Уваын гужем пӧсь луоз

Удмурт Дунне
By Удмурт Дунне Апрель 19, 2013 15:15

Гуртысь спортсменъёс гужем шудонъёслы дасяськонзэс мытӥзы. џошатсконъёс ортчозы 2-тӥ-6-тӥ июле Ува каргуртын. Ужрадлы дасяськемзы сярысь мадиз Ува ёрос администрациысь мугорез кыдатон культурая но спортъя ёзэн кивалтӥсь Иван Эшмаков.

— 2006-тӥ арын Гурт тол шудонъёсты милям ёросамы ортчытэм бере Уваын трос воштӥськонъёс луизы, бадӟымгес саклык висъяны кутскимы спортэз азинтонлы, — шуэ Иван Александрович. — Калык куас базае лыктэ, нискыланы мылкыд карисьёс понна тырмыт инвентарь дасямын. Берло аръёсы тросгес адямиос спортзалъёсы кыстӥськыны кутскизы. Бадӟымъёслэсь адӟем каро нылпиос. Та вакытэ ёросысь 116 интыын мугор кыдатыны луонлыкъёс кылдытэмын, кылсярысь 52 спортплощадкаос, 37 спортзалъёс, 4 куас базаос ужало, 5 интыын ыбылӥськыны мылкыд карисьёс кужымзэс эскеро.

— Гуртын улӥсьёс спорт шоры кызьыгес учко, спортысь кыӵе амалъёсыз тужгес юн гажало?

— Тросэз гуртоос командаен шудонлы синмаськемын. Одӥг пол спортзалэ вамыштэм муртэ дораз возьыны туж секыт. Мукетъят эшъёссэ, бускельёссэ чортэ. Огъя чакласа потоно ке, гужем тросгес шудо футболэн, волейболэн, нош толалтэ уноез воргоронъёс коньки вылэ султо. Куд-ог дыръя паймиськод: ульчаос, ужан коллективъёс куспын зэмос вожмаськон мынэ. Воргоронъёслэсь шайба сьӧры бызьылэмзэс синйылтыса, кузпалъёссы но нылпиос катоке пото. Вератэк кельтэм уг поты куасэн но пыдын бызьылӥсьёс сярысь, данын ыбылӥськон.

— Кылӥськиз вал, туэ гужем шудонъёсы ыбылӥськон пыртэмын луоз шуыса.

— Токма шорысь таӵе вераськонъёс ӧз ветлэ, гужем шудонъёс азьын ёросъёсын ыбылӥськисьёслэн командаоссы кылдытэмын луыны кулэ вал. Но та нуналъёсы тодмо луиз: оргкомитет ӵектэмъя но гурт шудонэз вазьгес ортчытыны малпамен валче, командаен ыбылӥськон шудонысь куштэмын. Ӵапак со нуналъёсы Ижын ортчоз Россилэн ыбылӥськонъя чемпионатэз. Азьвыл аръёсы сямен ик, Гурт шудонъёсын ыбылӥськонэ пыриськозы полиатлонистъёс но ёрос йыръёс гинэ.

— Мугорез кыдатонэ трос калыкез кыскон понна специалистъёс но тырмыт луыны кулэ, дыр?

— Ёросысь мугорез кыдатон культураез но спортэз азинтон удысын 70 мурт ужа: нылпи садъёсын, школаосын физкультураез нуисьёс, профессиональной колледжысь преподавательёс, предприятиосын но организациосын 6 мурт спортэз азинтон понна кыл кутэ. 2010-тӥ-2014-тӥ аръёсы ёросын спортэз азинтон вылысь нимысьтыз программа кутэмын. Быдэс арлы план гожтӥське, ӵошатсконъёстэк кылем шутэтскон нуналъёсмы чиньыен лыдъямон.

— Гурт тол шудонъёсын уваос трос аръёс ӵоже вормись командаос пӧлын ветло, нош гужем шудонъёс дыръя ялан «пу» медаль донгиське. Маин меда со герӟаськемын?

— Ньылетӥ инты понна но кужмо нюръяськоно. 25 команда пӧлын ньылетӥ луыны капчи ӧвӧл. Куноосты пумитаны милемлы шуд усиз бере, туэ одно кыӵе ке йӧногес медаль басьтомы шуыса малпаськомы. Гужем шудонъёслы дасяськонмес но вазен ик мытӥмы ни.

— Куд-ог ёрос кивалтӥсьёс шаерысь кужмо спортсменъёсты ас палазы кыскыны тыршо, та шоры кызьы учкиськоды?

— Бадӟым ёросъёслэн луонлыксы вань ке спортсменэз ас палазы кыскыны — номыр уродзэ уг адзӥськы. Озьы соос ёроссылэсь данзэ ӝутон понна сюлмасько, спортсменлы ужан но улон инты сёто, тырмыт уждун тыро.

— Ёростылы вормон вайисьёсты кызьы данъяськоды?

— Котькыӵе вормонэз дыраз но быгатыса данъяны кулэ. Куд-ог ёросъёсын Гурт шудонъёс ортчем бере ик спортсменъёссэс люкало, ӟечкылало ке, ми декабрез витиськомы. Спортын вормон басьтӥсьёсты, тренеръёсты люкаса, бадӟым ужрад ортчытӥськомы. Гурт шудонъёсын быдэс команда вормисе потэ ке, котькуд спортсменэз коньдон кузьымен пусйиськомы. Нимысьтыз данъяськомы Гурт шудонъёсын куать вормисьёс пӧлы шедемъёсты, таосызлэн коньдон кузьымзы кќня ке сюрс манетъёсын лыдъяське. Ёросысь тужгес усто спортсменъёсты ёросысь яке шаерысь данъян грамотаосын пусйиськомы. Спортэз азинтонлы ёрос бюджетысь нимысьтыз коньдон висъяське. Валамон, соин гинэ кыдёке уд вуы, ватсаса коньдон утчано луэ на. Нуналлы быдэ спортэн эшъяськисьёс тодо, медаль понна гинэ соос уг бызьыло, тазалыксэс юнмато.

— Ёросысь спортэз азинтон вылысь администрациын ужасьёслы но котьку «формаын» возиськоно, вылды.

— Ёрос кивалтӥсьёс котьку но гурт спортсменъёслы адӟем карымон луо. Ува ёрослэн йырыз Владимир Головин ачиз но спортэн эшъяське. Волейболэн но футболэн шудэ, куасэн бызьылэ, ӟеч ыбылӥське. Гурт шудонъёсы но ваньмаз сямен пыриське, ёросын ортчылӥсь ужрадъёсты но палэнэ уг кельты. Ачиз котькудаз ӵошатсконэ уг пыриськы ке но, люкаськем калыклы шуныт кыл вералоз. Ёросэн кивалтӥсьёс сяна, мыло-кыдо ӵошатско вань муниципал кылдытэтъёслэн йыръёссы но.

Валентина Кутузова

Удмурт Дунне
By Удмурт Дунне Апрель 19, 2013 15:15
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<