь ик ыстӥзы Шегъян бригадае, инженер-механиклэсь ужзэ быдэсъяз. Отын кӧня ке ужамез бере Быгиысь гаражен кивалтӥз. Сизьым ар валтӥсь инженер вал, нош 1990-тӥ арысен председателе бырйизы. Ужезлэсь люкиськытэк ик, вылӥ образование басьтӥз, УдГУ-ысь экономической факультетын дышетскиз.

— Бадӟым семьяын будыса ик, дыр, трос нылпи ваёно кариськиды.

— Аслам агай-вынъёсы вить кузя вал бере, быземелэсь азьло ик лушкем малпалляй, 5 пинал будэто шуыса. Улонын со зэмаз. Нырысь ик Алёнамы вордскиз, собере Колямы, Катямы, Гришамы, Ильямы. Толялэн анаеныз ӵош улӥмы, нылпиосмес пыд вылазы султытыны юрттӥз. Пиналъёсмы сабырлы будӥзы, Колямы сяна, вань нылпиосы школазэс йылпумъязы зарни медален. Колямылэн угось книгаос сьӧрын пукыны дырыз ӧз кыльылы, Россиысь куасэн бызьылӥсьёслэн сборноязы кутэмын бере, ялан ӵошатсконъёсы потаз. Со понна солэн мукет зарни медальёсыз трос.

Школазэс йылпумъяса но, пиналъёсмы вужере ӧз ыше. Бадӟымез нылмы УдГУ-ысь историяя факультетэз йылпумъяз, Колямы — Казань университетысь мугорез кыдатонъя но спортъя факультетэз, Катямы — ИжГТУ-эз. Бухгалтерлы дышетскон сяменыз кылысь кылэ берыктӥсь луиз на. Кыксэ ик дышетсконзэ горд дипломен йылпумъяз. Пичиосыз пиосмы Ижысь гурт удысъя академиын тодон-валан люкало. Гришамы яратэ инкуазез но будосъёсты, агрономе вамыштӥз, нош Ильямы — атаезлэн пытьыезъя — инженере. Котькыӵе учыр дыръя атайзылэсь адӟем каро, кулэ дыръяз визь-кенешлы вазисько.

— Зарни пиналъёс будэтӥды, нош табере бадӟым юртады огнады кылемын. Мӧзмыт ӧвӧл-а?

— Мӧзмытгес ик. Арня ӵоже кыкнамы улӥськомы, нош шутэтскон нуналъёсы кудзы ке пиналъёсмы одно ик вуо. Колямы гинэ шергес берта, я сборъёсын, я ӵошатсконъёсын луэ. Вордскем нуналмы яке кыӵе ке праздникъёс дыръя одно ик жингыртоз, Удмуртие огдырлы вуылыкуз но, Быгие бертыны выре.

А. Хохрякова выжыысьтызы спортсменъёссэс лыдъя

А. Хохрякова выжыысьтызы спортсменъёссэс лыдъя

— Коляды кутэмын Россиысь куасэн бызьылӥсьёслэн сборноязы, телевизор пыр-а, дорысьтыды-а ӵемгес адӟиськоды пидэс?

— Россиын, дуннеын куасэн бызьылонъя ӵошатсконъёс кутско ке, телевизор котырысь ик ум ваньмиське кадь. «Спортканал», «Евроспорт» учкиськомы. Россиысь ваньзэ куасэн бызьылӥсьёсты нискыламзыя тодмаськомы. Сыктывкарын но Тюменьын ортчем ӵошатсконъёсы Толя ветлыны быгатӥз, мон ке телевизор дорын «виси». Удмуртиысь вань пиос понна сюлмаськисько, бере кыльыны ӧдъякузы, золгес бызьыны курисько. Жаль, мынэсьтым даллашемме уг кыло.

Шаерысьтымы спортсменъёс котьку висъясь-кылӥзы ужез яратэменызы, чидась луэменызы. Куд-ог дыръя Колямылы но трос чидано луэ. Спорт — со бадӟым политика выллем, кужмо луон вӧзы одно ик удалтонлык кулэ, со ик Колямылы уггес окмы. Улонын пумиськись шуг-секытъёсты ачиз вормыны выре, кин ке вылэ ӝожтӥськемез одӥг пол но ӧвӧл. Колямылы синмаськемын Гриша но Илья вынъёсыз. Данъяськиськомы: туэ толалтэ Гришамы но спортъя мастерлэсь куронзэ быдэстыны быгатӥз.

— Трос аръёс Быгиын улыса, сьӧрлось Починка гуртэ корка пуктӥллямды. Нуналлы быдэ кыдёке ветлоно луоз шуыса, сюлэмды ӧз пирсэкъя-а?

