Визьмо кичӧлтонъёс уг сылмо

Удмурт Дунне
By Удмурт Дунне Апрель 16, 2013 11:18

Удмурт нылкышно кенешен пӧртэм аръёсы кивалтӥзы визьмо, йӧно но адӟем карымон кышномуртъёс. Кыӵеен тодазы ваё соос огазеяськонын ужам-бергам аръёссэс?

Нина Малых, Дышетӥсьёслэсь тодон-валанзэс будэтонъя институтысь методист, «Удмурт Кенеш» огазеяськонлэн азьвыл вице-президентэз, Удмурт нылкышно кенешез кылдытӥсь:

— Кылем даурлэн 20-тӥ аръёсаз ортчиз удмурт нылкышноослэн нырысетӥ ӧтчамзы. Но та ӧр рос-прос азинскыны ӧз вормы. 20 ар талэсь азьло малпамы та кичӧлтонэз выльысь улӟытыны. Ма, вакытыз но сыӵе вал ук: уждунтэк пукон, коньдонлы ёрмон. Нылкышнолы ӵапак интыяз луысал ӟечезлы оскон пыӵатон. Та кичќлтонмес шараямы «Удмурт Кенеш» огазеяськонын. Соку соин кивалтӥз Михаил Шишкин. Кичӧлтонмес со ӟечен дунъяз. Монэ кивалтӥсе юнматӥзы. Озьы кутскимы дэмен ужаны. Ёросъёсын кылдытӥмы огазеяськонмылэсь ёзъёссэ. Мар ватонэз: куд-ог ёрос кивалтӥсьёс милемлы пумит мылкыдзэс но возьматылӥзы. Но ми ӧм чигналэ. Радъямы удмурт нылкышноослэсь конференцизэс. Отчы пыриськиз 400 делегат, ӧтем куноос 200 мурт пала вал. Со дырысен, зэмзэ вераса, та огазеяськонын такем бадӟым ужрадъёс ӧз ортчылэ ни.

Огазеяськонэн кивалтон аръёс весяклы тодам кылёзы. Удмурт нылкышно кенеш ӵектэмъя ик юнматэмын вал Ашальчи Оки нимо премия. Удмурт телевиденилы дэмламы «Ашальчи» передача лэсьтыны. Та проект улонэ пыӵаз, но «Такъян» нимын. Сое нуиз Удмурт нылкышно кенешен мон бӧрсьы кивалтэм Татьяна Корнилова. Шумпотӥсько, кичӧлтонмы али ке но улонэ пыӵа, азинске.

Людмила Христолюбова, история наукаосъя кандидат:

— Удмурт нылкышно кенеш кылдыку, шаерамы ужа вал ини Удмуртиысь кышномуртъёслэн кенешсы. Отчы, мон тодэмъя, удмурт нылкышноос пырисько вал, но соос малпанъёссэс шара вераны ӧз дӥсьтылэ. Удмурт нылкышно кенешез кылдытэм бере Удмуртиысь кышномуртъёслэн кенешысьтызы ёзчиос юалляськыны ӧдъязы: малы бен нимаз кариськонэз, пӧртэм выжыысь кышноос азьын сылӥсь ужпумъёс огкадесь ӧвӧл шат? Ми валэктыны выримы «нимазъяськонмылэсь» мугзэ. Котьма ке но, аслад выжыысьтыд потэм калык пӧлын малпанъёстэ но вераны, уж борды но кутскыны капчигес. Озьы удмурт нылкышноос калленэн-калленэн пыриськыны ӧдъязы общественной улонэ, малпанъёссэс вераны ӧз кепыралэ ни. Пӧртэм ужрадъёс ортчытъямы. Малпасько, котькудӥз пайдаен берытскиз. Ас азямы ужпум пуктӥмы: ог-огенызы эшъяськытоно городын но, гуртын но улӥсь удмурт кышномуртъёсты. Дэмен кариськыса, шуг-секытъёсты сэрттыны-пертчыны капчигес ук. Шумпотӥсько: Удмурт нылкышно кенеш зэмос юн кужымлы пӧрмиз.

Галина Никитина, Историяя, кылъя но литературая Удмурт институтлэн кивалтӥсезлэн воштӥсез, история наукаосъя доктор, профессор:

— Шуныт мылкыдын тодам вайисько Удмурт нылкышно кенешын тыршем аръёсме. Мон котыре люкаськизы валась, визьмо но котькыӵе уж борды капчиен басьтӥськись адямиос. Кылсярысь, Милитина Гаврилова-Решитько, Галина Романова, Надежда Бочкарёва, Светлана Арекеева но уно мукетъёсыз. Шаермылэн кыӵе сэрегъёсаз гинэ ӧм вуылэ! Гурт хозяйствоя юанъёс кылдо ке — сьӧрамы басьтылӥмы гурт удысъя специалистъёсты, мукетыз кылбур гожъянэн тунсыкъяське ке — ортчытъямы тодмо кылбурчиосын пумиськонъёс. Трос нылпиё, ёрмись семьяослы гуманитарной юрттэт но вуттыны тыршылӥмы. Удмурт нылкышно кенешен кивалтонлэсь палэнски ке но, со дырысь мылкыды пушкам улэ: гуртоос доразы пумиськонэ ӧтё ке, соослы «уг» шуыны уг быгатӥськы. Городын улӥсьёслэн угось луонлыксы вань пӧртэм удмурт ужрадъёсы пыриськыны, юанъёсынызы вазиськыны. Нош гуртоослы та ласянь секытгес.

Удмурт нылкышно кенешлы сӥзисько азьланяз но тазьы ик пыд вылаз юн сылыны. Удмурт кышномурт понна солэн пайдаез бадӟым.

Елена Никитина

Удмурт Дунне
By Удмурт Дунне Апрель 16, 2013 11:18
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<