Воштӥськыны юрттоз Артём

Удмурт Дунне
By Удмурт Дунне 23 апреля, 2013 11:30
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Воштӥськыны юрттоз Артём

"Шундылэн" азьветлӥсьёсыз

«Шундылэн» азьветлӥсьёсыз

Котькыӵе уж борды басьтӥськытозь, малпаськоно, малы со кулэ, кыӵе пайда ваёз, кин юрттоз. Та сярысь вунэтоно ӧвӧл дыр ортчемъя но.

Удмурт егитъёслэн «Шунды» огазеяськонзы 20 арлэсь азьло кылдэмын. Нырысь со удмурт егитъёсыз огазеясь инты вал, бӧрысь кылдӥзы уно проектъёсыз.

Али но та дэменлык тырше туала вакытлы лэчыт ужпумъёсыз ӝутыны, тунсыко проектъёсыз улонэ пыӵатыны, дырен ӵош азьлане вамышъяны. Озьы ке но, вань «Шундылэн» аслаз шуг-секытъёсыз но.

20-тӥ-21-тӥ апреле огазеяськонлэн мыло-кыдо ёзчиосыз, ёрос ёзэтъёсыныз кивалтӥсьёс Егитъёсын ужанъя, Йӧскалык политикая министерствоослэн но Эшъяськон юртлэн юрттэмзыя «Дзержинец» лагере люкаськылӥзы. Отын «шундыос» мер ужзылэн шуг-секытъёсыз, стратегиез сярысь вераськизы.

Мар со команда но кызьы со кылдэ? Мар сое огазея? Кыӵе кулэ луыны зэмос азьветлӥсь? Та юанъёслы валэктон утчазы «Шундылэн» 20 ёзчиосыз Лариса Ускова психологлэн «Команда: кылдытон но кивалтон, мер огазеяськонын азьветлӥсьлэн интыез» тренингаз.

Москваысь нимысьтыз та дышетсконэ лыктэм удмурт азьветлӥсь, «Уралистика» сайтэз кылдытӥсь Артём Малых огазеяськонлэсь шуг-секытъёссэ ас сяменыз валэктыны тыршиз, кылдэм шуг-секытъёсыз сэрттон-пертчон пумысен малпаськытӥз.

Группаослы люкиськыса, егитъёс туннэ нуналлы кулэ луись ӧръёсъя (медиа, мерлыко улон но экономика, туризм но мукет) азинскон сярысь вераськизы. Усьтӥськизы выль шуг-секытъёс.

Артём «Шундылэн» сюресэз шоры палэнысен учке ке но, тренингез одно ик юрттыны кулэ (нырысь ик, валаны, кыӵе янгышъёс лэсьтӥсько али но кызьы соослэсь утиськоно азьланяз). Люкаськемъёс асьсэ удысазы, асьсэ ёзъёсазы пумиськись шугъяськонъёссэс шараяку, Москваысь эшмы пӧртэм сюресъёс сярысь вераз, кудъёсыз юрттозы югдурысь потыны. Кин ке, оло, уг оскы, мер ужлэсь теоризэ гинэ тодӥсь, улоназ соин пумиськылымтэ адями пайда ваёз шуыса. Но озьы ке учконо, кин азинтӥськыны юрттоз? Мукет огазеяськонъёсысь азьветлӥсьёс? Малпасько, уз, малы ке шуоно соос но ас дуннеязы выемын: огдышемъя ортчыто ужрадъёс, гожъяло проектъёс, пырисько пӧртэм конференциосы, фестивальёсы. «Шундылэн» кивалтӥсез Ольга Тронина быгатоз ортчытыны пайдаё дышетсконъёс ёрос ёзэтъёсын, али кылдэм огазеяськонъёслэн кивалтӥсьёссылы, нош «Шунды» кадь бадӟым дэменлыклы со номыр выльзэ уз ни сёты. Соин ик Олялэсь ӵапак Артёмез та слётэ ӧтемзэ (палэнысь, выль кужымен но малпанъёсын) туж шонерен но кулэен лыдъясько.

Вуоноез таӵе пумиськон сӥзьыл радъяськоз. Соку таяз слётын кутскем уж азьланьтэмын луоз, нош со дорозь «шундыослэн» «дорысь ужзы» вань — малпаськоно выль проектъёс бордын (соослэн инъетъёссы вань ни), огазеяськонэ выль кужым, выль ёзчиос пыртыны тыршоно.

Лена Рябина
Туспуктӥз Алексей Медведев

Удмурт Дунне
By Удмурт Дунне 23 апреля, 2013 11:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<