— Амалмы ке луысал, анаймылэн коркаез вӧзы ик выль юрт пуктысалмы, дыр. Инты ӧвӧлэн Починкае вамыштоно луимы. Нуналлы быдэ 2 иськемез солань-талань вамышъясько. Сьӧрлось гуртэ улыны мынэме уг поты вал нырысь, нош табере мужикелы тау карисько. Угось, пиналъёсын ужаса, трос керӟегъяськоно, куд-ог дыръя школаын люкам леке аслам пиналъёсы вылэ усьылӥз. Нош табере югдур чылкак воштӥськиз. Сюрес кузя мынытозям, нунал ӵоже быдэстэм ужъёсме, верам кылъёсме йырам бергатӥсько но чылкыт йырсазен дорам пырисько. Бен, Починка гуртысь пиналъёсты школае автобусэн нулло, нош мон пыдын ветлӥсько. Куд-огезлэн шорам чиньыен возьматэмзы потэ кадь, предлэн кышноез пыдын ветлэ шуыса. Быдэс семьямы спортэз гажа бере, котьку но формаын луоно. Мынэсьтым адӟем карыса, лэся, мукет дышетӥсьёс но пыдын лашкинто. Гужемзэ ваньмы велосипедэ пуксиськомы. Со понна нылпиосы тузӥ велосипед но кузьмазы.

— Семья кылдытыкуды, председательлэн кузпалыз луоды шуыса, малпады вал-а?

— Со сярысь ноку ӧй малпаськылы, семья кылдытыкумы, картэ соку гинэ колхозын ужаны кутскемын вал. Бен, Анатолий Григорьевич котьма ужез рос-прос быдэстэ, со понна уж — вань улонэз, тэк пукыны уг быгаты. Аслыз дан поттон вылысь гинэ тыршысал ке, гуртысь кемалась пегӟемын луысал ни. Куамын арлэсь ятыргес валче улӥськомы, со пӧлысь 23-зэ председательын ужа. Куд-огез, оло, малпа, кивалтӥсьлэн кузпалыз луыны капчи шуыса, нош мон озьы ӧй верасал.

— Уж ласянь сюлмаськонъёсты керетонозь уг вуттыло-а?

— Котькыӵе вакыт луысал, дыр, шорзэ шедьтыны тыршисько: куддыр маке верасько, куддыр шып улӥсько. Пересьёс юнме шуиллямтэ, чиданлэсь бадӟым номыр но ӧвӧл. Аслам но, Толялэн но анайёсмы озьы вераллязы. Нош коркан воргорон ик кузё луыны кулэ. Бадӟым уж борды басьтӥськемзылэсь азьло пиналъёсы атаенызы кенешо. Со азьпала учкыны быгатэ, токма шат трос аръёс кивалтӥсьын пуке. Ваньзэ йыраз рос-прос бергатэ. Мон ке мукет ласяньгес — кылын — буйгатыны тыршисько. Коть председатель, коть дышетӥсь тон, калыклы дыраз вераны быгатоно шуныт кыл но шорад лекъяськемзэс, урод кылъёссэс вунэтоно. Семьямы сярысь ке верано, ог-огмес валаны тыршиськомы.

— Со ик юрттӥз, дыр, шаерамы ортчылӥсь Гурт тол шудонъёсы пыриськыны.

— Бадӟым нылынымы гинэ Гурт шудонъёсы ӧм пыриськылэ. Нырысь ик кужыммес эскерылӥмы ёрос ӵошатсконъёсын, сельсовет понна бызьылӥмы. Отын вормисьёслы сюрес усьтӥськылӥз шаерысьтымы гурт спортсменъёсын вожвылъяськыны. Коля пиенымы кыкетӥ но куинетӥ интыозь ӝутскыны быгатылӥмы ик. Отӥяз пиналъёс ас кожазы ёрос понна бызьылӥзы.

Ми толэз яратӥськомы. Угось, куасэн нискылаку, номыр сярысь уд малпаськиськы, урод малпанъёс йырысь тӧлӟо, инкуазьлэн шулдырез капчи мылкыд но кужым сётэ. Берло аръёссэ Гурт шудонъёсы уг пыриськиськы ке но, учкыны, нылпиосмы понна «висьыны» ветлӥськомы. Нош туэ Граке юри утиськыны ветлӥмы: Колялэн кузпалыз вож нуныен ӵошатсконэ пыриськиз. Со сяна, арлы быдэ март толэзе Ижевскын радъяське куасэн бызьылыны яратӥсьёс понна марафон. 55 аресозям 20 иськеме бызьылӥ ке, туэ 10-сэ гинэ ортчи.

Ольга но Николай Хохряковъёс Елисей пиенызы

Ольга но Николай Хохряковъёс Елисей пиенызы

— Ӧй вал-а мылкыдды, быдэс семьяен, вань ӵыжы-выжыосыныды люкаськыса, дэмен куас вылэ султыны?

