Воз тырме мынон сямен

Удмурт Дунне
By Удмурт Дунне 26 апреля, 2013 14:16
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Воз тырме мынон сямен

Туэ Ашальчи Оки нимо премиен дунъямын Л. Фёдорова, В. Широбокова, Г. Образцова

Туэ Ашальчи Оки нимо премиен дунъямын Л. Фёдорова, В. Широбокова, Г. Образцова

Кылем арня пумын Иже люкаськылӥзы удмурт нылкышноос. Соос пыриськизы «Удмурт нылкышно кенешлы» 20 ар тырмонлы сӥзем ужрадэ. Та нуналэ ик сиё-дано каризы «Удмурт Кенеш» ассоциацилэн 2013-тӥ ар понна Ашальчи Оки нимо премиеныз дунъям нылкышноосты.

«Удмурт нылкышно кенешлэн» та аръёсы азинскемез сярысь вераз огазеяськонлэн али кивалтӥсез Надежда Степанова. Ужрадэ озьы ик вуизы нылкышно кенешлэн азьвыл кивалтӥсьёсыз Нина Малых, Людмила Христолюбова, Галина Никитина.

Зал тыр люкаськизы йӧно удмурт кышноос. 20-тӥ даур кутсконын удмурт кенакъёс пӧлын 0,5 процентэз гинэ дышетскемын вылэм, пусъе Людмила Христолюбова. Нош туннэ сиён-юон поттон, дышетон, эмъян удысын сомында удмурт нылкышноос — юнме-а соос быдэс «Женщины-удмуртки» книга тыр люкаськизы ни. Та удысъёсын ужась нылкышноосмы шуак ӧз луэ ке, огъя югдурез ик син шоры пуктыны курдано.

«Удмурт нылкышно кенеш» герӟась выж луэ семьяос но дышетон учреждениос куспын. Семьяосын ужало удмурт психологъёс. Берло аръёсы та ӧрез нуэ Ольга Смирнова. Дорын нылпиосыз визьман, кузпалъёс куспын кылдӥсь шугъяськонъёсыз сылмытон понна удмурт специалистъёслэн кулэлыксы туж бадӟым. Гуртъёсын улӥсь анай-атайёслы капчигес юалляськыны удмурт сямен, кылыны психологлэсь удмурт кылын валэктонзэ.

Бадӟым ӧрзэ нуэ «Удмурт нылкышно кенеш» нылпи садъёсын но школаосын. Зол уж мытэмын Ижын. Нылпи садъёсысь воспитательёс огазеяськемын «Зарни бугор» клубе. Со юрттэмъя ортчо ужрадъёс, сяме пыризы ни «Ӵыжы-выжы», «Пичи уӵыпи» но «Пичи чеберайёс но батыръёс» фестивальёс.

Нылкышно огазеяськонлэн ёзъёсыз ваньмаз ёросъёсын кылдытъямын. Кытын ке соос лябгес ужало, нош тросаз ёросъёсын — куаш-куаш ужрадъёс борды басьтӥсько. Тани Сюмси ёросысь нылкышноослэн азьветлӥсьсы Раиса Волкова нокинлы тэк улыны уг сёты. Соос гуртъёсын но ужрадъёс ортчыто, ёрос центрын но бадӟым ӵошатсконъёс-шулдыръяськонъёс дасяло.

33 кузя луизы Ашальчи Оки нимо премиен дунъям нылкышноос. Туэ та премия понна вожвылъяськон котькулэсь ӟырдыт луиз — 9 муртэ данъяны ӵектонъёс люкаськизы. Удалтӥз куинезлы — Дэбес черкогуртысь Галина Образцова дышетӥсьлы, Якшур-Бӧдья ёросысь Якшур гуртысь Валентина Широбокова шаерчилы но Удмурт кун университетысь Любовь Фёдорова тодосчилы. Таӵе дунъямзы понна котькуд нылкышно аслыз эшшо бадӟымгес куронъёс пуктэ.

— Иворез кылӥ но, мур куректонме вунэтыса ик, шумпотэменым киме чаби но серектӥ. Ӧжытак керпотӥсько, сомында визьмо но йӧно нылкышноос пӧлысь монэ пусйиллям шуыса, — мылкыдзэ вера Валентина Широбокова.

Галина Образцовалэн, таӵе данъетлы луыса, нылпиосын ужаны мылкыдыз уката но ӝутскиз. Галина Азарьевна кема аръёс ӵоже пыриське Дэбес ёросысь «Удмурт Кенешлэн» ужаз, кырӟа «Ӟардон» ансамбльын. Табере вань та удысъёсын кык полэс кужымен бергалоз.

Педагогика наукаосъя кандидат Любовь Фёдорова сюлмаське:

— Та премия вуоно ужъёсты быдэстыны оскон но кужым сётэ. Та дырозь Ашальчи Окилы сӥзем йӧн-йӧн книга ӧвӧл. Соин азьланяз басьтӥсько сое дасян борды.

Нош «Удмурт Кенеш» ассоциацилэн президентэз Игорь Семёнов Любовь Фёдоровалы мукет сӥзёнэн вазиськиз: матысь 4 ар куспын наукая доктор ужзэ вуттоно, пе, озьы ке ӧз луы, Игорь Николаевич ӟечъяськытэк кошко, шуэ.

Озьыен, Ашальчи Оки нимо премиен дунъямъёслэн но, нылкышно кенешлэн ужаз пыриськисьёслэн но матысь аръёслы трос быдэстоно ужпумъёссы чакламын. Нош удмурт кенакъёс та возэз гинэ уз нуэ, мынон сяменызы эшшо тросгес пайдаё ужъёсты лэсьтозы.

Елена Скворцова
Туспуктӥз Владимир Беломорских

Удмурт Дунне
By Удмурт Дунне 26 апреля, 2013 14:16
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<