Улӟоз-а «Amiso Wott»?

Удмурт Дунне
By Удмурт Дунне 23 апреля, 2013 13:36
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Улӟоз-а «Amiso Wott»?

"Amiso Wott" одӥг ӝытлы улӟылӥз

«Amiso Wott» одӥг ӝытлы улӟылӥз

5-тӥ оштолэзе «Подвал» арт-клубын «Удмурт рок» ужрад ортчиз. Отчы пыриськизы шаерысьтымы рок-группаос: Шор Постолысь «Гаруда» но Ижкарысь «Лӧптэм гон», «Уйвӧт» но «Amiso Wott». Концерт сӥземын вал «Гарудалы» 5 ар тырмонлы.

«Гаруда» — удмурт фолк-метал группа, кылдӥз 2008-тӥ арын оштолэзе. Со туала егитъёслы адӟытэ удмурт калык кырӟанлэсь вань чеберзэ, нош арлыдоослы — выль крезьгурез. Пӧртэм ужрадъёсы пыриськыса, «Гаруда» нырысь тодмо луиз Дэри ёросын, собере быдэс шаерын но. Соосыз ӧтизы Гербере, собере «Теория относительности», «Палэзян» фестивальёсы.

— Удмурт рок — зэмос, со вань, озьыен, вань милям удмурт лулчеберетмы. Гажано удмуртъёс! Кылзӥське «Silent Woo Goore» группаез, данъяське Трокаен, вӧсяське Кылдысинлы — улонмы пушъёз, — оскытэ группалэн гитаристэз но бэк-вокалистэз Роман Симаков.

Со ик шумпотымон ивор вераз: «Гаруда» альбом борды басьтӥськиз. Отчы пырозы 10 пала кырӟанъёс. Витёмы.
«Инкогнито» группа табере «Лӧптэм гон» нимаське.

— Группамес мон озьы нимай, — вера солистка Валерия Фёдорова. — Тодам лыктӥз пичи дыры: монэ озьы анае но ӵужанае акылляськыкум нимало вал. Та ним тужгес но тупа егит мылкыдмылы: крезьгурмы шулдыр но задор.

Егитъёс стильзэс ӧз шедьтэ на, утчасько, усьтӥськыны тыршо. Туннэ нуналлы соос фолкез но реггиез суралто, азьланяз кельшись кырњанъёслы каверъёс лэсьтыны малпанзы вань.

Кырӟанъёссэ быдэстэмез бере «Уйвӧт» группа ворсаськемез сярысь ивортӥз. Юлия Гаврилова мугзэ тазьы валэктӥз:

— Милемлы ӵошен ёркыт луиз. Ми будӥмы, котькудмы пӧртэм сюресъёс бырйим, тунсыкъёсмы воштӥськизы. Владик Степановлэн но Костя Волковлэн выль проектсы — «Newless». Мон но Лёша Софронов университетэ дышетскыны пырим, мукет сюлмаськонъёсмы кылдӥзы. Группаен люкаськылыны секыт луиз. Соин ми котькудмы азьланьтом ужмес, но нимаз.

Оскем потэ, быгатӥсь егитъёс уз ыше шуыса, витиськом выль проектъёссэс.

«Amiso Wott» группа одӥг ӝытлы улӟылӥз. Со быдэстӥз калык пӧлы вӧлмем кырӟанъёссэ. Люкаськемъёсты ортчемаз вуттӥзы кадь. Нимысьтыз пусъеме потэ Костя Волковез. Пияшлэн быгатонлыкъёсыз син куспын будо. Дыбырен (барабанэн) шудэмез — профессионаллэн кадь ни. Калык уно пол шудыны куриз. Оло, удмурт Джои Джордисон ӝужа? Но со понна трос ужано на.

Александр Фролов:
— Концертэ трос адями ӧз вуы ке но, ӝыт туж шулдыр ортчиз. Люкаськемъёс висъяськизы арлыдын, озьыен, удмурт кырӟан ваньзэсты огазеяз. Удмурт рок концертэ сюрон — бадӟым шумпотон. Синмаськи Валерия Фёдоровалэн куараезлы. «Гаруда» кырӟанъёссэ быдэстыку, пыдъёс ӧз чидалэ тыпыртытэк. Жаль, «Уйвӧт» группа куашка шуыса. Тужгес но кельшиз «Amiso Wott». Пияшъёс сётћзы оскон, оло, выльысь люкаськозы на шуыса.

Тужгес но усто «суралтӥз» фолк но метал ӧръёсты «Гаруда». Группа кыкетӥ улон сётӥз калык кырӟанъёслы. Нош кыӵе тунсыко гур пӧрме, электрогитара но арган валче шудо ке! Удмурт рок улэп — та концерт сое возьматӥз.

Марина Сергеева:
— Мон малпамъя, удмурт рок али гинэ вордӥське ай. «Amiso Wott» — куашкам группа. Та ужрад понна гинэ соос люкаськизы. Сцена вылысен пиослэн синъёссы ӝуатскизы, адӟиське вал: соос гурзылэсь кайф басьто. Кылзӥсьёс но шумпотыса пумитазы — мӧзмизы, шӧдске. Соос зэмзэ но удмурт рок культураез вордон-азинтон понна бадӟым вамыш лэсьтӥзы. «Лӧптэм гон» — тунсыко группа, но асьсэды сцена вылын востэм возё на.

* * *
Джои Джордисон — метал барабанщик, тодмо луиз, Slipknot группаын шудыса.

Маша Золотарёва

Удмурт Дунне
By Удмурт Дунне 23 апреля, 2013 13:36