— Луонлыкъёсмы ӧвӧл. Но туэ Гракын ортчем Гурт шудонъёсын Хохряков выжыослы удалтӥз, шуыны луоз. Гриша пимы ас ёзо эшъёсыз пӧлын куинетӥ инты басьтӥз, Оля кенмы, Колялэн кузпалыз, спринтын зарни медаль утӥз. Вань Гурт шудонъёсы Коля выны — Николай Батаногов — пыриське. Со но ас ёзо эшъёсыз пӧлын туэ кыкетӥ интые потыны быгатӥз. Вань ӵыжы-выжыосмы пӧлысь куасэн бызьылӥсь спортсменъёсты люкано ке, ӧжытсэ 13 кузя луиськомы.

— Анатолий Григорьевич, нош тӥляд ваньмон дырды кыле-а спортэн эшъяськыны?

— Вазь тулысысен бер сӥзьылозь гурт хозяйство котырын бергано луэ, толалтэзэ гинэ ӧжытак ваньмон дыр шеде. Куасэн нискылам сяна, сике ветлӥсько — пӧйшураны. Ӵош ужась эшъёсы вордскем нуналам велотренажёр кузьмазы, шутэтскон сямен отчы ӵем пуксьылӥсько.

— Зэмос воргорон, пе, пи будэтыны, корка пуктыны, сад мерттыны кулэ. Тӥ ваньзэ быдэстӥды, туннэ нуналлы ма сюлмаськытэ на?

— Быдэстоно ужъёс лачак, быгатэмъя пиналъёслы улонзэс радъяны юрттоно. Гуртысь вазь ӵукна кошкыса, бер ӝыт сяна уг вуиськы. Ярано коть, кузпалы юрт котырысь ужез быдэстэ. Семьялэсь но бадӟымгес сюлмаськонэ — гурт хозяйство. 2009-тӥ арын акционер огазеяськон луимы. Ар ортчыса, бордамы кутӥмы «Югдон» хозяйствоез. Сое пыд вылаз рос-прос ӝутон вылысь трос коньдон пононо луиз, шумпотӥсько, туннэ нуналлы пайда поттыса ужаны быгатӥськом ни. Экономика ласянь малпаськытэк уг луы. Огаз гуртын йӧл будэтонлы тросгес саклык висъяськом, мукетаз — сӥль поттонлы. Озьы одӥг аре секыт югдурысь потыны юрттӥз сӥль, нош собере — йӧл. Ас вакытаз сӥльмес килограммзэ 85 манетэн басьтылӥзы, нош та вакытэ со дун ӝынылы усемын — 45 манет сяна кылемын ӧвӧл. Гурт удыслы со нош ик шуккет луэ.

Кылем ар пумын «Ошмес» хозяйствоен кивалтыны куризы. Сюлмаськонъёс трос, котькуд гуртэ вуылыны кулэ. «Восход» огазеяськонын ужа 400 адями, гыроно-кизёно музъеммы 7 сюрс гектар пала люкаське вал. Табере сюлмаськон кык поллы уногес луиз. Угось «Ошмесын» но гыроно-кизёно музъемзы сомындагес люкаське, ужасьёссы 300 котыр. Одӥг муртэ но ужтэк ӧм кельтэ.

Жаляса верано, гуртын ужаны мылкыд карисьёслэн лыдзы арысь аре кулэсме. Мувӧй поттӥсьёс бордазы кыскыны выро, шутэтскон нуналъёсын, бадӟым уждунэн гочато. Но мон котьку умоезлы оскисько, гуртын ужасьёс но азьланяз узырмозы ай, мувӧй поттон удысын тыршисьёс мында ик уждун басьтыны быгатозы. Со понна вань луонозэ лэсьтыны тыршисько.

— Антонина Михайловна, тӥледыз но юн гажало, шӧдске, «Шанель» духиосын гинэ шоголляськиськоды, лэся. Пиды, дыр, кунгож сьӧрысь вае?

— Таӵеоссэ кузпалы кузьма. Бен, нылпиосы но буш киын уг бертыло. Соослэн кузьымзы ӧжытак мукетгес, чаклало, лэся, нуналлы быдэ кутӥськись мед луоз шуыса. Туэ толалтэ куас, ботинкаос, бодыос кузьмазы.

— Тӥ сямен, семьялэн шудэз ма бордын возиське?

— Яратон, ог-огдэ валан но гажан бордын. Улонын пумиськись шуг-секытъёс котыр ласянь адямиез пачкатыны выро. Семьяын шуныт кыл верась, буйгатӥсь дыраз ӧз луы ке, соосты вормыны секыт йӧтоз. Тани али компьютер улонэ пыӵа. Куд-ог дыръя пиналъёсын скайп пыр кенешиськомы, вераськиськомы ке но, улэп вераськон котьмалэсь дуно.

Валентина Емельянова

Удмурт Дунне
By Удмурт Дунне Май 17, 2013 11:50
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<